ខេត្តមណ្ឌលគិរី៖ ពលរដ្ឋជនជាតិដើមភាគតិចព្នង នៅខេត្តមណ្ឌលគិរី ប្រកបរបរកសិកម្ម ឯខ្លះផ្សេងទៀតក៏ឆ្លៀតចិញ្ចឹមជ្រូកគោមាន់ទាតាមបែបលក្ខណៈគ្រួសារតាមលំនៅឋានរៀងៗខ្លួន ដើម្បីរកប្រាក់ចំណូលបន្ថែមទៀត។ ប៉ុន្តែអ្វីជាការកត់សម្គាល់ គេសង្កេតឃើញពលរដ្ឋមួយចំនួនបាននាំគ្នាចិញ្ចឹមជ្រូកកណ្តុរ តាមបែបលក្ខណៈធម្មជាតិ ដោយធន់នឹងជំងឺឈឺថ្កាត់។
បើតាមការបញ្ជាក់ពីប្រជាកសិករឈ្មោះ សុខុន ត្រើន អាយុ ២៨ ឆ្នាំ និងប្រពន្ធឈ្មោះ អា ស្រីទៀង អាយុ ២៣ ឆ្នាំជាជនជាតិដើមភាគព្នង ដែលមានទីលំនៅបច្ចុប្បន្នស្ថិតក្នុងភូមិពូតាំង សង្កាត់រមនាក្រុងសែនមនោរម្យខេត្តមណ្ឌលគិរី បានរៀបរាប់ថា៖ ក្រោយរៀបការអស់រយៈពេល ៨ ឆ្នាំ គ្រួសាររបស់លោកគ្មានមុខរបរអ្វី ក្រៅពីធ្វើស្រែចម្ការ និងឆ្លៀតចិញ្ចឹមជ្រូកតពីឪពុកម្តាយ។
ប្រជាកសិកររូបនេះ បន្តថា សព្វថ្ងៃលោកបានចិញ្ចឹមជ្រូកកណ្តុរចំនួន ៩ ក្បាលហើយអាចរកប្រាក់ចំណូលបានគួរសម សម្រាប់ដោះស្រាយជីវភាពគ្រួសារ។ ការចិញ្ចឹមជ្រូក កណ្ដុរ តាមបែបលក្ខណៈប្រពៃណី កសិករឈ្មោះ សុខុន ត្រើន ប្រាប់ថាគឺលែងតាមវាលខ្នងភ្នំតាមបែបធម្មជាតិគឺមិនលំបាកក្នុងការថែទាំ និងដាក់ចំណីច្រើន ហើយពេលដែលធំធាត់ល្មមអាច ចាប់លក់បានតម្លៃថ្លៃគួរសមដែរគឺមួយក្បាលចាប់ពី ២៥០ ០០០ រៀលឡើទៅ ខណៈជ្រូកធម្មតាលក់បានត្រឹមតែ ២០០ ០០០ រៀលប៉ុណ្ណោះ។
«ការចិញ្ចឹមជ្រូកកណ្ដុរតាមបែបលក្ខណៈប្រពៃណី មិនលំបាកក្នុងការចិញ្ចឹមនោះទេ ព្រឹកឡើងត្រូវលែងវាឲ្យស៊ីចំណីតាមបែបធម្មជាតិ ឲ្យវាស៊ីចំណីពេលថ្ងៃត្រង់ម្តង ហើយពេលល្ងាចឲ្យដាក់ចំណីឲ្យវាសុីម្តងទៀតទើបគៀងចូលក្នុងទ្រុង»។
លោក សុខុន ត្រើន បានប្រាប់បន្ថែមថា លក្ខណៈពិសេសដែលលក់បានតម្លៃជាងនេះ ដោយសារជ្រូកកណ្តុរមានសាច់ច្រើនមិនសូវមានខ្លាញ់ដូចជ្រូកធម្មតា និយាយជារួមគឺមានរសជាតិឆ្ងាញ់ដែលគេនិយមទិញទៅបរិភោគ ពិសេសរដូវបុណ្យទាន គឺឈ្មួញតែងតែប្រមូលទិញស្ទើរគ្មានសល់ទាំងតូចទាំងធំ៕
ដោយ៖តារា
