ខេត្តកំពង់ស្ពឺ ៖ ទទួលបានព័ត៌មានមូលដ្ឋានគួរទុកចិត្ត និងគោលការណ៍ដឹកនាំបញ្ជាពី លោកឧត្ដមសេនីយ៍ទោ ឃឹម សុកខៃ ស្នងការ នគរបាលខេត្ដកំពង់ស្ពឺ កំលាំងនគរបាលផ្នែកប្រឆាំងគ្រឿងញៀន ស្រុកសាមគ្គីមុនី ជ័យ ដឹកនាំប្រតិបត្ដិការដោយផ្ទាល់ពីលោកវរសេនីយ៍ឯក ខឹម សាម៉ុន អធិការនគរបាលស្រុក និងបានកិច្ច សហការពីកំលាំងមូលដ្ឋានសម្ងាត់ នៅថ្ងៃសៅរ៍ ១១រោច ខែជេស្ឋ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី២១ ខែមិថុនា ឆ្នាំ២០២៥ នៅចំណុចខាងជេីងភូមិត្រពាំងធំ ឃុំយុទ្ធសាមគ្គី ស្រុកសាមគ្គីមុនីជ័យ កំលាំងឃាត់មុខសញ្ញាសង្ស័យម្នាក់ឈ្មោះ ភឿន រ៉ាម ភេទប្រុស អាយុ ២៣ឆ្នាំ រស់នៅភូមិទឹកឬស្សី ឃុំមានជ័យ ស្រុកសាមគ្គីមុនីជ័យ និងឆែកឆេររកឃេីញម្សៅក្រាមពណ៌សសង្ស័យជាគ្រឿងញៀនចំនួន០១កញ្ចប់, ទូរស័ព្ទដៃចំនួន០១គ្រឿង, ឧបករណ៍កែច្នៃសំរាប់ប្រេីប្រាស់គ្រឿងញៀនមួយចំនួន ។
ក្រោយសាកសួរជនសង្ស័យខាងលេីបានឆ្លេីយថាខ្លួនទិញពីឈ្មោះ ចន្ថា ធូ ភេទប្រុស រស់នៅភូមិទំនប់អង្គ និងឈ្មោះ ភីរម្យ ភេទប្រុស អាយុ ៤៥ឆ្នាំ រស់នៅភូមិស្មិត ឃុំមានជ័យ ស្រុកសាមគ្គីមុនីជ័យ ។ ដោយបាន ការសម្របសម្រួលនីតិវិធី សមត្ថកិច្ចបន្ដអនុវត្ដនិងឃាត់មុខសញ្ញាសង្ស័យបាន០២នាក់បន្ថែម ១.ឈ្មោះ ចន្ថា ធូ ២.ឈ្មោះ ភី រម្យ ឆែកឆេររកឃេីញម្សៅក្រាមពណ៌សថ្លាសង្ស័យជាគ្រឿងញៀន១៩កញ្ចប់(១១ធំ,៤ មធ្យម ,៤ តូច), ជញ្ជីងអេឡិចត្រូនិចសំរាប់ថ្លឹងគ្រឿងញៀនចំនួន ១គ្រឿង, ទូរស័ព្ទដៃចំនួន០២គ្រឿង, វិក័យបត្រវេរប្រាក់ (…. ចំនួន ១០ សន្លឹក), លោហៈធាតុពណ៌ទង់ដែង (ខ្សែក)ចំនួន០១ខ្សែ, ថង់សំរាប់ច្រកគ្រឿងញៀនមួយ ចំនួន,ឧបករណ៍កែច្នៃសំរាប់ប្រេីប្រាស់គ្រឿងញៀនមួយចំនួន, ម៉ូតូ០១គ្រឿងHONDAពណ៍ខ្មៅពាក់ផ្លាកលេខ ភ្នំពេញ 1BM.2552 125cc ។
បច្ចុប្បន្នសមត្ថកិច្ចកំពុងបន្ដនីតិវិធី និងសាកសួរជុំវិញសកម្មភាពពទទួលនិងចែកចាយគ្រឿងញៀនពីប្រភព ផ្សេងៗទៀត និងបានកសាងសំណុំរឿងញ្ជូនទៅស្នងការដ្ឋាននគរបាលខេត្ដកំពង់ស្ពឺ ចាត់ការនីតិវិធីបន្ដ៕
