ខេត្តកណ្ដាល៖ បុរសជាបុគ្គលិកក្រុមហ៊ុនម្នាក់ត្រូវបានម្ចាស់ក្រុមហ៊ុនប្តឹងសមត្ថកិច្ចក្រុងតាខ្មៅឲ្យចាប់ខ្លួនករណីរំលោភលើទំនុកចិត្ត ក្រោយពីជនសង្ស័យជាបុគ្គលិកបានយកលុយរបស់ក្រុមហ៊ុនចាយអស់ជាងបួនពាន់ដុល្លារ ។
ករណីចាប់ខ្លួននេះធ្វើឡើងនៅថ្ងៃទី២១ ខែឧសភា ឆ្នាំ២០២៥ វេលាម៉ោង០៨និង១០នាទី នៅចំណុចភូមិឆ្មារពួន ឃុំ ជើងកើប ស្រុកកណ្ដាលស្ទឹង ខេត្តកណ្ដាល។
មន្ត្រីនគរបាលក្រុងតាខ្មៅបានឲ្យដឹងថា ជនរងគ្រោះឈ្មោះ ឃ្លាំង សារឿន ភេទប្រុស អាយុ៣៥ឆ្នាំ រស់នៅភូមិថ្មី សង្កាត់/ក្រុងតាខ្មៅ ខេត្តកណ្ដាល។ ជនសង្ស័យឈ្មោះ ក្លូ លាភ ភេទប្រុស អាយុ៣០ឆ្នាំ រស់នៅភូមិជ្រោយស្នោ ឃុំព្រែកជ្រៃ ស្រុកកោះធំ ខេត្តកណ្ដាល មុខរបរបុគ្គលិកផ្នែកលក់(ឃាត់ខ្លួន)។ សម្ភារៈបាត់បង់រួមមាន ៖លុយចំនួន ៤៦៧៩$ (បួនពាន់ប្រាំមួយរយជិតសិបប្រាំបួន ដុល្លារ) ។ វត្ថុតាងចាប់យករួមមាន៖ទូរស័ព្ទ០១គ្រឿងម៉ាកiphone 7 plus ពណ៌ខ្មៅ។
ប្រភពដដែលបន្តថា នៅថ្ងៃទី២០ ខែឧសភា ឆ្នាំ២០២៥ វេលាម៉ោង២០និង២០នាទី ពេលជនរងគ្រោះកំពុងនៅផ្ទះស្ថិតនៅក្នុងភូមិថ្មី សង្កាត់/ ក្រុងតាខ្មៅ ខេត្តកណ្ដាល ក៏មានម៉ូយបានខលមកជនរងគ្រោះថា ខាងផ្នែកលក់របស់ជនរងគ្រោះម្នាក់បានខលមកទារលុយថ្លៃម៉ូទ័រពីគាត់មុនថ្ងៃកំណត់ ព្រោះសន្យានឹងគ្នាថាត្រូវបង់មួយខែម្តង លុះដល់ថ្ងៃទី២១ ខែឆ្នាំដដែល វេលាម៉ោង០៨និង១០នាទី ជនរងគ្រោះបានចេញពីផ្ទះ ហើយមកកន្លែងលក់ម៉ូទ័ររបស់ខ្លួនដែលស្ថិតនៅក្នុងភូមិឆ្មារពួន ឃុំ ជើងកើប ស្រុកកណ្ដាលស្ទឹង ខេត្ត កណ្ដាល ពេលមកដល់ជនរងគ្រោះបានឆែកមើលបុងដែលអតិថិជនបានកុម្មង់ទិញ បានឃើញថាលុយដែលអតិថិជនបង់មកគឺមិនចូលគណនេយ្យក្រុមហ៊ុនទេ គឺចូលក្នុងគណនេយ្យរបស់ជនសង្ស័យ អស់រយៈពេលជាងមួយខែមកហើយ សរុបជាទឹកប្រាក់ចំនួន៤៦៧៩$(បួនពាន់ប្រាំមួយរយជិតសិបប្រាំបួនដុល្លារ) រូចបានហៅជនសង្ស័យខាងលើមកសួរហេីយជនរងគ្រោះបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលជើងកើប។ ក្រោយទទួលបានព័ត៌មានភ្លាមសមត្ថកិច្ចប៉ុស្តិ៍ជើងកើបបានចុះទៅឃាត់ខ្លួនជនសង្ស័យដើម្បីសួរនាំ ដែលតាមចម្លើយសារភាពរបស់ជនសង្ស័យថាខ្លួនពិតជាបានយកលុយរបស់ក្រុមហ៊ុនទៅចាយអស់ចំនួន៤៦៧៩$ (បួនពាន់ប្រាំមួយរយជិតសិបប្រាំបួនដុល្លារ)ពិតប្រាកដមែន រួចបញ្ជូនជនសង្ស័យមកអធិការដ្ឋាននគរបាលស្រុកកណ្ដាលស្ទឹង ដើម្បីកសាងសំណុំរឿងតាមនីតិវិធីច្បាប់ ៕
ដោយ៖ ស្អាងជ័យ
