តារាចម្រៀងរ៉េបដ៏ល្បីល្បាញលើពិភពលោក  Snoop Dogg បានក្លាយជាសហម្ចាស់ និងអ្នកវិនិយោគនៅ ក្លឹបបាល់ទាត់ Swansea City បន្ទាប់ពីបានកាន់កាប់ភាគហ៊ុនមួយចំនួននៅក្នុងក្លឹបលេងនៅក្របខ័ណ្ឌអង់គ្លេស Championship។

Snoop Dogg គឺជាតារាគំរូដ៏គួរឱ្យភ្ញាក់ផ្អើលមួយនៅពេលដែល Swansea បានដាក់បង្ហាញសម្លៀកបំពាក់របស់ពួកគេសម្រាប់រដូវកាល 2025-26 កាលពីចុងសប្តាហ៍មុន។

ក្លឹប Swans បានប្រកាសថា តារាអាមេរិកវ័យ 53 ឆ្នាំរូបនេះបានដើរតាមវីរបុរសបាល់ទាត់របស់ Real Madrid និងក្រូអាតកីឡាករ Luka Modric ដោយចូលរួមជាសហម្ចាស់ក្លឹបដូចគ្នា។

Swansea បានប្រកាសកាលពីខែមេសាថា Modric ដែលសប្តាហ៍នេះបានចូលរួមជាមួយ AC Milan ជាកីឡាករនោះបានទិញភាគហ៊ុននៅក្នុងក្លឹបបន្ទាប់ពីការកាន់កាប់ដឹកនាំដោយអ្នកជំនួញជនជាតិអាមេរិក Brett Cravatt និង Jason Cohen កាលពីខែវិច្ឆិកាឆ្នាំមុន។

ឥឡូវនេះ Snoop Dogg ដែលមានឈ្មោះពិត Calvin Broadus ដែលមានអ្នកតាមដានប្រព័ន្ធផ្សព្វផ្សាយសង្គមលើសពី 100 លាននាក់បានមកធ្វើជាម្ចាស់ក្លឹបមួយរូបជាមួយនឹងការសន្យាថា “ធ្វើអស់ពីសមត្ថភាពដើម្បីជួយក្លឹប” ។

ម្ចាស់ក្លឹប Swansea បានបញ្ជាក់យ៉ាងច្បាស់ថាពួកគេចង់លើកទម្រង់ក្លឹបក្នុងការប៉ុនប៉ងបង្កើតប្រាក់ចំណូលកាន់តែច្រើន ដែលនឹងអនុញ្ញាតឱ្យពួកគេវិនិយោគប្រាក់បន្ថែមទៀតនៅក្នុងក្រុមក្រោមច្បាប់ប្រាក់ចំណេញ និងនិរន្តរភាព។