ហាងកាហ្វេ Starbucks នឹងបញ្ឈប់បុគ្គលិកប្រហែល 900 នាក់ ហើយបិទហាងកាហ្វេចំនួន 100 នៅទូទាំងអាមេរិកខាងជើង ដែលជាផ្នែកមួយនៃផែនការរៀបចំរចនាសម្ព័ន្ធឡើងវិញចំនួន 1 ពាន់លានដុល្លារ ដើម្បីស្តារខ្សែសង្វាក់កាហ្វេដ៏ធំបំផុតរបស់ពិភពលោកឡើងវិញ។
ក្រុមហ៊ុនបាននិយាយថា បុគ្គលិករបស់ Starbucks ចំនួន 900 នាក់ ក្នុងតួនាទីមិនពាក់ព័ន្ធផ្នែកលក់រាយ ត្រូវបាត់បង់ការងារដើម្បីរៀបចំរចនាសម្ព័ន្ធឡើងវិញ។ ពួកគេក៏នឹងបិទ 1% នៃហាងកាហ្វេដែលដំណើរការនៅអាមេរិកខាងជើងផងដែរ។
ហាងកាហ្វេ Starbucks កំពុងព្យាយាមផ្លាស់ប្តូរយុទ្ធសាស្រ្តកើនប្រាក់ចំណូលរបស់ខ្លួន។ ការលក់នៅសហរដ្ឋអាមេរិករបស់ក្រុមហ៊ុននេះបានធ្លាក់ចុះក្នុងរយៈពេលប្រាំមួយត្រីមាសជាប់ៗគ្នា ខណៈដែលអ្នកបរិភោគដែលប្រឈមនឹងអតិផរណាខ្ពស់ជាច្រើនឆ្នាំ ត្រូវគិតពីរដងមុនពេលបញ្ជាទិញកាហ្វេដែលមានតម្លៃថ្លៃរបស់ក្រុមហ៊ុននេះ។
នាយកប្រតិបត្តិរបស់ Starbucks លោក Brian Niccol បានសរសេរនៅក្នុងលិខិតមួយទៅកាន់បុគ្គលិកកាលពីថ្ងៃព្រហស្បតិ៍ថា”ខ្ញុំជឿថាជំហានទាំងនេះគឺចាំបាច់ដើម្បីកសាង Starbucks កាន់តែប្រសើរ រឹងមាំ និងធន់ជាងមុន ដែលធ្វើអោយឥទ្ធិពលរបស់យើងកាន់តែស៊ីជម្រៅលើពិភពលោក និងបង្កើតឱកាសកាន់តែច្រើនសម្រាប់ដៃគូ អ្នកផ្គត់ផ្គង់ និងសហគមន៍ដែលយើងបម្រើ។”
ប៉ុន្តែ Starbucks Workers United ដែលជាសហជីពតំណាងកម្មករនៅហាងរាប់រយរបស់ខ្លួនបាននិយាយថា “ការផ្លាស់ប្តូរនេះ ធ្វើឱ្យវាច្បាស់ថាអ្វីៗនឹងថយក្រោយប៉ុណ្ណោះ”។ ពួកគេបានបន្ថែមថា “ការជួសជុលអ្វីដែលខូចនៅ Starbucks គឺមិនអាចទៅរួចទេបើគ្មានការផ្តោតសំខាន់ទៅលើមនុស្សដែលចូលរួមជាមួយអតិថិជនរបស់ក្រុមហ៊ុនទាំងថ្ងៃទាំងយប់”។
ក្នុងលិខិតរបស់លោក Niccol មិនបានលើកឡើងអំពីកិច្ចខិតខំប្រឹងប្រែងក្នុងការរៀបចំសហជីពនៅ Starbucks ទេ។ ហាង Starbucks ជាង 650 នៅសហរដ្ឋអាមេរិកបានរួបរួមគ្នា ដោយកម្មករបានជំរុញឱ្យមានកិច្ចសន្យាសហជីពដំបូង។ ការចរចាររវាងសហជីព និងក្រុមហ៊ុន Starbucks បានរអាក់រអួលជាច្រើនខែបន្ទាប់ពីលោក Niccol បានចូលកាន់តំណែងជានាយកប្រតិបត្តិកាលពីខែកញ្ញាឆ្នាំមុន ខណៈដែលសហជីពបានចាប់ផ្តើមកូដកម្មដ៏ធំបំផុតមិនធ្លាប់មាននៅក្រុមហ៊ុនកាលពីខែធ្នូ។
បុគ្គលិក Starbucks ជាមួយសហជីពបានរិះគន់ការផ្លាស់ប្តូរ “Back to Starbucks” ក្រោមការដឹកនាំរបស់ Niccol ហើយបានគំរាមធ្វើកូដកម្មបន្ថែមទៀតដើម្បីជំរុញឱ្យក្រុមហ៊ុនឈានដល់កិច្ចសន្យាដំបូងជាមួយសហជីព។
Starbucks បានអះអាងថាខ្លួនបានប្តេជ្ញាចិត្តក្នុងការចរចាដោយយុត្តិធម៌។ លោក Niccol បាននិយាយកាលពីថ្ងៃព្រហស្បតិ៍ថា “ខ្ញុំដឹងថាការសម្រេចចិត្តទាំងនេះប៉ះពាល់ដល់ដៃគូរបស់យើង និងគ្រួសាររបស់ពួកគេ ហើយយើងមិនបានធ្វើឱ្យពួកគេស្រាលទេ” ។ ភាគហ៊ុននៅក្នុង Starbucks បានធ្លាក់ចុះ 1% ៕
