ខេត្តពោធិ៍សាត់ ៖ នាព្រឹកថ្ងៃអង្គរ ២រោច ខែភទ្របទ ឆ្នាំម្សាញ់ សប្គស័ក ព.ស ២៥៦៩ ត្រូវនឹងថ្ងៃទី៩ ខែកញ្ញា ឆ្នាំ២០២៥ នេះ មន្ត្រីជំនាញព្រហ្មទណ្ឌនៃស្នងការដ្ឋាននគរបាលខេត្តពោធិ៍សាត់ បានបញ្ជូនខ្លួនជនសង្ស័យជាឃាត.ក(សម្លាប់ប្រពន្ធ)ទៅសាលាដំបូងខេត្តពោធិ៍សាត់ បន្ទាប់ឪពុករបស់នាងអះអាងប្រាប់សមត្ថកិច្ចថា បានបាត់ខ្លួនកូនស្រីគាត់ចំនួនម្ភៃថ្ងៃមកហើយ ក៍ស្រាប់តែបងប្អូនប្រជាពលរដ្ឋប្រទះឃើញគ្រោងឆ្អឹង នៅព្រៃឬស្សីព្រិចនៃសហគមន៍(ព្រៃឈើ)ក្បែរភូមិមួយ ហើយមន្រ្តីនគរបាលជំនាញក៍បានបន្តនីតិវិធីរួចរាល់ផងដែរ នេះបើតាមការបញ្ជាក់ពីលោក វរសេនីយ៍ឯក ដោក យេត ស្នងការរងទទួលផែនការងារព្រហ្មទណ្ឌនៃស្នងការដ្ឋាននគរបាលខេត្តពោធិ៍សាត់ តាមប្រព័ន្ធតេឡេក្រាម នាព្រឹកថ្ងៃដដែលនេះ ។
លោក ស្នងការរងឲ្យដឹងទៀតថា ជនសង្ស័យជាឃាត.កសម្លាប់ប្រពន្ធ ឈ្មោះ សុខ វិសាល ភេទប្រុស អាយុ ២៤ឆ្នាំ ជនជាតិខ្មែរ មុខរបរ សន្តិសុខ នៅក្រុមហ៊ុនចិន នៅស្រុកវាលវែល ខេត្តពោធិ៍សាត់ រស់នៅភូមិតាម៉ោលី ឃុំស្រែស្ដុក ស្រុកកណ្ដៀង ខេត្តពោធិ៍សាត់ ។
ពាក់ព័ន្ធករណីបញ្ជូនខ្លួនជនសង្ស័យសម្លាប់ប្រពន្ធរបស់ខ្លួន ក្រោយប្រទះឃើញគ្រោងឆ្អឹងសពប្រពន្ធខាងលើ លោក វរសេនីយ៍ទោ សុង គឹមសែ អធិការនៃអធបាកានដ្ឋាននគរបាលស្រុកបាកាន(ស្ដីទី)បានឲ្យអ្នកសារព័ត៌យើងដឹងតាមទូរស័ព្ទ នាព្រឹកថ្ងៃដដែលនេះដែរថា គ្រោងឆ្អឹងសពជនរងគ្រោះខាងលើ ត្រូវបានប្រជាពលរដ្ឋដើរកាច់ទំពាំងប្រទះឃើញ នៅចំណុចគុម្ពោតព្រៃឬស្សីព្រិចនៃព្រៃសហគមន៍ព្រៃឈើ ខាងក្រោយសាលាបណ្ដុះបណ្ដាលវិជ្ជាជីវៈរលាំង ស្ថិតនៅភូមិអន្លង់មាន ឃុំស្នាមព្រះ ស្រុកបាកាន ខេត្តពោធិ៍សាត់ ។
លោក អធិការស្ដីទីឲ្យដឹងទៀតថា បន្ទាប់ទទួលបានព័ត៌មានប្រទះឃើញគ្រោងឆ្អឹងសពខាងលើ មន្ត្រីជំនាញព្រហ្មទណ្ឌនៃស្នងការដ្ឋាននគរបាលខេត្តពោធិ៍សាត់ មន្ត្រីការិយាល័យបច្ចេកទេសវិទ្យាសាស្ត្រ គ្រូពេទ្យកោសល្យវិច័្ចយ អាជ្ញាធរមានសមត្ថកិច្ចមូលដ្ឋាន សហការចុះពិនិត្យ ស្រាវជ្រាវជុំវិញទីតាំងកើតហេតុ ដើម្បីចាប់យកវត្ថុតាង ក្នុងនោះក៍ទទួលបានបំភ្លឺពីលោក ណយ នាង ភេទប្រុស អាយុ ៤៧ឆ្នាំ ជនជាតិខ្មែរ មានទីលំនៅ ភូមិអណ្ដូងសំបួរ ឃុំស្នាមព្រះ ស្រុកបាកាន ខេត្តពោធិ៍សាត់ ត្រូវជាឪពុកជនរងគ្រោះ(គ្រោងឆ្អឹង)ថា គាត់បានបាត់កូនស្រីឈ្មោះ នាង ណាក់ ហៅចាន់ណា អាយុ ២៤ឆ្នាំ ជនជាតិខ្មែរ តាំងពីថ្ងៃទី១៧ ខែសីហា ឆ្នាំ២០២៥ កន្លងទៅ ខណៈកូនស្រីបានឈ្លោះប្រកែកគ្នាជាមួយប្ដី(កូនប្រសារ)ហើយឃើញកូនប្រសារ(សុខ វិសាល)បង្ហោះហ្វេសប៊ុកមុនពេលបាត់ខ្លួន(កូនស្រី)ផងដែរ ។
លោក សុង គឹមសែ អធិការនគរបាលបញ្ជាក់ទៀតថា យោងតាមការពិនិត្យ ស្រាវជ្រាវ ជាក់ស្ដែង សពអាចរិត.កខ្សែទូរស័ព្ទប្រវែង ១.៦០ម៉ែត្រ មានថង់ពណ៏ខ្មៅទំហំ៩០គុណ១២០ គ្របពីលើសាកសព និងបន្សល់នូវវត្ថុតាងដូចភិនភាគ ដែលបង្ហោះឃ្លីបវីដេអូ ករណីរឿងរ៉ាវខាងលើ អាចផ្ដើមចេញពីភ្លើងប្រចណ្ឌ ៕
ដោយៈ ប៉ឹម ពិន
