ខេត្តពោធិ៍សាត់៖ បុរសម្នាក់ត្រូវបានរថយន្តបុកស្លាប់នៅនឹងកន្លែងយ៉ាងអាណោចអាធ័ម ខណៈបុរសរូបនេះកំពុងដើរឆ្លងផ្លូវជាតិលេខ៥ ។

ហេតុការណ៍គ្រោះថ្នាក់ចរាចរណ៍ខាងលើបានកើតឡើងកាលពីរំលងអធ្រាត្រថ្ងៃទី២៧ ខែសីហា ឆ្នាំ២០១៦ នៅលើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ ១៥២-១៥៣ UTM  ១៥៣៣៦-៨៥០៤៩ ស្ថិតក្នុងភូមិសំរោង ឃុំក្បាលត្រាច ស្រុកក្រគរ ខេត្តពោធិ៍សាត់។

ប្រភពព័ត៌មានពីកម្លាំងមូលដ្ឋានកងរាជអាវុធហត្ថស្រុកក្រគរបានឲ្យដឹងថា បុរសរងគ្រោះឈ្មោះ ជូ សៀម អាយុ ៥២ឆ្នាំ បច្ចុប្បន្នរស់នៅភូមិ-ឃុំកើតហេតុ ជនរងគ្រោះមានជំងឺសរសៃប្រសាទ។

ប្រភពបន្តថា នៅក្នុងហេតុការណ៍ខាងលើនេះគ្មានប្រភពណាមួយបញ្ជាក់ថា រថយន្តបង្កជារថយន្តម៉ាកអ្វីនោះទេ ហើយបើកបរក្នុងទិសដៅពីណាទៅណានោះដែរ គ្រាន់តែគេសង្ស័យថា អាចដើរឆ្លងផ្លូវតែក៏មិនដឹងពីណាទៅណានោះ។

ប្រភពដដែលបន្តទៀតថា សាកសពបុរសរងគ្រោះត្រូវបានសមត្តកិច្ចប្រគល់ឲ្យសាច់ញាតិយកទៅចាត់ចែងធ្វើបុណ្យតាមប្រពៃណី៕

ដោយ៖ ប៉ឹម ពិន