ខេត្តស្ទឹងត្រែង៖ ថ្លែងក្នុងពិធីអបអរសាទរខួបអនុស្សាវរីយ៍ខួប ៤៥ឆ្នាំ ទិវាប្រាក់រៀល កាលពីថ្ងៃទី១៩ ខែឧសភាម្សិលមិញនេះ លោក សរ សុពុត្រា អភិបាលខេត្តស្ទឹងត្រែង បានគូសបញ្ជាក់ថា រូបិយវត្ថុជាតិ បានដើរតួនាទីយ៉ាងសំខាន់ក្នុងការសម្របសម្រួលដល់សកម្មភាពវិនិយោគ ផលិតកម្ម និងពាណិជ្ជកម្មឱ្យមានភាពរស់រវើកនៅក្នុងចរន្តសេដ្ឋកិច្ចជាតិ ជាពិសេសចូលរួមលើកកម្ពស់គោលនយោបាយរូបិយវត្ថុរបស់ធនាគារកណ្តាល។
លោក សរ សុពុត្រា បានឱ្យដឹងថា តាមរយៈការអនុវត្តតាមអាទិភាពគន្លឹះទាំង ៥ នៃយុទ្ធសាស្រ្តបញ្ចកោណដំណាក់កាលទី១ បានធ្វើឱ្យខេត្តរីកចម្រើនគួរឱ្យកត់សម្គាល់។ ជាលទ្ធផលនៃគោលនយោបាយអភិវឌ្ឍន៍ដែលត្រូវបានដាក់ចេញនាពេលកន្លងមក ការអភិវឌ្ឍខេត្តស្ទឹងត្រែង មានវឌ្ឍនភាពជាលំដាប់ ដែលក្នុងនោះវិស័យធនាគារ និងហិរញ្ញវត្ថុក៏មានការរីកចម្រើនគួរឱ្យកត់សម្គាល់ផងដែរ។
លោកអភិបាលខេត្តរូបនេះ បានគូសបញ្ជាក់ទៀតថា បច្ចុប្បន្ន មានគ្រឹះស្ថានធនាគារនិងហិរញ្ញវត្ថុ ដែលកំពុងប្រតិបត្តិការនៅក្នុងខេត្តសរុបចំនួន ១៦ គ្រឹះស្ថាន ដែលបានរួមចំណែកគាំទ្រដល់ការអភិវឌ្ឍប្រកបដោយបរិយាបន្ន តាមរយៈការផ្តល់សេវាហិរញ្ញវត្ថុនានាដល់ប្រជាពលរដ្ឋ និងក្រុមហ៊ុន-សហគ្រាស។
លោក សរ សុពុត្រា បានសង្កត់ធ្ងន់ថា៖ «ការអភិវឌ្ឍសេដ្ឋកិច្ច និងសង្គមជាតិជារួមអាចប្រព្រឹត្តទៅបានប្រកបដោយវឌ្ឍនភាពនិងចីរភាព ទាមទារឱ្យមាននូវវត្តមានរូបិយវត្ថុជាតិ ដែលបានដើរតួនាទីយ៉ាងសំខាន់ ក្នុងការសម្រួលដល់សកម្មភាពវិនិយោគ ផលិតកម្ម និងពាណិជ្ជកម្មឱ្យមានភាពរស់រវើក»។
ជាមួយគ្នានេះ លោក អភិបាលខេត្ត បានបន្ថែមថា ប្រទេសនីមួយៗជុំវិញពិភពលោកតែងតែមានរូបិយវត្ថុជាតិរបស់ខ្លួនដែលតំណាងឱ្យអត្តសញ្ញាណជាតិផងដែរ។ ដូច្នេះ ការប្រើប្រាស់ប្រាក់រៀលឱ្យបានទូលំទូលាយគឺជាការចូលរួមចំណែកជំរុញសេដ្ឋកិច្ចជាតិ ថែរក្សាអត្តសញ្ញាណជាតិ ដែលពង្រឹងស្មារតីបង្រួបបង្រួមជាតិក្នុងនាមជាប្រជាជននៅក្នុងសង្គមជាតិតែមួយ។
បេីតាមយោងតាមលទ្ធផលសង្កេតរបស់ធនាគារជាតិនៃកម្ពុជា និងJICA បានបង្ហាញថា មានការប្រើប្រាស់ប្រាក់រៀលយ៉ាងទូលំទូលាយ ជាពិសេសនៅតាមទីជនបទ ក្នុងនោះប្រមាណ ៩៣% នៃការចំណាយរបស់ប្រជាពលរដ្ឋនៅក្នុងខេត្តស្ទឹងត្រែងជាប្រាក់រៀល៕
ដោយ៖តារា
