ភ្នំពេញ៖ បុរសម្នាក់ជិះម៉ូតូឆ្លងផ្លូវកាត់ទទឹងថ្នល់ខ្វះការប្រុងប្រយ័ត្ន ក៏ត្រូវរថយន្តស៊េរីទំនើប Ford Ranger បេីកជ្រុលទៅបុកបណ្ដាលឲ្យបុរសជាអ្នកជិះម៉ូតូរងរបួសធ្ងន់ហេីយបានស្លាប់ពេលបញ្ជូនទៅសង្គ្រោះនៅមន្ទីរពេទ្យ ។
ហេតុការណ៍នេះបានកើតឡើងនៅវេលាម៉ោង១១និង៣០នាទីយប់ថ្ងៃទី៣០ ខែមិថុនា ឆ្នាំ២០២៥ ត្រង់ចំណុចភ្លើងស្តុបស្ថានទូតចិន ផ្លូវម៉ៅសេទុង កែងផ្លូវលេខ១៧៣ សសង្កាត់ទួលស្វាយព្រៃទី១ ខណ្ឌបឹងកេងកង ។
សពជនរងគ្រោះមានឈ្មោះ ហេង គឹមហួយ ភេទប្រុស អាយុ២២ឆ្នាំ មុខរបរ បុគ្គលិកក្រុមហ៊ុនឯកជន ស្នាក់នៅម្ដុំផ្សារដេីមគ ខណ្ឌទួលគោក រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកេីតហេតុគេបានឃើញបុរសម្នាក់បានជិះម៉ូតូម៉ាក ហុងដាឃ្លីក ពាក់ស្លាកលេខភ្នំពេញ 1CM-4751ធ្វើដំណើរតាមបណ្ដោយផ្លូវលេខ១៧៣ក្នុងទិសដៅពីកេីតទៅលិចឆ្លងផ្លូវបំបែកជាបួន លុះមកដល់ចំណុចកេីតហេតុក៏ស្រាប់តែមានបុរសម្នាក់បានបេីករថយន្តម៉ាក Ford Ranger ពណ៌ស ពាក់ស្លាកលេខ កម្ពុជាN.P.0117 បេីកបោះពួយតាមបណ្ដោយផ្លូវម៉ៅសេទុងក្នុងទិសដៅពីត្បូងទៅជើងដោយល្បឿនលឿនខ្វះការប្រុងប្រយ័ត្នក៏ជ្រុលទៅបុកម៉ូតូយ៉ាងពេញទំហឹងបណ្ដាលឲ្យអូសខ្ទាតជាច្រើនម៉ែត្រ ធ្វើឱ្យអ្នកបើកម៉ូតូរងរបួសធ្ងន់ ហេីយបានស្លាប់ពេលបញ្ជូនទៅសង្គ្រោះនៅមន្ទីរពេទ្យរុស្ស៊ី ។ ដោយឡែករថយន្តបានរងការខូចខាតផ្នែកខាងមុខតិចតួច ហើយអ្នកបេីកបរត្រូវសមត្ថកិច្ចឃាត់ខ្លួនទុកប្រគល់អោយផ្នែកជំនាញចរាចរណ៍បន្តនីតិវិធី ។
ក្រោយកេីតហេតុ សពត្រូវបានសមត្ថកិច្ចប្រគល់អោយសាច់ញាតិយកទៅចាត់ចែងធ្វើបុណ្យតាមប្រពៃណី។ ចំណែកមធ្យោបាយរួមទាំងអ្នកបេីកបរត្រូវបានសមត្ថកិច្ចមូលដ្ឋានប្រគល់អោយផ្នែកជំនាញចរាចរណ៍ក្រុងធ្វើការវាស់វែងយកទៅរក្សាទុកដេីម្បីមានចំណាត់ការតាមនីតិវិធី ៕
ដោយ៖សុខាសែនជ័យ
