ភ្នំពេញ៖ លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានចាត់ទុកការចង់ប្ដឹងកម្ពុជាពីសំណាក់ប្រទេសថៃគឺជាការខ្លាចស្រមោលខ្លួនឯងព្រោះប្រទេសនេះកំពុងរងការស្ដីបន្ទោសពីការបង្ករឿង រំលោភច្បាប់អន្តរជាតិ និងបំពានបទឈប់បាញ់។
កាលថ្លែងបែបនេះរបស់លោក ជុំ សុន្ទរី គឺបន្ទាប់ពីអ្នកនាំពាក្យនាយករដ្ឋមន្ត្រីថៃលោក ជីរ៉ាយុ ហួងសាប់ (Jirayu Huangsap) បានឱ្យដឹងនៅថ្ងៃទី៥ ខែសីហា ថានាយករដ្ឋមន្ត្រីថៃបានបញ្ជាឱ្យគណៈរដ្ឋមន្ត្រីរបស់ខ្លួនរៀបចំចំណាត់ការផ្លូវច្បាប់ និងទាមទារសំណងពីកម្ពុជាក្រោយការប្រយុទ្ធគ្នាកាលពីចុងខែកក្កដា។
ថ្លែងក្នុងសន្នីសិទសារព័ត៌មាននៅព្រឹកថ្ងៃទី៦ ខែសីហា ឆ្នាំ២០២៥នេះ លោកអ្នកនាំពាក្យ ជុំ សន្ទរី បានឆ្លើយតបថាចំណាត់ការគឺក្រោមហេតុផលនយោបាយ និងគ្មានមូលដ្ឋានរឹងមាំសម្រាប់ការជឿងជាក់បាននោះទេ។
លោកអ្នកនាំពាក្យរូបនេះ បានគូសបញ្ជាក់យ៉ាងដូច្នេះថា៖ «វិធានការផ្លូវច្បាប់នេះវាបានបង្ហាញឱ្យឃើញថាមានគោលដៅបង្វែរការទិតៀនដែលកំពុងតែកើនឡើងស្ដីពីការខូចខាតរបស់ប្រជាជនស៊ីវិល ការរំលោភបំពានរបស់ថៃលើច្បាប់មនុស្សធម៍អន្តរជាតិ ហើយនឹងការមិនគោរពជាបន្តបន្ទាប់របស់ថៃចំពោះកិច្ចព្រមព្រៀងឈប់បាញ់»។
លោកអ្នកនាំពាក្យ បានបញ្ជាក់ថាជម្លោះប្រដាប់អាវុធរវាងកាលពីចុងខែកក្កដាគឺកើតឡើងពីការឈ្លានពានរបស់ថៃលើទឹកដីកម្ពុជា និងបាញ់ប្រហារមកលើកម្ពុជាមុន ហើយកម្ពុជាគ្រាន់តែការពារខ្លួនតាមសិទ្ធស្របច្បាប់ដែលមានចែងក្នុងធម្មនុញ្ញសហប្រជាជាតិប៉ុណ្ណោះ។ កម្ពុជាមិនដែលយកជនស៊ីវិលជាគោលដៅឡើយដែលខុសពីថៃ ហើយកម្ពុជានៅតែគោរពបទឈប់បាញ់ទោះបីជាប្រទេសថៃបង្កររឿងជាបន្តបន្ទាប់ក្ដី។
ក្នុងជម្លោះប្រដាប់អាវុធ៥ថ្ងៃប្រទេសថៃបានប្រើប្រាស់ការវាយប្រហារមកលើសាលារៀន ភូមិស្រុករបស់ប្រជាជន និងប្រាសាទព្រះវិហារដែលជាបេតិកភ័ណ្ឌពិភពលោក ដោយបានប្រើប្រាស់គ្រាប់បែកទម្លាក់ពីយន្តហោះ គ្រាប់បែកចង្កោម រហូតដល់បាញ់ថ្នាំគីមីពីលើយន្តហោះទៀតផង។ ក្រៅពីនេះបន្ទាប់ពីមានបទឈប់បាញ់យោធាថៃបានចូលមកចាប់ទាហានខ្មែរ២១នាក់នៅព្រំដែនជាំតែ ព្រមទាំងរាយបន្លាលួសលើដីខ្មែរនៅច្រកអានសេះ ខេត្តព្រះវិហារ ដែលជាសកម្មភាពបំពានទាំងច្បាប់អន្តរជាតិ និងបទឈប់បាញ់រវាងប្រទេសទាំងពីរ៕
ដោយ៖តារា
