ភ្នំពេញ៖ លោកស្រី ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិកម្ពុជា បានថ្លែងថា កម្ពុជាបានផ្ញើសារដាស់តឿនទៅកាន់ភាគីថៃ គប្បីគោរពឲ្យបានខ្ជាប់ខ្ជួននូវកិច្ចព្រមព្រៀង១៣ចំណុច ដែលបានព្រមព្រៀងគ្នា កាលពីថ្ងៃទី៧ ខែសីហាកន្លងទៅ ក្នុងកិច្ចប្រជុំវិសាមញ្ញ គណៈកម្មាធិការព្រំដែនទូទៅកម្ពុជា និងថៃ (GBC) ដោយត្រូវតែផ្សព្វផ្សាយព័ត៌មានពិតៗ មិនត្រូវផ្សាយព័ត៌មានក្លែងក្លាយ បំភ្លៃ បំភ្លើស នោះឡើយ។
ការថ្លែងបែបនេះរបស់លោកស្រីអ្នកនាំពាក្យរូបនេះ ក្នុងសេចក្តីសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ»
នៅទីស្តីការគណៈរដ្ឋមន្ត្រី, ម៉ោង៧ព្រឹកថ្ងៃទី២១ ខែសីហា ឆ្នាំ២០២៥។
អ្នកនាំពាក្យក្រសួងការពារជាតិកម្ពុជា បានបញ្ជាក់ថា កងទ័ពកម្ពុជា បន្តគោរពយ៉ាងម៉ឺងម៉ាត់នូវកិច្ចព្រមព្រៀងបទឈប់បាញ់ និងបន្តប្រុងប្រយ័ត្នជានិច្ចចំពោះ កិច្ចការពារអធិបតេយ្យ និងបូរណភាពទឹកដីរបស់ខ្លួនជាដាច់ខាត ។
ជាថ្មីម្តងទៀត លោកស្រី ម៉ាលី សុជាតា បានបញ្ជាក់ថា កម្ពុជានៅតែបន្តទទូចឲ្យថៃធ្វើការដោះលែងទាហានខ្មែរទាំង១៨នាក់ ដែលថៃចាប់ទៅមកវិញឲ្យបានឆាប់ៗស្របទៅតាមច្បាប់មនុស្សធម៌អន្តរជាតិ និងការអំពាវនាវរបស់សហគមន៍អន្តរជាតិ និងប្រទេសក្នុងតំបន់ ខណៈក្រុមគ្រួសាររបស់ពួកគេកំពុងទទឹងរងចាំទាំងយប់ទាំងថ្ងៃ ដែលគិតមកដល់ថ្ងៃទី២១ ខែសីហានេះ គឺមានរយៈពេល២៣ថ្ងៃហើយ ក្រោយទាហានថៃ មិនគោរពបទឈប់បាញ់ ដែលចាប់ពួកគេទៅដោយខុសច្បាប់នោះ៕
ដោយ៖តារា
