ខេត្តព្រះវិហារ៖ នារសៀលថ្ងៃទី២៨ ខែសីហា ឆ្នាំ២០២៥ លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជននិងកីឡា បានដឹកនាំប្រតិភូក្រសួងអប់រំ យុវជន និងកីឡា ចុះពិនិត្យកន្លែងស្នាក់នៅរបស់បេក្ខជនប្រឡងសញ្ញាបត្រមធ្យមសិក្សាទុតិយភូមិ នៅអន្តេវាសិកដ្ឋានសាលាគរុកោសល្យខេត្តព្រះវិហារ។
គួរបញ្ជាក់ផងដែរថា សម័យប្រឡង៖ ២៨ សីហា ២០២៥នេះ បេក្ខជនប្រឡងសញ្ញាបត្រមធ្យមសិក្សាទុតិយភូមិ នៅខេត្តព្រះវិហារមានចំនួន ១៩១៣នាក់ ស្រី ១០៨៣នាក់ ដូច្នេះដើម្បីសម្រួលដល់ការធ្វើដំណើររបស់សិស្សានុសិស្ស និងធានាសុខសុវត្ថិភាពជូនសិស្សានុសិស្សអំឡុងពេលប្រឡង ក្រសួងអប់រំ យុវជន និងកីឡា សហការជាមួយមន្ទីរអប់រំ យុវជន និងកីឡាខេត្តព្រះវិហារ អាជ្ញាធរដែនដី បានរៀបចំកន្លែងស្នាក់នៅចំនួន ០១កន្លែងនៅអន្តេវាសិកដ្ឋានសាលាគរុកោសល្យខេត្តព្រះវិហារ ជូនដល់សិស្សានុសិស្ស។ បន្ថែមពីនេះ សម្រាប់សិស្សានុសិស្សប្រឡងសញ្ញាបត្រមធ្យមសិក្សាទុតិយភូមិក្នុងខេត្តព្រះវិហារ ក៏ទទួលបានប្រាក់ឧបត្ថម្ភក្នុងម្នាក់ចំនួន ៥ម៉ឺនរៀល និងមីកញ្ចប់មួយចំនួនផងដែរ។
តាងនាមក្រសួងអប់រំ យុវជន និងកីឡា លោកបណ្ឌិតសភាចារ្យ ឧបនាយករដ្ឋមន្ត្រី សូមជូនពរបេក្ខជនទាំងអស់ឱ្យទទួលបានជោគជ័យក្នុងការប្រឡងខាងមុខនេះ ជាពិសេសគឺទទួលបាននិទ្ទេសល្អៗដែលខ្លួនប្រាថ្នា៕
ដោយ ៖ សិលា
