ភ្នំពេញ ៖ ថ្លែងក្នុងបទសម្ភាស ជាមួយទូរទស្សន៍មហាផ្ទៃនាព្រឹកថ្ងៃទី២៨ ខែសីហា ស្តីពី វឌ្ឍនភាពការងារ ប្រចាំឆមាសទី១ ឆ្នាំ២០២៥ របស់រដ្ឋបាលខេត្តកំពង់ធំ លោក ញឹក បានខេង អភិបាលរងខេត្ត បានឱ្យដឹងថា ក្នុងរយៈពេល៦ខែ ដើមឆ្នាំ២០២៥នេះ ច្រកចេញចូលតែមួយខេត្តកំពង់ធំ បានផ្ដល់សេវាជូនប្រជាពលរដ្ឋជាង១សែនសេវា។
បើតាមលោកអភិបាលរងខេត្ត ក្នុងចំណោមសេវាជាង១សែននោះ អង្គភាពច្រកចេញចូលតែមួយខេត្ត ផ្ដល់បានជាង៣ម៉ឺនសេវា ទទួលបានចំណូលប្រមាណ២៥ម៉ឺនដុល្លារ ការិយាល័យច្រកចេញចូលតែមួយក្រុង ស្រុក ខណ្ឌ ផ្ដល់បានជាង៩ម៉ឺនសេវា បានចំណូលជាង ២ម៉ឺនដុល្លារ និងយន្តការច្រកចេញចូលតែមួយឃុំ សង្កាត់ផ្ដល់បាន១ម៉ឺនសេវា។
លោក ញឹក បានខេង បញ្ជាក់ថា តាមរយៈការខិតខំរបស់មន្ត្រីក្នុងការផ្តល់សេវាសាធារណៈនេះ ឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំ ក៏បានបន្តចាត់មន្ត្រីចុះទៅតាមមូលដ្ឋាន ដើម្បីត្រួតពិនិត្យបន្ថែម នូវចំណុចខ្វះខាតមួយចំនួន ក្នុងន័យធ្វើយ៉ាងណាកែសម្រួលសេវាទាំងនេះ ឱ្យកាន់តែមានភាពងាយស្រួល លឿន និងឆាប់រហ័ស។
ច្រកចេញចូលតែមួយ គឺជាមរតកនៃការសម្រេចចិត្តផ្នែកនយោបាយ របស់រាជរដ្ឋាភិបាល នីតិកាលមុន ក្រោមការដឹកនាំរបស់ សម្ដេចតេជោ ហ៊ុន សែន អតីតនាយករដ្ឋមន្ត្រី ដោយមាន សម្ដេចក្រឡាហោម ស ខេង អតីតឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) ជាសេនាធិការ សម្របសម្រួលលើការងារនេះ។
មកដល់នីតិកាលទី៧ រាជរដ្ឋាភិបាលក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដោយមានឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគ.ជ.អ.ប. ជាសេនាធិការ បានបន្តខិតខំពង្រឹងយន្តការនេះ ដោយដាក់ចេញគោលការណ៍ណែនាំតម្រង់ទិសថ្មីៗបន្ថែមទៀតដើម្បីពង្រឹងគុណភាព និងជម្រើសកាន់តែច្រើន សម្រាប់ការផ្ដល់សេវានៅច្រកចេញចូលតែមួយគ្រប់មូលដ្ឋាន៕
ដោយ ៖ កញ្ញា សេង សុខហ៊ុន មន្ត្រីអ្នកនាំពាក្យក្រសួងមហាផ្ទៃ
