ភ្នំពេញ៖ ក្រោយភាគីកម្ពុជា បានប្រកាសរ៉ាប់រងថ្លៃចំណាយលើការដឹកវត្ថុបុរាណ បន្ទាប់ពីក្រសួងវប្បធម៌ថៃ ប្រកាសថា ខ្លួនសុំពន្យារពេលសិនលើការប្រគល់វត្ថុបុរាណចំនួន២០ដុំ ដោយលើកឡើងពីបញ្ហាខ្វះថវិកានិងភាពតានតឹងនៅព្រំដែនជាមួយកម្ពុជា គិតត្រឹមថ្ងៃទី៨ ខែកក្កដា ឆ្នាំ២០២៥នេះ ភាគីថៃមិនទាន់ឆ្លើយតបអ្វីឡើយ។
គួររម្លឹកថា លោកស្រីផែថងថាន ស៊ីណាវ៉ាត្រ រដ្ឋមន្ត្រីវប្បធម៌ថ្មីរបស់ថៃ កាលពីថ្ងៃសុក្រទី៤ ខែកក្កដា ឆ្នាំ២០២៥ថ្មីៗនេះ បានប្រាប់ទៅក្រុមអ្នកសារព័ត៌មានថា៖ ការប្រគល់វត្ថុបុរាណចំនួន២៣ដុំមកឲ្យកម្ពុជាគឺធ្វើរួចហើយកាលពីឆ្នាំ២០១៥ ប៉ុន្តែវត្ថុបុរាណដែលនៅសេសសល់ចំនួន២០ដុំទៀត ត្រូវផ្អាកប្រគល់សិន។
លោកស្រីលើកឡើងថា «នេះមិនត្រូវបានចាត់ទុកថាជារឿងបន្ទាន់ទេ ហើយក៏មិនអាចផ្តល់មូលនិធិដោយថវិកាកណ្តាលបានដែរ។ សំណើនេះអាចដាក់ជាថ្មីសម្រាប់ការកំណត់ថវិកាថ្នាក់ក្រសួងនិងគណៈរដ្ឋមន្ត្រី ហើយដោយមើលឃើញស្ថានការណ៍បច្ចុប្បន្នរវាងថៃនិងកម្ពុជា ក្រសួងវប្បធម៌សូមផ្តល់អនុសាសន៍ឲ្យពិនិត្យបន្ថែមទៀត»។
ឆ្លើយតបរឿងនេះ លោកស្រី ភឿង សកុណា រដ្ឋមន្ត្រីក្រសួងវប្បធម៌កម្ពុជា បានសរសេរលិខិតជូនលោកស្រី ផែថងថាន ដោយផ្ទាល់ ដោយជម្រាបថា ភាគីកម្ពុជាជាអ្នកចំណាយទាំងអស់លើការដឹកជញ្ជូនវត្ថុបុរាណ។
ទោះបែបនេះក្តី មកដល់ថ្ងៃនេះហើយ លោកស្រី ផែថងថាន មិនទាន់ឆ្លើយតបឬនិយាយអ្វីនោះទេ ជុំវិញការប្រគល់វត្ថុបុរាណដែលនៅសេសសល់មកឲ្យកម្ពុជាវិញ។
គួររម្លឹកផងដែរថា វត្ថុបុរាណចំនួន២០នេះ គឺជាផ្នែកមួយនៃវត្ថុបុរាណសរុប៤៣ដុំ ដែលរត់ពន្ធចេញពីកម្ពុជាដោយខុសច្បាប់ ហើយត្រូវអាជ្ញាធរថៃរឹបអូសបាន។ ក្រោយផ្ទៀងផ្ទាត់ប្រភពដើម នាយកដ្ឋានវិចិត្រសិល្បៈថៃ បានប្រគល់វត្ថុបុរាណចំនួន២៣ដុំមកវិញរួចហើយកាលពីឆ្នាំ២០០៨និង២០១៥។
បន្ទាប់មកទៀត នៅថ្ងៃទី២១ ខែឧសភា ឆ្នាំ២០២៤កន្លងទៅ គណៈរដ្ឋមន្ត្រីថៃ ក្រោមការដឹកនាំរបស់អតីតនាយករដ្ឋមន្ត្រី សេដ្ឋា ថាវីស៊ីន បានអនុម័តជាគោលការណ៍ នូវសំណើរបស់ក្រសួងវប្បធម៌ ដើម្បីប្រគល់វត្ថុបុរាណចំនួន២០ដុំដែលនៅសល់នេះ។ សេចក្តីសម្រេចគឺផ្អែកលើការវាយតម្លៃដោយនាយកដ្ឋានវិចិត្រសិល្បៈ និងអ្នកជំនាញឯករាជ្យដែលបានបញ្ជាក់ថា វត្ថុទាំងនោះគឺពិតជាមានប្រភពដើមពីកម្ពុជាមែន។
តាមការគ្រោងទុក ពិធីប្រគល់-ទទួលវត្ថុបុរាណជាផ្លូវការនឹងប្រព្រឹត្តទៅនៅខែកក្កដា ឆ្នាំ២០២៥នេះក្នុងទីក្រុងបាងកក ប្រទេសថៃ ហើយវត្ថុបុរាណនឹងមកដល់កម្ពុជានៅខែសីហា៕ដោយ៖តារា
រូបភាព៖ វត្ថុបុរាណរបស់កម្ពុជានៅថៃ (រូបថត៖ PBS)
