អង់គ្លេស បារាំង និងអាល្លឺម៉ង់បានថ្កោលទោសការគំរាមកំហែងប្រឆាំងនឹងអគ្គនាយក IAEA លោក Rafael Grossi បន្ទាប់ពីកាសែត Kayhan របស់អុីរ៉ង់បាននិយាយថា គាត់គួរតែត្រូវបានកាត់ទោសនិងប្រហារជីវិតពីបទចារកម្មសម្រាប់អុីស្រាអែល។

ក្រសួងការបរទេសនៃប្រទេសទាំងបីបានសង្កត់ធ្ងន់នៅក្នុងសេចក្តីថ្លែងការណ៍មួយកាលពីថ្ងៃទី 30 ខែមិថុនាថា “ប្រទេសបារាំង អាល្លឺម៉ង់ និងចក្រភពអង់គ្លេសថ្កោលទោសការគំរាមកំហែងប្រឆាំងនឹងអគ្គនាយកនៃទីភ្នាក់ងារថាមពលបរមាណូអន្តរជាតិ (IAEA) លោក Rafael Grossi និងបញ្ជាក់ជាថ្មីនូវការគាំទ្រពេញលេញរបស់យើងចំពោះទីភ្នាក់ងារ និងប្រមុខរបស់ខ្លួនក្នុងការអនុវត្តអាណត្តិរបស់ពួកគេ” ។
សេចក្តីថ្លែងការណ៍បានបន្ថែមថា “យើងអំពាវនាវឱ្យអាជ្ញាធរអុីរ៉ង់បដិសេធរាល់សកម្មភាពដើម្បីបញ្ឈប់កិច្ចសហប្រតិបត្តិការជាមួយ IAEA ។ យើងអំពាវនាវឱ្យអុីរ៉ង់ចាប់ផ្តើមឡើងវិញជាបន្ទាន់នូវកិច្ចសហប្រតិបត្តិការពេញលេញស្របតាមកាតព្វកិច្ចស្របច្បាប់របស់ខ្លួន និងចាត់វិធានការចាំបាច់ទាំងអស់ដើម្បីធានាសុវត្ថិភាព និងសន្តិសុខរបស់បុគ្គលិក IAEA” ។
សេចក្តីថ្លែងការណ៍នេះមិនបានបញ្ជាក់ពីអ្វីដែលត្រូវបានគំរាមកំហែងប្រឆាំងនឹង Grossi នោះទេ ប៉ុន្តែការផ្លាស់ប្តូរនេះបានធ្វើឡើងតាមរបាយការណ៍មួយនៅក្នុងកាសែតអុីរ៉ង់ Kayhan ដែលត្រូវបានគេជឿថាមានទំនាក់ទំនងជិតស្និទ្ធជាមួយមេដឹកនាំកំពូល Ayatollah Ali Khamenei ។
កាសែតនេះបានចោទប្រកាន់ថា Grossi មានទំនាក់ទំនងជាមួយទីភ្នាក់ងារស៊ើបការណ៍សម្ងាត់ Mossad របស់អុីស្រាអែល ហើយថាប្រសិនបើអគ្គនាយក IAEA ចូលទៅកាន់ប្រទេសអុីរ៉ង់ គាត់គួរតែត្រូវបានកាត់ទោសប្រហារជីវិត។
Grossi ខ្លួនគាត់មិនបានឆ្លើយតបដោយផ្ទាល់ទៅនឹងការចោទប្រកាន់របស់កាសែតនោះទេ។ ផ្ទុយទៅវិញ លោកបានសង្កត់ធ្ងន់ថា អាទិភាពកំពូលគឺត្រូវធានាថា អ្នកត្រួតពិនិត្យ IAEA អាចត្រឡប់ទៅទីតាំងនុយក្លេអ៊ែររបស់អុីរ៉ង់វិញឱ្យបានឆាប់តាមដែលអាចធ្វើទៅបាន។
មន្ត្រីអុីរ៉ង់មិនបានបញ្ជាក់ជាសាធារណៈអំពីរបាយការណ៍នេះទេ។ ឯកអគ្គរដ្ឋទូតអុីរ៉ង់ប្រចាំអង្គការសហប្រជាជាតិ លោក Amir Saeid Iravani បានបដិសេធថា មិនមានការគំរាមកំហែងណាមួយប្រឆាំងនឹង Grossi នោះទេ។
ប្រធានាធិបតីអុីរ៉ង់លោក Masoud Pezeshkian បានប្រាប់ប្រធានាធិបតីបារាំងលោក Emmanuel Macron ក្នុងការហៅទូរស័ព្ទកាលពីថ្ងៃទី 30 ខែមិថុនាថា “ស្តង់ដារទ្វេ” របស់ IAEA បានបង្កើតបញ្ហាសម្រាប់សន្តិសុខក្នុងតំបន់ និងពិភពលោក នេះបើយោងតាមប្រព័ន្ធផ្សព្វផ្សាយរដ្ឋអុីរ៉ង់៕ ដោយធីរីណា

រូបថត​: Reuters