ខេត្តពោធិ៍សាត់ ៖ នាំគ្នាអង្គុយលើម៉ូតូមុខហាងខារ៉ាអូខេយីហោ(ម្លប់ខ្លុង) ដើម្បីទូរស័ព្ទទៅនារីបម្រើការងារនៅហាងខារ៉ាអូខេយីហោម្លប់រាជ(នៅក្បែរគ្នា)សួររកក្យូស និងនារីៗមុនចូលផឹក ស្រាប់តែមានជនមិនស្គាល់អត្តសញ្ញាណជិះម៉ូតូឌុបគ្នាមកក្បែរ រួចវាយក្បាលនឹងឥដ្ឋប្រហោងបណ្ដាលឲ្យរងរបួសធ្ងន់ រួចពួកជនដៃដល់បាននាំគ្នាជិះម៉ូតូគេចខ្លួនបាត់ស្រមោល។ ចំណែកជនរងរបួសបានស្លាប់បាត់បង់ជីវិតយ៉ាងសង្វេគនៅគ្រាដែលព្យាយាមបញ្ជូនទៅសង្រ្គោះ។ នេះបើតាមការបង្ហើបពីមន្រ្តីស្ថាប័នជំនាញពាក់ព័ន្ធ ដែលបានចុះសហការជាមួយអាជ្ញាធរមានសមត្ថកិច្ចមូលដ្ឋានដើម្បីធ្វើការត្រួតពិនិត្យនិងស្រាវជ្រាវជុំវិញកន្លែងកើតហេតុ និងនៅកន្លែងផ្សេងទៀតផ្ទាល់ នារសៀលថ្ងៃអាទិត្យ ៧រោច ខែភទ្របទ ឆ្នាំម្សាញ់ សប្គស័ក ព.ស ២៥៦៩ ត្រូវនឹងថ្ងៃទី១៤ ខែកញ្ញា ឆ្នាំ២០២៥ នេះ ។
ប្រភពឱ្យដឹងទៀតថា ជនរងគ្រោះ(ស្លាប់)ឈ្មោះ បេន សំរើន ភេទប្រុស អាយុ ២៤ឆ្នាំ ជនជាតិខ្មែរ មានទីលំនៅ ភូមិព្រែក៣ ឃុំសំរោង ស្រុកភ្នំក្រវាញ ខេត្តពោធិ៍សាត់ ។ ជនរងគ្រោះ(បេន សំរើន)បានរបួសចំក្បាលខាងលើផ្នែកខាងឆ្វេងផុងលលាដ៍ គេសណ្ឋានថាអាចប៉ះទង្គិចនឹងវត្ថុរឹងមានទម្ងន់(ឥដ្ឋប្រហោង)។ មុនកើតហេតុជនរងគ្រោះនិងបក្ខពួក២នាក់បាននាំគ្នាផឹកស៊ីនៅផ្ទះមួយដងហើយ ស្រាប់តែនាំគ្នាមករកកន្លែងផឹកស៊ីបន្ត ដំណើររួមគ្នាដោយម៉ូតូ១គ្រឿងម៉ាកវ៉េវអាល់ហ្វា ហើយជនរងគ្រោះអង្គុយកណ្ដាល(ពុំមានពាក់មួកសវត្ថិភាពទេ ចំណែកអ្នកបើកបរម៉ូតូនិងអ្នកអង្គុយពីក្រោយពាក់មួកសុវត្ថិភាព លុះមកដល់ចំណុចកើតហេតុ នាំគ្នាឈប់ម៉ូតូ ប៉ុន្តែពុំបានចុះពីម៉ូតូទេ រួចទូរស័ព្ទទៅនារីម្នាក់សួររកក្យូសសម្រាប់អង្គុយ និងនារីៗដូចបានរៀបរាប់ខាងលើ ដើម្បីចូលទៅផឹកបន្ត ប៉ុន្តែចៃដន្យក៏មានជនមិនស្គាល់អត្តសញ្ញាណ២នាក់ជិះម៉ូតូ១គ្រឿងមានពាក់មួកសុវត្ថិភាព(ពណ៌ស)ទាំង២នាក់ មានម្នាក់ចុះមកវាយដោយដុំឥដ្ឋពេញទំហឹង បណ្ដាលឲ្យធ្លាក់ពីលើម៉ូតូរងរបួសធ្ងន់ និងបានស្លាប់ពេលព្យាយាមបញ្ជូនទៅសង្រ្គោះ ចំណែកជនសង្ស័យដៃដល់នាំគ្នាជិះម៉ូតូគេចខ្លួនបាត់ ។ ប៉ុន្តែទោះជាយ៉ាងណាក្ដីមានមតិជាច្រើនមានចម្ងល់ថា ចុះអ្នកបើកម៉ូតូនិងអ្នកអង្គុយពីក្រោយ ពួកគាត់កំពុងគិតអ្វី ម្ដេចឲ្យគេវាយមិត្តភក្តិងាយៗបែបនេះ? ករណីនេះសមត្ថកិច្ចគួរពុំនៅស្ងៀមឡើយ កុំឲ្យជនរងគ្រោះស្លាប់បិទភ្នែកមិនជិត ។
ប្រភពដដែលបញ្ជាក់ទៀតថា ការពិតហេតុការណ៍ខាងលើបានកើតឡើងតាំងពីកណ្ដាលអធ្រាត្រ ថ្ងៃទី១១ ខែកញ្ញា ឆ្នាំ២០២៥ នៅចំណុចចិញ្ចើមផ្លូវលំក្រាលក្រួសក្រហម១ខ្សែ មុខហាងខារ៉ាអូខេយីហោ(ម្លប់ខ្លុង) មានចម្ងាយប្រមាណ២០ម៉ែត្រពីហាងខារ៉ាអូខេមួយផ្សេងទៀតយីហោ(ម្លប់រាជ)ស្ថិតនៅភូមិព្រៃខ្លុង ឃុំរកាត ស្រុកភ្នំក្រវាញ ខេត្តពោធិ៍សាត់ មកម្ល៉េះ ៕
ដោយៈ ប៉ឹម ពិន
