ភ្នំពេញ៖ លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងសហការីទាំងអស់ ពិតជាសោកស្តាយ និងសូមចូលរួមរំលែកទុក្ខយ៉ាងក្រៀមក្រំជាទីបំផុតចំពោះការបាត់បង់យោធិនពលីដ៏អង់អាច សួន រោន ក្នុងហេតុការណ៍ផ្ទុះអាវុធ នៅតំបន់មុំបី ឆងបក នាថ្ងៃទី២៨ ខែឧសភា ឆ្នាំ២០២៥ ស្ថិតនៅក្នុងមូលដ្ឋានខេត្តព្រះវិហារ។
លោក ហ៊ុន ម៉ានី បានគូសបញ្ជាក់យ៉ាងដូច្នេះថា មរណភាពនេះ ជាការបាត់បង់វីរៈយុទ្ធជនដែលបានលះបង់អាយុជីវិតដើម្បីការពារជាតិ មាតុភូមិ និងទឹកដី គួរជាទីគោរព ដែលកើតចេញពីការឈ្លានពានម្តងហើយម្តងទៀត មិនអាចទទួលយកបាន។ យើងមិនចង់មានសង្គ្រាមនោះទេ តែយើងត្រូវការពារប្រទេសជាតិផងឲ្យខាងតែបាន។ យើងខ្ញុំជឿជាក់យ៉ាងមុតមាំថា ភាគីនៃប្រទេសទាំងសងខាង នឹងអនុវត្តអភិក្រមចរចាគ្នាក្នុងស្មារតីសន្តិភាព ដើម្បីប្រទេសជាតិ និងសេចក្តីសុខរបស់ប្រជាជនរបស់យើង។
យើងខ្ញុំ ទាំងអស់គ្នាចងចាំជានិច្ចចំពោះវីរភាពដ៏អង់អាចក្លាហានរបស់លោក សួន រោន ដែលបានលះបង់អាយុជីវិតដើម្បីជាតិ និងមាតុភូមិជាទីស្នេហារបស់យើង ។ យើងខ្ញុំ សូមឧទ្ទិសកុសលដល់ដួងវិញ្ញាណក្ខន្ធរបស់លោកបានយោនយោគទៅកាន់សុគតិភពកុំបីឃ្លៀងឃ្លាតឡើយ៕ដោយ៖តារា
