ភ្នំពេញ៖ កម្លាំងនគរបាលប៉ុស្ដិ៍ស្រះចក ចុះប្រតិបត្តិការប្រមូលស្ត្រីបម្រើសេវាផ្លូវភេទនៅតាមផ្លូវនិងសួនច្បារសាធារណៈក្នុងមូលដ្ឋានប៉ុស្ដិ៍ស្រះចក ជាលិទ្ធផលឃាត់ខ្លួនស្រ្តីរកសីុផ្លូវភេទ៩នាក់ យកមកប៉ុស្តិ៍ដើម្បីបញ្ជូនបន្តទៅកាន់មន្ទីរសង្គមកិច្ចធ្វើការអប់រំ ។

ករណីឃាត់ខ្លួនស្រ្តីរកសីុផ្លូវភេទខាងលើនេះបានធ្វើឡើងកាលពីវេលាម៉ោង១២និង៣០នាទីរំលងអាធ្រាត្រឈានចូលថ្ងៃទី២៦ ខែសីហា ឆ្នាំ២០១៦ ស្ថិតត្រង់ចំណុចតាមដងផ្លូវនិងសួនច្បារ ក្នុុងមូលដ្ឋានសង្កាត់ស្រះចក ខណ្ឌដូនពេញ ។

លោក កាន់ វណ្ណះ នាយប៉ុស្តិ៍នគរបាលស្រះចក ឲ្យដឹងថា ក្រោយពីទទួលបានបញ្ជាពីលោក ហួត ចាន់យ៉ារ៉ាន់ អធិការនគរបាលខណ្ឌដូនពេញ ឲ្យចុះត្រួពិនិត្យមើលក្នុងមូលដ្ឋាន ដោយមួយរយៈពេលនេះឃើញស្ត្រីរកសីុផ្លូវភេទចាប់ផ្ដើមកវិញមួយចំនួននោះ ហើយលោកក៏បានដឹកនាំកម្លាំងចុះដើរប្រមូលនារីដែលរកសុីផ្លូវភេទនៅទីតាំងចំនួន៣គឺទីតាំងចំណុចសួនសីុសុវត្ថិ, រង្វង់មូលគួចកាណុង និងផ្លូវ៧០ សង្កាត់ស្រះចក ខណ្ឌដូនពេញ។

ក្រោយប្រមូលបាននារីរកសុីផ្លូវភេទចំនួន៩នាក់យកទៅកាន់បុស្តិ៍ស្រះចក ដើម្បីរងចាំខាងមន្ទីរសង្គមកិច្ចមកទទួលយកពួកគាត់ទៅដើម្បីធ្វើការអប់រំកុំឲ្យរកសុីផ្លូវភេទនៅតាមដងផ្លូវតទៅទៀត៕

ដោយ៖ ស ដារ៉ា