អុីស្រាអែលបានចល័តយន្តហោះយោធាជាង 200 គ្រឿងដើម្បីចូលរួមក្នុងយុទ្ធនាការវាយប្រហារអុីរ៉ង់នៅដើមថ្ងៃទី 13 ខែមិថុនា ដោយផ្តោតលើ “បេះដូង” នៃកម្មវិធីនុយក្លេអ៊ែររបស់ប្រទេស។

នៅក្នុងសន្និសីទសារព័ត៌មានមួយ អ្នកនាំពាក្យកងកម្លាំងការពារអុីស្រាអែល (IDF) ឧត្តមសេនីយ៍ទោ Effie Defrin បាននិយាយថា យន្តហោះចម្បាំងសរុបជាង 200 គ្រឿងរបស់ប្រទេសនេះបានធ្វើការវាយប្រហារតាមអាកាសលើប្រទេសអុីរ៉ង់កាលពីព្រឹកមិញ។ យន្តហោះទាំងនេះបានទម្លាក់គ្រាប់បែក និងកាំជ្រួចជាង 330 គ្រាប់លើគោលដៅប្រហែល 100 ក្នុងប្រទេសអុីរ៉ង់។
យោធាអុីស្រាអែលបានបញ្ចេញវីដេអូដែលបង្ហាញពីយន្តហោះចម្បាំងរបស់កងទ័ពអាកាសអុីស្រាអែលដែលត្រៀមវាយប្រហារអុីរ៉ង់នៅព្រឹកនេះ ក៏ដូចជាវីដេអូចុះចតបន្ទាប់ពីការវាយប្រហារ។
លោក Defrin បានសង្កត់ធ្ងន់ថា ការវាយប្រហារតាមអាកាសរបស់អុីស្រាអែល គឺជា “ផ្នែកនៃប្រតិបត្តិការច្បាស់លាស់ និងសម្របសម្រួល” ហើយថា អាកាសយានិករបស់ខ្លួន “នៅតែវាយប្រហារគោលដៅកម្មវិធីយោធា និងនុយក្លេអ៊ែរ នៅទូទាំងតំបន់ផ្សេងៗគ្នានៃប្រទេសអុីរ៉ង់”។
លោកក៏បានអះអាងដែរថា ការវាយប្រហារនេះបានសម្លាប់មន្ត្រីជាន់ខ្ពស់អុីរ៉ង់ជាច្រើននាក់ រួមទាំងប្រធានអគ្គសេនាធិការនៃកងកម្លាំងប្រដាប់អាវុធ Mohammad Bagheri មេបញ្ជាការកងឆ្មាំបដិវត្តន៍អ៊ិស្លាម (IRGC) Hossein Salami និងមេបញ្ជាការនៃបញ្ជាការកណ្តាល Khatam-al Anbiya លោក Gholam Ali Rashid ។ មន្ត្រីអុីរ៉ង់បច្ចុប្បន្ន និងអតីតមន្ត្រីជាច្រើននាក់ទៀតក៏ត្រូវបានសម្លាប់ដែរ។
នៅព្រឹកព្រលឹមថ្ងៃទី 13 ខែមិថុនា អុីស្រាអែលបានបើកការវាយប្រហារតាមអាកាសសំដៅលើហេដ្ឋារចនាសម្ព័ន្ធដែលគេជឿថាគាំទ្រកម្មវិធីនុយក្លេអ៊ែររបស់អុីរ៉ង់ និងសមត្ថភាពមីស៊ីលរយៈចម្ងាយឆ្ងាយ។
យោធាអុីស្រាអែលបានសង្កត់ធ្ងន់ថា “នៅពេលដែលប្រតិបត្តិការនេះត្រូវបានបញ្ចប់ វានឹងមិនមានការគំរាមកំហែងនុយក្លេអ៊ែរពីប្រទេសអុីរ៉ង់ទៀតទេ។ យើងស្ថិតក្នុងដំណាក់កាលយុទ្ធសាស្ត្រ។ យើងបានឈានដល់ចំណុចដែលមិនអាចត្រឡប់វិញបាន ហើយយើងគ្មានជម្រើសអ្វីក្រៅពីធ្វើសកម្មភាពឥឡូវនេះ” ៕ ដោយធីរីណា

រូបថត​: IDF