ខេត្តពោធិ៍សាត់៖ កម្លាំងសមត្តកិច្ចនគរបាលស្រុកភ្នំក្រវាញ ស្ទាក់ឃាត់ខ្លួនមុខសញ្ញាចោរលួចម៉ូតូបានភ្លាមៗរួមទាំងវត្ថុតាង ខណៈជនសង្ស័យរូបនេះបានលួចម៉ូតូតាអាចារ្យវត្តបានដោយសុវត្ថិភាព ហើយព្យាយាមជិះគេចខ្លួនតែអស់ល័ក្ខគេចមិនរួចពីសំណាញ់សមត្ថកិច្ច។
ការឃាត់ខ្លួនខាងលើនេះធ្វើឡើងកាលពីវេលាម៉ោង១និង៤៥នាទីរសៀលថ្ងៃទី២៩ ខែសីហា ឆ្នាំ២០១៦ ត្រង់ចំណុចផ្លូវបំបែកសាងម៉ាង ស្ថិតក្នុងភូមិសំរោង១ ឃុំសំរោង ស្រុកភ្នំក្រវាញ ខេត្តពោធិ៍សាត់។
នគរបាលស្រុកភ្នំក្រវាញបានឲ្យដឹងថា ជនសង្ស័យជាចោរលួចម៉ូតូត្រូវបានកម្លាំងឃាត់ខ្លួនឈ្មោះ ហែម សុភ័ក្រ ភេទប្រុស អាយុ២៦ឆ្នាំ បច្ចុប្បន្នរស់នៅភូមិ-ឃុំស្នឹង ស្រុកបាណន់ ខេត្តបាត់ដំបង។
ប្រភពព័ត៌មានពីសមត្តកិច្ចឲ្យដឹងថា នៅក្នុងកិច្ចប្រតិបត្តិការនេះកម្លាំងបានចាប់យកម៉ូតូ១គ្រឿងផងដែរ ម៉ាកហុងដាឌ្រីម សេ១២៥ សេរីឆ្នាំ២០១៦ ពណ៌ខ្មៅ ពាក់ស្លាកលេខ ពោធិ៍សាត់ 1A-5574 ជាកម្មសិទ្ធរបស់ឈ្មោះ នាង ផាត ភេទប្រុស អាយុ៤៤ឆ្នាំ រស់នៅភូមិថ្លុកដង្កោ ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ (ជាតាអាចារ្យ-វត្តថ្លុកដង្កោ) ។
ប្រភពបន្តថា មុនកើតហេតុនៅវេលាម៉ោង១២និង២១នាទីថ្ងៃត្រង់គាត់បានជិះម៉ូតូទៅវត្តថ្លុកដង្កោ ខណៈនោះគាត់បានចតម៉ូតូនៅមុខកុដលោក ដោយមិនបានដកកូនសោរពីម៉ូតូនោះទេ ភ្លាមនោះក្រលេខរកម៉ូតូបាត់ស្រម៉ោលឈឹង ទើបរាយការណ៍ប្រាប់សមត្តកិច្ចភ្លាមៗក៏ត្រូវចាប់បានភ្លាមៗតែម្តង។
ប្រភពដដែលបន្តទៀតថា ក្រោយកម្លាំងស្ទាក់ឃាត់ខ្លួនបានយកមកសួរនាំទើបដឹងថា ជននេះជាមុខសញ្ញាចោរកម្មយ៉ាងសកម្ម រកឃើញឯកសារពាក់ព័ន្ធជាច្រើនរួមទាំងឧបករណ៍ធ្វើសកម្មភាពកាច់សោ.កម៉ូតូផងដែរ ហើយជននេះបានធ្វើសកម្មភាពលួចម៉ូតូគេ១គ្រឿងផងដែរកាលពីថ្ងៃទី១៧ កន្លងមកថ្មីៗនេះ។
ប្រភពបញ្ជាក់បន្ថែមទៀតថា ករណីនេះវត្ថុតាងម៉ូតូបានប្រគល់ឲ្យម្ចាស់វិញ ដោយឡែកជនសង្ស័យជាមុខសញ្ញាចោរកម្មយ៉ាងសកម្ម (ហែម សុភ័ក្រ) មន្រ្តីជំនាញកំពុងបំពេញនីតិវិធីដើម្បីបញ្ជូនខ្លួនគេទៅស្នងការដ្ឋាននគរបាលខេត្តចាត់ការបន្ត៕
ដោយ៖ ប៉ឹម ពិន
