គ្រោះរញ្ជួយដីកម្រិត ៨ រ៉ិចទ័រ បានវាយប្រហារនៅឆ្នេរសមុទ្រនៃឧបទ្វីប Kamchatka ដែលជំរុញឱ្យប្រទេសរុស្ស៊ី ជប៉ុន ឆ្នេរខាងលិចសហរដ្ឋអាមេរិក និងផ្នែកខ្លះនៃមហាសមុទ្រប៉ាស៊ីហ្វិក ចេញការព្រមានអំពីរលកយក្សស៊ូណាមិជាបន្ទាន់។ នៅព្រឹកថ្ងៃទី 30 ខែកក្កដា ប្រព័ន្ធផ្សព្វផ្សាយរដ្ឋរុស្ស៊ី RT បានរាយការណ៍ថា ការរញ្ជួយដីដ៏ខ្លាំងមួយបានវាយប្រហារនៅឆ្នេរសមុទ្រនៃឧបទ្វីប Kamchatka ដែលជំរុញឱ្យតំបន់ឆ្នេរនៅភាគខាងកើតនៃប្រទេសរុស្ស៊ី ប្រទេសជប៉ុន អាឡាស្កា និងហាវ៉ៃ ត្រូវបានដាក់នៅលើការព្រមានអំពីរលកយក្សស៊ូណាមិ។

យោងតាមវិទ្យាស្ថានភូគព្ភសាស្ត្រនៃបណ្ឌិត្យសភាវិទ្យាសាស្ត្ររុស្ស៊ី ការរញ្ជួយដីត្រូវបានកត់ត្រាដំបូងនៅកម្រិត 7.5 រ៉ិចទ័រ ហើយបានកើតឡើងនៅម៉ោងប្រហែល 11:30 ម៉ោងក្នុងស្រុក ប្រហែល 136 គីឡូម៉ែត្រភាគអាគ្នេយ៍នៃទីក្រុង Petropavlovsk-Kamchatsky ។
ទោះបីជាយ៉ាងណាក៏ដោយ ការស្ទាបស្ទង់ភូមិសាស្ត្រអាមេរិក (USGS) ក្រោយមកបានវាយតម្លៃឡើងវិញ និងបង្កើនកម្រិតនៃការរញ្ជួយដីដល់កម្រិត 8 ដែលបង្ហាញពីទំហំនៃការរញ្ជួយកាន់តែធំ។
សេវាកម្មឆ្លើយតបបន្ទាន់របស់រុស្ស៊ីបានប្រកាសថា “ការព្រមានអំពីរលកយក្សស៊ូណាមិពេញលេញត្រូវបានចេញសម្រាប់តំបន់ឆ្នេរទាំងមូលនៃឆ្នេរសមុទ្រ Avacha!”
ក្រសួងស្ថានការណ៍គ្រាអាសន្នរបស់រុស្ស៊ី (EMERCOM) បាននិយាយថា ការរញ្ជួយនៅតំបន់ខ្លះនៃទីក្រុង Petropavlovsk-Kamchatsky បានឈានដល់កម្រិតទី 8 តាមមាត្រដ្ឋានរញ្ជួយដីរុស្ស៊ី។ ប្រជាពលរដ្ឋរាយការណ៍ថា មានការរង្គោះរង្គើយ៉ាងខ្លាំង សម្ភារក្នុងផ្ទះជាច្រើនបានដួលរលំបណ្តាលឱ្យមានការភ័យស្លន់ស្លោ ។
អភិបាលក្រុង Kamchatka លោក Vladimir Solodov បានបញ្ជាក់ថា នេះគឺជាការរញ្ជួយដីខ្លាំងបំផុតក្នុងរយៈពេលជាច្រើនទសវត្សរ៍។ យោងតាមព័ត៌មានបឋម សាលាមត្តេយ្យក្នុងស្រុកមួយបានរងការខូចខាត ប៉ុន្តែមិនមានអ្នករងរបួសនោះទេ៕

រូបថត​: znews