ភ្នំពេញ ៖សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា បានអំពាវនាវបន្ដអំពាវនាវដល់សមាគមធនាគារ ក៏ដូចជាសមាគមមីក្រូហិរញ្ញវត្ថុធ្វើការខិតខំដើម្បីជួយស្រោចស្រង់បងប្អូនពលករ ដែលវិលត្រឡប់ពីប្រទេសថៃ មកកាន់កម្ពុជាវិញ។
ការអំពាវនាវរបស់សម្ដេចតេជោ ហ៊ុន សែន គឺធ្វើឡើងនៅក្នុងឱកាសថ្លែងសារពិសេសទៅកាន់ជនរួមជាតិក្នុងសម័យប្រជុំពេញអង្គលើកទី៣ ព្រឹទ្ធសភា នីតិកាលទី៥ នៅព្រឹកថ្ងៃទី១៦ ខែមិថុនា ឆ្នាំ២០២៥។
នាឱកាសនោះ សម្ដេចតេជោ ហ៊ុន សែន ក៏បានថ្លែងអំណរគុណដល់សមាគមធនាគារ សមាគមមីក្រូហិរញ្ញវត្ថុ ដែលបានជួយបន្ថូរបន្ថយលើការជំពាក់ធនាគារពីសំណាក់ពលករខ្មែរដែលត្រឡប់មកពីប្រទេសថៃវិញ ដែលអាចទទួលបានការបន្ថូរបន្ថយច្រើន អាចពន្យារពេលក្នុងការបង់ការប្រាក់ ឬមិនបង់ការប្រាក់ក្នុងរយៈពេលណាមួយ តបតាមការអំពាវនាវរបស់សម្ដេចធិបតី ហ៊ុន ម៉ាណែត នាយករដ្ឋមន្រ្ដី នៃកម្ពុជា។
ទន្ទឹមនឹងនោះសម្ដេចតេជោ ហ៊ុន សែន ក៏បន្ដអំពាវនាវឱ្យបងប្អូនខ្មែរពលករដែលកំពុងធ្វើការនៅប្រទេសថៃ វិលត្រឡប់មកកាន់ស្រុកកំណើតវិញ ដោយសម្ដេចគូសបញ្ជាក់ថា យើងមិនអាចរស់នៅទីនោះមួយជីវិតទេ។ នៅពេលរឿងរ៉ាវព្រំដែនមិនទាន់ចប់ ការប្រមាថ ការម៉ាកងាយនឹងមានជាបន្ដ ដូច្នេះបងប្អូនគួរតែត្រូវចាកចេញមុនពេលគេបណ្ដេញចេញ ឬការប្រមាថនិងការរើសអើង។
សម្ដេច ហ៊ុន សែន បានគូសបញ្ជាក់ថា ៖ យើងមិនអាចពឹងពាក់គេពេញមួយជីវិតទេ យើងត្រូវតែមកស្រុកយើងវិញ ។ ថ្លែងសារពិសេសចេញពីសម័យប្រជុំពេញអង្គលើកទី ៣ ព្រឹទ្ធសភា នីតិកាលទី ៥ នៅថ្ងៃទី១៦ មិថុនា សម្ដេច ហ៊ុន សែន ប្រធានព្រឹទ្ធសភា នៅតែបន្តអំពាវនាវឱ្យពលរដ្ឋខ្មែរ វិលត្រឡប់មកកម្ពុជា មុនពេលអាជ្ញាធរថៃ បណ្ដេញចេញដោយការប្រមាថ។ សម្ដេច ក៏ស្នើឱ្យស្ថានទូតខ្មែរ និងកុងស៊ុលប្រចាំប្រទេសថៃ រួមទាំងស្ថាប័នពាក់ព័ន្ធសម្របសម្រួលឱ្យពលរដ្ឋខ្មែរមកកម្ពុជាវិញ បើទោះជាពួកគេគ្មានលិខិតឯកសារត្រឹមត្រូវក្តី ៕
ដោយ ៖ សិលា
