ភ្នំពេញ: រថយន្តឃ្លុបដឹកអីវ៉ាន់បេីកបត់ឆ្លងភ្លើងស្តុបឃេីញរថយន្ដកុងតឺន័រចង់បំពានភ្លើងស្តុបដែរបានបេីករថយន្តឈប់ទទឹងផ្លូវ ហេីយចុះមកឈ្លោះប្រកែកគ្នារហូតឈានដល់ប្រេីអំពើហិង្សាដាក់គ្នាទៅវិញទៅមក តែដោយសារខាងភាគីរថយន្តឃ្លុបមានគ្នាច្រើនបានចាប់ក្របួចកអាវគូជម្លោះធ្វើឲ្យដាច់ខ្សែក ក៏ឈ្លោះប្រកែកគ្នារឹតតែខ្លាំងផ្អេីលដល់សមត្ថកិច្ចនគរបាលប៉ុស្តិ៍ចុះជួយអន្តរាគមន៍ភ្លាមៗ ។
ហេតុការណ៍នេះបង្កឲ្យមានការភ្ញាក់ផ្អើលកាលពីម៉ោង៩និង៣០នាទីយប់ថ្ងៃទី២១ ខែកក្កដា ឆ្នាំ២០២៥ នៅតាមបណ្តោយផ្លូវភ្នំពេញ-ហាណូយ ត្រង់ចំណុចភ្លើងស្តុប៩២ ស្ថិតនៅក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ប្រភពព័ត៌មានពីកន្លែងកើតហេតុបាននិយាយឲ្យដឹងថា នៅមុនពេលកេីតហេតុ គេឃើញរថយន្តកូរ៉េប្រភេទឃ្លុបដឹកអីវ៉ាន់ពណ៌ស មិនចាំស្លាកលេខ បានបេីកបរតាមបណ្ដោយផ្លូវភ្នំពេញ-ហាណូយ ក្នុងទិសដៅពីជេីងទៅត្បូង បានបត់ឆ្វេងឆ្លងភ្លើងស្តុប ហេីយពេលកំពុងតែឆ្លងឃេីញរថយន្ដកុងតឺន័រមួយគ្រឿងទៀត ពណ៌ខៀវលាយស ពាក់ស្លាកលេខភ្នំពេញ3A-2937 បម្រុងបេីកឆ្លងភ្លើងស្តុបដែរបែរជារថយន្តឃ្លុបដឹកអីវ៉ាន់ខាងលើបានបេីកបរឈប់ចតនៅកណ្តាលភ្លើងស្តុប បណ្តាលអោយបាំងមិនឲ្យខាងរថយន្តកុងតឺន័របេីកឆ្លងភ្លើងស្តុបរួច ហេីយអ្នកបើកបរបានចុះពីរថយន្តទាំងសងខាងមកឈ្លោះប្រកែកគ្នាទៅវិញទៅមក ដោយខាងរថយន្តឃ្លុបដឹកអីវ៉ាន់មានគ្នា៣នាក់បានចាប់កអាវអ្នកបើករថយន្តកុងតឺន័រ ហេីយខាងរថយន្តកុងតឺន័រទ្រាំមិនបានក៏ចាប់កអាវខាងរថយន្តឃ្លុបដឹកអីវ៉ាន់វិញ ឈានដល់ប្រតាយប្រតប់គ្នាទៅវិញទៅមក បណ្តាលឲ្យខាងរថយន្តឃ្លុបដឹកអីវ៉ាន់ម្នាក់បានដាច់បន្តោងខ្សែក ហេីយឈ្លោះប្រកែកគ្នាពេញផ្លូវផ្អើលដល់កម្លាំងសមត្ថកិច្ចចុះមកអន្តរាគមន៍ភ្លាមៗ ។
ភាគីខាងរថយន្តឃ្លុបបាននិយាយទៅកាន់ខាងរថយន្តកុងតឺន័រថា មិនអញ្ចឹងទេសងខ្សែកអញមក ហើយចុះពីរថយន្ដមកជួយរកមេីលបន្តោងខ្សែកអញអោយឆាប់ ដាច់បន្តោងខ្សែកអញហេីយ! ចំណែកខាងរថយន្តកុងតឺន័របាននិយាយប្រាប់ថា មកចាប់ក្របួចកអាវអញ់មុនហេីយ បែរជាចង់អោយអញជួយរកខ្សែកអោយអញមិនជួយរកមេីល ។ បន្ទាប់មកបងប្អូនប្រជាពលរដ្ឋនៅកន្លែងកេីតហេតុបានទាក់ទងទៅសមត្ថកិច្ចនគរបាលប៉ុស្តិ៍ សង្កាត់ភ្នំពេញថ្មីដេីម្បីចុះមកអន្តរាគមន៍ភ្លាមៗ ហេីយបានសួរនាំទាំងសងខាងតែភាគីខាងសងខាងខាងលើ ចង់ឈ្នះចាញ់គ្នា មិនទទួលកំហុស។ បន្ទាប់មកកម្លាំងសមត្ថកិច្ចនគរបាលប៉ុស្តិ៍បាននាំភាគីទាំងសងខាងយកទៅសួរនាំនៅប៉ុស្តិ៍នគរបាលសង្កាត់ភ្នំពេញថ្មីភ្លាមៗ ។
បន្ទាប់ពីកេីតហេតុសមត្ថកិច្ចនគរបាលប៉ុស្តិ៍បានអប់រំណែនាំភាគីទាំងសងខាង ហេីយធ្វេីកិច្ចសន្យារៀងៗខ្លួននិងអោយត្រឡប់ទៅវិញភ្លាមៗផងដែរ ៕
ដោយ៖ ជ្រោយពេជ្រ
