ខេត្តកំពង់ស្ពឺ៖ ដោយអនុវត្ដតាមការដឹកនាំបញ្ជាពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ នារសៀលថ្ងៃចន្ទ ៩រោច ខែស្រាពណ៍ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី១៨ ខែសីហា ឆ្នាំ ២០២៥ កំលាំងអធិការដ្ឋាននគរបាលស្រុកបសេដ្ឋ លោកវរសេនីយ៍ឯក ចន សុភិត អធិការនគរបាលស្រុកបញ្ជាឱ្យកំលាំងផ្នែកនគរបាលព្រហ្មទណ្ឌស្រុកស្រាវជ្រាវករណីកំហែងយក ដោយជនសង្ស័យជិះកង់មកធាក់ជនរងគ្រោះធ្លាក់ពីលេីម៉ូតូ ម៉ាកហុងដា C125 ពណ៍ខ្មៅ សេរីឆ្នាំ២០២២ ពាក់ផ្លាកលេខកំពង់ស្ពឺ 1V- 0897 រួចយកម៉ូតូជិះរត់គេចភ្លាមៗបន្ទាប់ពីធ្វេីសកម្មភាពរួច ។
បន្ទាប់ពីទទួលបានពាក្យបណ្ដឹងពីជនរងគ្រោះឈ្មោះ អួក សោភ័ណ ភេទប្រុស អាយុ ១៨ឆ្នាំ និងឈ្មោះ សុង ឆៃណាន់ ត្រូវជាបងប្អូនជីដូនមួយនឹងគ្នាកំពុងតែអង្គុយចុចទូរស័ព្ទយ៉ាងញាប់ដៃ ROBLOX & GROW A Garden នៅចំណុចមាត់ស្រះទឹក ស្ថិតក្នុងភូមិព្រៃត្បែង ឃុំពោធិចំរើន ស្រុកបសេដ្ឋ ខេត្តកំពង់ស្ពឺ កាលពីថៃ្ងទី១៧ ខែសីហា ឆ្នាំ២០២៥ ត្រូវចោរលោតធាក់ប្លន់យកម៉ូតូហើយទុកកង់កញ្ចាស់ឱ្យ។
កំលាំងជំនាញបន្ដនីតិវិធីនិងឈានទៅឃាត់ខ្លួនជន
សង្ស័យ៣នាក់ចំណោមបក្ខពួកផ្សេងទៀត៖ ១.ឈ្មោះ ជឿន ផាន់ណា ភេទប្រុស អាយុ២៥ឆ្នាំ ជាជនដៃដល់ធ្វើសកម្មភាពហក់ធាក់ឲ្យម្ចាស់ម៉ូតូធ្លាក់ពីលេីម៉ូតូ,២.ឈ្មោះ កែវ ពិសិដ្ឋ ភេទប្រុស អាយុ ៣៥ឆ្នាំ ជាអ្នកផ្តើមគំនិតក្នុងការប្រព្រឹត្ដបទល្មើសខាងលេី និង៣-ឈ្មោះ ស៊ន ឆានឈុន ភេទប្រុស អាយុ ២៦ឆ្នាំ (សហចារី) ជនសង្ស័យមានទីលំនៅភូមិព្រៃត្បែង ឃុំពោធិចំរើន ស្រុកបសេដ្ឋ ។
ក្រុមជនសង្ស័យបានសារភាពនិងទទួលស្គាល់ថា កង់កញ្ចាស់ ខាងលេីដែលទុកជូនម្ចាស់ម៉ូតូពិតជាកង់របស់ខ្លួនប្រាកដមែន រីឯសកម្មភាពធាក់កំហែងយកម៉ូតូគឺខ្លួននិងបក្ខពួកពិតជាបានរៀបចំផែនការនិងធ្វេីសកមម្មភាពប្រាកដមែន។ ជាក់ស្ដែងជនសង្ស័យទាំង៣នាក់ ត្រូវសមត្ថកិច្ចនគរបាលស្រុកបសេដ្ឋ កសាងសំណុំរឿងបញ្ជូនមកការិយាល័យព្រហ្មទណ្ឌ នៃស្នងការដ្ឋាននគរបាលខេត្ដ ចាត់ការនីតិវិធីបន្ដ៕
