ភ្នំពេញ: បុរសជាជនជាតិចិនម្នាក់ទំនងជាស្រវឹងស្រាបានបើករថយន្តក្នុងល្បឿនលឿនវ៉ាជែងមិនប្រយ័ត្នជ្រុលទៅបុកឡាំប្រឺតាក្រឡាប់ផ្ងារជើង ហេីយបន្តទៅបុករះរថយន្ត២គ្រឿងបន្ថែមទៀតបណ្តាលឲ្យម្ចាស់ឡាំប្រឺតារងរបួសធ្ងន់។
ហេតុការណ៍គ្រោះថ្នាក់ចរាចរណ៍នេះដែរបង្កឲ្យមានការភ្ញាក់ផ្អើលកាលម៉ោង១០យប់ថ្ងៃទី២៦ខែឧសភា ឆ្នាំ២០២៥ ស្ថិតនៅតាមបណ្ដោយផ្លូវ២០០៤ ទល់មុខនិងការ៉ាសាំងPTT ចំណុចភូមិត្រពាំងល្វាសង្កាត់កាកាបទី១ខណ្ឌពោធិសែនជ័យរាជធានីភ្នំពេញ។
ប្រភពពីកន្លែងកើតហេតុបានឲ្យដឹងថានៅមុនពេលកើតហេតុគេឃើញរថយន្តបង្កម៉ាកforder ranger ពណ៌សមួយគ្រឿងពាក់ស្លាកលេខភ្នំពេញ 2CD-9546 បើកបរដោយបុរសជនជាតិចិនម្នាក់ក្នុងស្ថានភាពស្រវឹងធ្វើដំណើរតាមបណ្ដោយផ្លូវ 2004 ទិសដៅពីជើងមកត្បូងក្នុងល្បឿនលឿនលុះពេលបើកមកដល់ចំណុចកើតហេតុខាងលើស្រាប់តែបន្ថែមល្បឿនឡើងវ៉ាជែងជ្រុលទៅបុកម៉ូតូកង់បីឥណ្ឌាមួយគ្រឿងពណ៌សពាក់ស្លាកលេភ្នំពេញ1HL-1407 បើកបរដោយបុរសម្នាក់ធ្វេីដំណើរក្នុងទិសដៅបញ្រ្ចាស់គ្នាចំពីមុខពេញទំហឹងបណ្តាលឲ្យខ្ទៀតទៅមុខក្រឡាប់ផ្ងារជើង រួចហើយរថយន្តបង្កបន្តទៅបុកនិងរថយន្តម៉ាកតូយូតាព្រូសមួយគ្រឿងទៀតពណ៌ក្រហមពាក់ស្លាកលេខ ភ្នំពេញ 2BE- 1308 បើកបរដោយបុរសម្នាក់ធ្វើដំណើរស្របទិសគ្នានិងកង់បីពីត្បូងទៅជើងចំពីមុខពេញទំហឹងរងការខូចខាតយ៉ាងដំណំហើយរថយន្តបង្កបានរេចង្កូតទៅបុកកៀបជាប់ជាមួយនិងរថយន្តម៉ាកLEXUS RX 450h ពណ៌សពាក់ស្លាកលេខ ភ្នំពេញ 2AG-7853 ធ្វើដំណើរស្របទិសជាមួយនិងរថយន្តបង្កខូចខាតមួយជំហៀងផ្នែកខាងឆ្វេង ក្នុងហេតុការណ៍ខាងលើបណ្តាលឲ្យបុរសជាម្ចាស់កង់បីរងរបួសធ្ងន់ត្រូវបានរថយន្តសាមុយបង្អែកពោធិ៍ចិនតុងដឹកយកទៅសង្រ្គោះនៅមន្ទីរពេទ្យលោកសង្ឃភ្លាមៗចំណែកតៃកុងជនជាតិចិនបង្កត្រូវសមត្ថកិច្ចឃាត់ខ្លួនយកទៅសួរនាំ។
បន្ទាប់ពីកើតហេតុសមត្ថកិច្ចមូលដ្ឋានសហការជាមួយនឹងមន្ត្រីជំនាញចរាចរណ៍ចុះមកវាស់វែងយករថយន្តបង្កនិងម៉ូតូកង់បីជនរងគ្រោះរួមទាំងរថយន្ត២គ្រឿងទៀតស្ទូចយកទៅរក្សាទុកនៅការិយាល័យចរាចរណ៍ជំនាញផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំការដោះស្រាយតាមផ្លូវច្បាប់ថ្ងៃក្រោយ៕
ជ្រោយពេជ្រ
