អន្តរជាតិ៖ នាយកដ្ឋានអាកាសចរណ៍ស៊ីវិលរបស់ប៉ាគីស្ថានបានប្រកាស កាលពីថ្ងៃទី២៣ ខែឧសភា ឆ្នាំ២០២៥ម្សិលមិញថា ដែនអាកាសប៉ាគីស្ថាននឹងបន្តបិទចំពោះជើងយន្តហោះឥណ្ឌា ដែលនឹងពន្យារពេលរហូតដល់ថ្ងៃទី២៣ខែមិថុនា ។
បទបញ្ជាហាមឃាត់នេះបានអនុវត្តចាប់ពីថ្ងៃទី២៤ខែមេសាកន្លងទៅនេះ ដែលមានរយៈពេលមួយខែ ជាវិធានការឆ្លើយតបវិញមួយដែលរដ្ឋាភិបាលប៉ាគីស្ថានបានដាក់ចេញបន្ទាប់ពីស្ថានការណ៍តានតឹងរវាងប៉ាគីស្ថាននិងឥណ្ឌាបានឡើងកម្ដៅ ។ បន្ទាប់ពីអនុវត្តបទបញ្ជាហាមឃាត់ ក្រុមហ៊ុនអាកាសចរណ៍ឥណ្ឌាបានកែប្រែខ្សែហោះហើរដោយបង្ខំ ដែលបានបន្ថែមពេលវេលាហោះហើរនិងថ្លៃដើមអាជីវកម្មជាច្រើន ។
នាយកដ្ឋានអាកាសចរណ៍ស៊ីវិលរបស់ប៉ាគីស្ថានបានថ្លែងថា នឹងបន្តត្រួតពិនិត្យវិធានការដាក់កំហិតដែនអាកាសនេះ ការសម្រេចចិត្តនៅពេលខាងមុខវាស្ថិតនៅលើបម្រែបម្រួលនៃស្ថានការណ៍សន្តិសុខរវាងប៉ាគីស្ថាននិងឥណ្ឌា៕
ដោយ៖តារា
