នៅក្នុងបទសម្ភាសន៍ជាមួយសារព័ត៌មាន Fox News លោកប្រធានាធិបតី Trump បានបង្ហាញថាលោក Xi Jinping បានបញ្ជាក់ថាប្រទេសចិននឹង “អត់ធ្មត់” និងមិនប្រើកម្លាំងដើម្បីវាយប្រហារកោះតៃវ៉ាន់ក្នុងអំឡុងពេលអាណត្តិរបស់គាត់នោះឡើយ។

ទីភ្នាក់ងារព័ត៌មាន Reuters បានរាយការណ៍កាលពីថ្ងៃទី 16 ខែសីហាថា លោកប្រធានាធិបតី Trump បានបង្ហាញថា ប្រធានាធិបតីចិន Xi Jinping បានសន្យាថានឹងមិនចាត់វិធានការយោធាប្រឆាំងនឹងកោះតៃវ៉ាន់រហូតដល់អាណត្តិរបស់លោក Trump បញ្ចប់នៅឆ្នាំ 2028 ។
លោក Trump បាននិយាយនៅក្នុងបទសម្ភាសន៍ជាមួយ Fox News ថា ប្រធានាធិបតី Xi Jinping បានប្រាប់ខ្ញុំថាគាត់នឹងមិនធ្វើដូច្នេះទេនៅពេលខ្ញុំជាប្រធានាធិបតី។ ខ្ញុំបានឆ្លើយតបថាខ្ញុំពេញចិត្តចំពោះវា។
មេដឹកនាំអាមេរិកបានអត្ថាធិប្បាយថា ភាពតានតឹងរវាងចិន នឹងតៃវ៉ាន់ មានភាពស្រដៀងគ្នាជាច្រើនជាមួយសង្គ្រាមរុស្ស៊ី-អ៊ុយក្រែន ប៉ុន្តែលោកបានបញ្ជាក់ថា លោក “មិនជឿថាអាចកើតឡើងនៅពេលគាត់កាន់តំណែងនោះទេ”។
យោងតាមសារព័ត៌មាន Fox News នេះមិនមែនជាលើកទីមួយទេ ដែលលោកប្រធានាធិបតី Trump បានលើកឡើងពីការសន្ទនាឯកជនជាមួយមេដឹកនាំចិន។ កាលពីខែមិថុនា ភាគីទាំងពីរបានហៅទូរស័ព្ទជាផ្លូវការលើកដំបូងក្នុងអំឡុងពេលអាណត្តិទីពីររបស់លោក Trump ។
កាលពីដើមខែមេសា លោកប្រធានាធិបតីក៏បាននិយាយថា លោក Xi បានទូរស័ព្ទទៅលោក ប៉ុន្តែមិនបានបង្ហាញពីពេលវេលាជាក់លាក់នោះទេ។

ប្រទេសចិនបានចាត់ទុកកោះតៃវ៉ាន់ជាផ្នែកមួយដែលមិនអាចបំបែកបាននៃទឹកដីរបស់ខ្លួន ហើយបានប្តេជ្ញាថានឹងបង្រួបបង្រួមវា ទោះបីដោយបង្ខំក៏ដោយ។ ទន្ទឹមនឹងនេះ តៃវ៉ាន់បានបញ្ជាក់ម្តងហើយម្តងទៀតបដិសេធការទាមទារអធិបតេយ្យភាពរបស់ក្រុងប៉េកាំង។
នៅថ្ងៃទី 15 ខែសីហា ស្ថានទូតចិនប្រចាំនៅទីក្រុងវ៉ាស៊ីនតោនក៏បានអះអាងសាជាថ្មីថា បញ្ហាតៃវ៉ាន់គឺជា “សំខាន់បំផុត និងរសើបបំផុត” នៅក្នុងទំនាក់ទំនងទ្វេភាគីអាមេរិក-ចិន។
អ្នកនាំពាក្យស្ថានទូតអាមេរិកលោក Liu Pengyu បានសង្កត់ធ្ងន់ថា សហរដ្ឋអាមេរិកចាំបាច់ត្រូវប្រកាន់ខ្ជាប់នូវគោលការណ៍ “ចិនតែមួយ” និងសេចក្តីថ្លែងការណ៍រួមទាំងបីរបស់សហរដ្ឋអាមេរិក និងចិន ហើយ “ដោះស្រាយបញ្ហាតៃវ៉ាន់យ៉ាងប្រុងប្រយ័ត្ន” ដើម្បីរក្សាសន្តិភាព និងស្ថិរភាពនៅច្រកសមុទ្រតៃវ៉ាន់។
ទោះបីជាសហរដ្ឋអាមេរិកមិនមានទំនាក់ទំនងការទូតជាផ្លូវការជាមួយតៃវ៉ាន់ក៏ដោយ ប៉ុន្តែវាគឺជាដៃគូអន្តរជាតិដ៏សំខាន់បំផុត និងជាប្រភពទិញអាវុធសំខាន់ពីអាមេរិក៕ ដោយធីរីណា

រូបថត​: AP