មហាសេដ្ឋីជនជាតិចិនពីរនាក់គឺលោកស្រី Zhong Huijuan និង Zhou Qunfei ស្ថិតក្នុងចំណោមមហាសេដ្ឋីស្រីដែលកើតឡើងដោយការរកស៉ីខ្លួនឯងកំពូលទាំងប្រាំនៅលើពិភពលោកក្នុងឆ្នាំនេះ។
មហាសេដ្ឋីឱសថ Zhong Huijuan អាយុ 64 ឆ្នាំគឺជាមហាសេដ្ឋីនៅអាស៊ីដែលមានទ្រព្យសម្បត្តិសុទ្ធចំនួន 15.6 ពាន់លានដុល្លារនេះបើយោងតាមរបាយការណ៍ថ្មីៗនេះដោយទស្សនាវដ្តីអាមេរិក Forbes ដោយប្រើទិន្នន័យគិតត្រឹមថ្ងៃទី 13 ខែមិថុនា។
លោកស្រីជាប់ចំណាត់ថ្នាក់លេខ 3 ក្នុងបញ្ជីនៅពីក្រោយមហាសេដ្ឋីពីររូបមកពីប្រទេសស្វីស និងសហរដ្ឋអាមេរិក។ លោកស្រីបម្រើការជាប្រធាន និងជានាយកប្រតិបត្តិនៃក្រុមហ៊ុន Hansoh Pharmaceutical Group ដែលជាក្រុមហ៊ុនចិនផលិតថ្នាំសម្រាប់ជំងឺមហារីក ជំងឺផ្លូវចិត្ត ជំងឺទឹកនោមផ្អែម និងលក្ខខណ្ឌផ្សេងៗទៀត។
ប្តីរបស់លោកស្រីឈ្មោះ Sun Piaoyang គឺជាមហាសេដ្ឋីផ្នែកឱសថមួយផ្សេងទៀត និងជាប្រធានក្រុមហ៊ុន Jiangsu Hengrui Medicine ដែលបានចុះបញ្ជីនៅក្នុងផ្សារហ៊ុន Shanghai ។ កូនស្រីរបស់ពួកគេឈ្មោះ Sun Yuan កាន់តំណែងជានាយកប្រតិបត្តិនៅ Hansoh ។
លោកស្រី Zhong មានសញ្ញាប័ត្រគីមីវិទ្យាពីសាកលវិទ្យាល័យ Jiangsu Normal ហើយបានបង្រៀនមុខវិជ្ជារបស់នាងនៅសាលាមធ្យមសិក្សា Lianyungang បន្ទាប់ពីបញ្ចប់ការសិក្សា។ នៅអាយុ 34 ឆ្នាំ នាងបានឈប់បង្រៀន ហើយបានបង្កើត Jiangsu Hansoh Pharmaceutical ជាមួយនឹងបុគ្គលិក 10 នាក់ នេះបើយោងតាម South China Morning Post ។
ចំណែកលោកស្រីZhou Qunfei អាយុ 55 ឆ្នាំ នៅទីក្រុងហុងកុងបានជាប់ចំណាត់ថ្នាក់ទី 4 ជាមួយនឹងទ្រព្យសម្បត្តិសុទ្ធចំនួន $ 10 ពាន់លានដុល្លារ។
លោកស្រីគឺជាប្រធាននៃក្រុមហ៊ុន Lens Technology ដែលជាក្រុមហ៊ុនផលិតអេក្រង់ប៉ះដែលបម្រើអតិថិជនដូចជា Apple, Samsung និង Huawei ។ ក្រុមហ៊ុនក៏ផ្តល់គ្រឿងបន្លាស់ដល់ក្រុមហ៊ុនផលិតរថយន្តអគ្គិសនី រួមទាំង Tesla និង BYD ផងដែរ។ ចាប់ផ្ដើមជាកម្មកររោងចក្រចំណាកស្រុកវ័យជំទង់ លោកស្រី Zhou បានក្លាយជាស្ត្រីដែលរកស៉ីជោគជ័យដោយខ្លួនឯងមានបំផុតក្នុងពិភពលោក។
ក្នុងឆ្នាំ 1993 លោកស្រី Zhou បានចាប់ផ្តើមដំណើរអាជីវកម្មរបស់លោកស្រីដោយបង្កើតអាជីវកម្មគ្រឿងបន្លាស់នាឡិកាជាមួយសាច់ញាតិនៅក្នុងផ្ទះល្វែងមួយនៅទីក្រុង Shenzhen ដែលបានបង្កើតមូលដ្ឋានគ្រឹះសម្រាប់ Lens Technology ។ ស្ត្រីដែលមានទ្រព្យសម្បត្តិច្រើនជាងគេបំផុតនៅលើពិភពលោកគឺ Rafaela Aponte-Diamant មកពីប្រទេសស្វីស ជាមួយនឹងទ្រព្យសម្បត្តិ 38.8 ពាន់លានដុល្លារ។
ប្រភពនៃទ្រព្យសម្បត្តិរបស់ស្រ្តីអាយុ 80 ឆ្នាំភាគច្រើនបានមកពីឧស្សាហកម្មដឹកជញ្ជូន។ លោកស្រី និងស្វាមីរបស់គាត់ជាម្ចាស់ MSC ដែលជាបណ្តាញដឹកជញ្ជូនដ៏ធំបំផុតរបស់ពិភពលោក។ ចំណាត់ថ្នាក់ទី២ គឺជនជាតិអាមេរិក Diane Hendricks អាយុ ៧៨ ឆ្នាំ មានទ្រព្យសម្បត្តិ ២២,៣ ពាន់លានដុល្លារ។ លោកស្រីជាម្ចាស់ និងជាប្រធានក្រុមហ៊ុន ABC Supply ដែលជាអ្នកចែកចាយលក់ដុំដ៏ធំបំផុតមួយនៃដំបូល ចំហៀង និងបង្អួចនៅសហរដ្ឋអាមេរិក ដែលជាក្រុមហ៊ុនដែលលោកស្រីសហការបង្កើតជាមួយប្តីចុងរបស់គាត់។
ចំណាត់ថ្នាក់ទីប្រាំគឺ លោកស្រី Denise Coates អាយុ 57 ឆ្នាំដែលមានទ្រព្យសម្បត្តិសុទ្ធចំនួន 8.5 ពាន់លានដុល្លារ។ ស្ត្រីដែលមានមូលដ្ឋាននៅចក្រភពអង់គ្លេសរូបនេះបានប្រភពទ្រព្យសម្បត្តិរបស់លោកស្រីពីក្រុមហ៊ុន Bet365 ដែលជាក្រុមហ៊ុនលេងល្បែងអនឡាញដ៏ធំបំផុតមួយរបស់ពិភពលោក។
