ភ្នំពេញ ៖ បុរស០២នាក់ជិះម៉ូតូតាមផ្លូវ ៦០ម៉ែត្រស្របទិសគ្នានឹងរថយន្តស្ទូចដែលបត់ត្រឡប់ក្រោយមិនប្រយ័ត្នបណ្តាលអោយម៉ូតូជ្រុលទៅបុកពេញទំហឹងធ្វើឱ្យបុរសអ្នកបើកម៉ូតូបាក់កស្លាប់ ចំណែកអ្នកជិះពីក្រោយរងរបួសធ្ងន់ ។ គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោង ០១ និង ៣៣នាទីរសៀលថ្ងៃទី ២៧ ខែសីហា ឆ្នាំ២០២៥ នៅចំណុចក្បែរភ្លើងស្តុបព្រែកហូរ តាមបណ្តោយផ្លូវ ៦០ម៉ែត្រ សង្កាត់ជើងឯក ខណ្ឌដង្កោ រាជធានីភ្នំពេញ ។
តាមប្រភព័ត៌មានពីប្រជាពលរដ្ឋបានអោយដឹងថា មានបុរស០២នាក់ជិះម៉ូតូហុងដាឌ្រីម ស៊េរីឆ្នាំ២០២៥ ពណ៌ខ្មៅ ពាក់ស្លាកលេខ ភ្នំពេញ 1LO-4442 ជិះឌុបគ្នាតាមបណ្តោយផ្លូវ៦០ម៉ែត្រ ស្របគ្នាជាមួយរថយន្តមួយគ្រឿង ប្រភេទស្ទូច មិនចាំស្លាកលេខ ខណៈនោះរថយន្តស្ទូច បានបត់ត្រឡប់ក្រោយបង្កអោយបុរសជាអ្នកបើកម៉ូតូជាន់ហ្វ្រ័ងមិនទាន់ក៏ជ្រុលទៅបុកពីក្រោយផ្នែកខាងឆ្វេងនៃរថយន្តពេញទំហឹង បណ្តាលអោយបុរសជាអ្នកបើកម៉ូតូបាក់កស្លាប់ភ្លាមៗជាប់ជាមួយម៉ូតូ ។ ចំណែកអ្នកអង្គុយខាងក្រោយ រងរបួសធ្ងន់បញ្ជូនទៅសង្គ្រោះនៅមន្ទីរពេទ្យ ។ ស្របពេលនោះ រថយន្តស្ទូចបានបើករត់គេចចេញពីកន្លែងកើតហេតុ បាត់ស្រមោលតែម្តង ។ ភ្លាមៗនោះ ប្រជាពលរដ្ឋក៏ដូចជាសមត្ថកិច្ចបានព្យាយាមទំនាក់ទំនងស្វែងរកសាច់ញ្ញាតិដើម្បីមកទទួលសពយកទៅធ្វើបុណ្យតាមប្រពៃណី ហើយសមត្ថកិច្ចបានធ្វើការវាស់វែងយកម៉ូតូទៅរក្សាទុករង់ចាំដោះស្រាយនៅពេលក្រោយ ។ ចំណែកឯរថយន្តបង្ក សមត្ថកិច្ចកំពុងស្រាវជ្រាវជុំវិញតំបន់កើតហេតុ រកមើលតាមកាំមេរ៉ាសុវត្ថិភាព ដើម្បីចាប់យកជនបង្កមកផ្តន្ទាទោសតាមផ្លូវច្បាប់ ៕ដោយ ៖ ភារ៉ា ដង្កោ
