គ្រូបង្វឹក Ruben Amorim បាននិយាយកាលពីថ្ងៃអង្គារថា Manchester United មិនទាន់ត្រៀមខ្លួនរួចរាល់ក្នុងការលេងនៅអឺរ៉ុបទេ ហើយត្រូវការពេលវេលាបន្ថែមទៀតដើម្បីកសាងមូលដ្ឋានរឹងមាំដើម្បីប្រកួតប្រជែងក្នុងក្របខ័ណ្ឌ Champions League ។

ក្រុមបិសាចក្រហមMan United ដែលបានបញ្ចប់ក្នុងចំណាត់ថ្នាក់លេខ 15 ក្នុងក្របខ័ណ្ឌ Premier League កាលពីរដូវកាលមុន បានបាត់បង់ឱកាសក្នុងការប្រកួតជម្រុះសម្រាប់ការប្រកួតក្លឹបកំពូលនៅអឺរ៉ុប នៅពេលដែលពួកគេបានចាញ់ក្រុម Tottenham Hotspur ក្នុងការប្រកួតវគ្គផ្តាច់ព្រ័ត្រ Europa League កាលពីខែឧសភា។

Amorim បានប្រាប់អ្នកយកព័ត៌មានមុនការប្រកួត League Cup ជុំទី 2 នៅថ្ងៃពុធនៅទឹកដីក្រុម Grimsby Town ថា “ខ្ញុំគិតថាយើងមិនបានត្រៀមខ្លួនដើម្បីលេងនៅអឺរ៉ុបទេ នោះជាអារម្មណ៍របស់ខ្ញុំ។ ដើម្បីមានការប្រកួតខ្លាំងក្នុង Champions League ហើយបន្ទាប់មកលេង Premier League យើងត្រូវការពេលវេលាដើម្បីអភិវឌ្ឍក្រុម” ។

Man United មិនទាន់ស្គាល់ជ័យជម្នះក្នុងការប្រកួតនៅអង់គ្លេស Premier League ចំនួនពីរលើកដំបូងរបស់ពួកគេក្នុងរដូវកាលនេះ ដោយបានចាញ់ការប្រកួតបើកឆាករបស់ពួកគេ 1-0 នៅលើទឹកដីខ្លួនឯងជាមួយនឹងក្រុម Arsenal មុនពេលប្រកួតស្មើក្នុងលទ្ធផល 1-1 នៅលើទឹកដីក្រុម Fulham កាលពីថ្ងៃអាទិត្យ។

លោក Amorim បានបន្ទោសក្រុមរបស់គាត់ចំពោះការលេងការពារវិញក្រោយនាំមុខលើក្រុម Fulham ដោយសង្កត់ធ្ងន់ថាកីឡាករត្រូវតែកែលម្អលើផ្នត់គំនិតនេះ។