ភ្នំពេញ៖ បើតាមរបាយការណ៍ពីក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា បានបង្ហាញថា ភ្ញៀវទេសចរអន្តរជាតិប្រមាណ ៩០% ចាប់ផ្តើមកក់កន្លែងស្នាក់នៅខេត្តសៀមរាបជាបណ្តើរៗសម្រាប់ដំណើរកម្សាន្តរបស់ពួកគេនៅត្រីមាសទី៤ឆ្នាំ២០២៥ ក្នុងនោះភ្ញៀវទេសចរប្រមាណជាង ៤០% បានកំណត់យករយៈពេលស្នាក់នៅចាប់ពី៣ ទៅ៧យប់។ ទិន្នន័យនេះជាទិន្នន័យវិជ្ជមានដែលភ្ញៀវទេសចរអន្តរជាតិបានកក់កន្លែងស្នាក់នៅខេត្តសៀមរាបតាមប្រព័ន្ធ Booking.com។
បើតាមរបាយការណ៍ ទិន្នន័យនៃការកក់កន្លែងស្នាក់ ពីរសប្តាហ៍ដំបូងនៃខែសីហា លើប្រព័ន្ធBooking.com បានបង្ហាញពីសន្ទស្សន៍វិជ្ជមានសម្រាប់វិស័យទេសចរណ៍នៅខេត្តសៀមរាប។ ក្នុងនោះភ្ញៀវទេសចរភាគច្រើនបានកក់កន្លែងស្នាក់ទុកមុនរយៈពេល ៩១ថ្ងៃ ឬច្រើនជាងនេះ ដែលជាសញ្ញានៃការរៀបចំយ៉ាងហ្មត់ចត់ សម្រាប់ដំណើរកំសាន្តរបស់ពួកគាត់ក្នុងត្រីមាសទី៤ នៃឆ្នាំ២០២៥ ដែលជាអំឡុងពេលសំបូរភ្ញៀវទេសចរអន្តរជាតិ (High Season)។ ហើយការកក់ទុកក្នុងរយៈពេលពី៣១ ទៅ ៩០ថ្ងៃ ឈរលំដាប់ទី២ ដែលស្របតាមនិន្នាការភ្ញៀវទេសចរអញ្ជើញមកទស្សនាព្រឹត្តិការណ៍ សមរាត្រីអង្គរវត្ត (Angkor Wat Equinox) នៅក្នុងខែកញ្ញា។
ជាមួយគ្នានេះ ភ្ញៀវទេសចរជាង៤០%នៃការកក់ កំណត់យករយៈពេលសម្រាប់ការស្នាក់ពី ៣ ទៅ៧យប់។ នេះបញ្ជាក់ថា ភ្ញៀវទេសចរភាគច្រើននឹងចំណាយពេលចាប់ពី ៣យប់ ក្នុងដំណើរកំសាន្តនៅខេត្តសៀមរាប។ ទិន្នន័យនេះបានបង្ហាញពីសក្តានុពល និងបទពិសោធន៍ទេសចរណ៍ដ៏សម្បូរបែប ដែលមាននៅក្នុងខេត្តសៀមរាប។
របាយការណ៍បន្ថែមថា ការកក់កន្លែងស្នាក់នៅខេត្តសៀមរាបលើប្រព័ន្ធ Booking.com ប្រមាណ ៩០% ជាភ្ញៀវទេសចរអន្តរជាតិ។ ក្នុងនោះភ្ញៀវទេសចរពីសហរដ្ឋអាម៉េរិកឈរលំដាប់ទី១ បន្ទាប់មកគឺភ្ញៀវពីប្រទេសបារាំង ចក្រភពអង់គ្លេស និងប្រទេសអាល្លឺម៉ង់។ ភ្ញៀវប្រមាណ ៧០% នៃការកក់ ជាប្រភេទភ្ញៀវធ្វើដំណើរជាដៃគូ។
របាយការណ៍ក៏បានបញ្ជាក់ថា ទិន្នន័យនេះបង្ហាញតែនិន្នាការនៃការកក់ ពីរសប្តាហ៍ដំបូងនៃខែសីហាតែប៉ុណ្ណោះ ហើយទិន្នន័យនេះមិនឆ្លុះបញ្ចាំងពីចំនួនភ្ញៀវទេសចរអន្តរជាតិ អញ្ជើញមកដល់ព្រះរាជាណាចក្រកម្ពុជាបច្ចុប្បន្ននោះទេ៕ដោយ៖តារា
រូបភាព៖ឯកសារ
