ភ្នំពេញ ៖ ព្រឹទ្ធសភា នៃព្រះរាជាណាចក្រកម្ពុជា បញ្ជាក់ពីសាកលវិទ្យាល័យ Ramkhamhaeng បានប្រគល់សញ្ញាបត្របណ្ឌិតកិត្តិយសជូន សម្តេច ហ៊ុន សែន អតីតនាយករដ្ឋមន្ត្រីកម្ពុជា តាមរយៈសេចក្តីប្រកាសព័ត៌មាន របស់ខុទ្ទកាល័យ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា សូមគោរពជម្រាបជូនសាធារណជន ទាំងក្នុងនិងក្រៅប្រទេស ឱ្យបានជ្រាបពីលក្ខណៈវិនិច្ឆ័យដែល សាកលវិទ្យាល័យចំនួន ៣ នៅព្រះរាជាណាចក្រថៃ បានប្រើប្រាស់ដើម្បីវាយតម្លៃគុណសម្បត្តិរបស់ សម្តេចតេជោ ហ៊ុន សែន មុននឹងសម្រេចប្រគល់សញ្ញាបត្របណ្ឌិតកិត្តិយសជូនសម្តេចតេជោ ក្នុងនោះទីមួយ ៖

១/. សាកលវិទ្យាល័យ Ramkhamhaeng បានប្រគល់សញ្ញាបត្របណ្ឌិតកិត្តិយសជូន សម្តេច ហ៊ុន សែន អតីតនាយករដ្ឋមន្ត្រីកម្ពុជា កាលពីឆ្នាំ ២០០១ ដើម្បីទទួលស្គាល់ការរួមចំណែករបស់សម្តេចក្នុងការលើក កម្ពស់ទំនាក់ទំនងអ្នកជិតខាងល្អ មិត្តភាព និងកិច្ចសហប្រតិបត្តិការរវាងកម្ពុជា និងថៃ។ លក្ខណៈវិនិច្ឆ័យ សម្រាប់ការប្រគល់សញ្ញាបត្រនេះ គឺផ្អែកលើតួនាទីរបស់សម្តេច ក្នុងការលើកកម្ពស់សន្តិភាព និងស្ថិរភាព នៅក្នុងតំបន់។
មូលហេតុចម្បង សម្រាប់ការប្រគល់សញ្ញាបត្របណ្ឌិតទស្សនវិជ្ជាកិត្តិយស ផ្នែកវិទ្យាសាស្ត្រ នយោបាយក្នុងវិស័យទំនាក់ទំនងអន្តរជាតិ នៅថ្ងៃទី១៥ ខែវិច្ឆិកា ឆ្នាំ២០០១ គឺការទទួលស្គាល់កិច្ចខិតខំ ប្រឹងប្រែងរបស់សម្តេច ហ៊ុន សែន ក្នុងការកែលម្អទំនាក់ទំនងរវាងថៃនិងកម្ពុជាឱ្យកាន់តែប្រសើរ។ សេចក្តីថ្លែងការណ៍ផ្លូវការរបស់សាកលវិទ្យាល័យនៅពេលនោះ បានកោតសរសើរសម្តេច ដែលបានលើកកម្ពស់ សន្តិភាព និងកិច្ចសហប្រតិបត្តិការ ដែលស្របទៅនឹងគោលបំណងទូទៅនៃសញ្ញាបត្របណ្ឌិតកិត្តិយស៖ ការទទួលស្គាល់ឥស្សរជន ដែលបានរួមចំណែកយ៉ាងសំខាន់ និងជាវិជ្ជមានដល់សង្គម មិនថានៅកម្រិតជាតិ ឬអន្តរជាតិទេ។

មូលដ្ឋានសម្រាប់ការប្រគល់សញ្ញាបត្រនេះ គឺជាការវាយតម្លៃលើការរួមចំណែករបស់ សម្តេច ហ៊ុន សែន។ បទប្បញ្ញត្តិរបស់សាកលវិទ្យាល័យចែងថា សញ្ញាបត្រកិត្តិយសគឺសម្រាប់ឥស្សរជន ដែល បានរួមចំណែកយ៉ាងសំខាន់ដល់សង្គម និងដែលប្រកាន់ខ្ជាប់នូវតម្លៃដែលទាក់ទងនឹងសញ្ញាបត្រនេះ។ លក្ខណៈវិនិច្ឆ័យដែលត្រូវបានអនុវត្ត ក៏នឹងរាប់បញ្ចូលការវាយតម្លៃលើសកម្មភាពនិងគោលនយោបាយ របស់សម្តេច ក្នុងនាមជានាយករដ្ឋមន្ត្រីកម្ពុជាផងដែរ ជាពិសេសអ្វីដែលទាក់ទងនឹងការកែលម្អទំនាក់ ទំនងទ្វេភាគីជាមួយប្រទេសថៃ។
សូមបញ្ជាក់ថា ៖ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា នៅយប់ថ្ងៃទី២២ ខែសីហា ឆ្នាំ២០២៥ បានបង្ហោះសារដល់ថៃថា ៖ ខ្ញុំបានបោះវាចោលអស់យូរហើយ វាគ្មានតម្លៃអ្វីដែលខ្ញុំត្រូវរក្សាទុក ! ៕

ដោយ ៖ សិលា