ខេត្តស្វាយរៀង៖  លោក លឹម សៀងហេង អភិបាលក្រុងបាវិត នៅរសៀលថ្ងៃទី២៩ ខែកញ្ញា ឆ្នាំ២០២៥ បានជួបសំណេះសំណាលនិងចែកអំណោយជូនដល់ប្រជាពលរដ្ឋនិងសិស្សានុសិស្ស ដែលមានជីវភាពខ្វះខាតនៅក្នុងសង្កាត់បាទី ក្រុងបាវិត ខេត្តស្វាយរៀង។

លោក ឯក សារ៉ាត់ ចៅសង្កាត់បាទីបានឲ្យដឹងថា៖ប្រជាពលរដ្ឋទីទាល់ក្រដែលមានជីវភាពខ្វះខាតដែលត្រូវទទួលបានអំណោយនាពេលនេះមានចំនួន៣០០ គ្រួសារ និងសិស្សានុសិស្សចំនួន២០០នាក់ ដែលជាប្រជាពលរដ្ឋរស់នៅក្នុងសង្កាត់បាទី ក្រុងបាវិត។

នៅក្នុងឱកាសនោះផងដែរ លោក លឹម សៀងហេង អភិបាលក្រុង ក៏បានថ្លែងអំណរគុណយ៉ាងជ្រៀលជ្រៅបំផុតចំពោះសប្បុរសជនទាំងអស់ ដែលជាអ្នកវិនិយោគបានមកបណ្តាក់ទុន បង្កើតរោងចក្រសហគ្រាស មណ្ឌលកម្សាន្តនានា នៅក្នុងសង្កាត់បាទី ហើយមានចិត្តអាណិតអាសូរ និងបានផ្តល់ទេយ្យទានមានគ្រឿងឧបភោគ បរិភោគ និងថវិកាមួយចំនួន ដើម្បីចូលរួមចំណែកជាមួយរាជរដ្ឋាភិបាល ក្នុងការកាត់បន្ថយភាពក្រីក្ររបស់ប្រជាពលរដ្ឋនៅមូលដ្ឋានបានមួយកម្រិតផងដែរ។

លោកអភិបាលក្រុងបាវិតបានបន្តថា នៅខេត្តស្វាយរៀង ដែលមានសម្តេចកិត្តិសង្គហបណ្ឌិត ម៉ែន សំអន ជាប្រធានក្រុមការងារចុះជួយខេត្តស្វាយរៀង និងលោក ប៉េង ពោធិ៍សា ជាអភិបាលខេត្ត លោកបានបន្តខិតខំកៀរគរបន្ថែមស្វែងរកវិនិយោគិនមកធ្វើការបណ្តាក់ទុនរកសុី បង្កើតជាក្រុមហ៊ុន សហគ្រាស មណ្ឌលកម្សាន្តផ្សេងៗនៅមូលដ្ឋាន បង្កើតឱកាសឲ្យកូនចៅរបស់ប្រជាពលរដ្ឋមានការងារធ្វើនៅជិតផ្ទះ មិនចំណាកស្រុកទាំងប្រថុយប្រថាន។ ដូច្នេះសូមក្មួយៗដែលជាទំពាំងស្នងឬស្សីត្រូវខិតខំប្រឹងប្រែងរៀនសូត្រឲ្យទទួលបានលទ្ធផលល្អមានការងារធ្វើគ្រប់ៗគ្នាដើម្បីកាត់បន្ថយភាពក្រីក្រនៅតាមគ្រួសារ។

សូមបញ្ជាក់ផងដែរថា ប្រជាពលរដ្ឋដែលមានជីវភាពខ្វះខាតទទួលបានអំណោយនាពេលនេះមានចំនួន៣០០គ្រួសារ ក្នុងមួយគ្រួសារទទួលបានគ្រឿងឧបភោគ បរិភោគ និងថវិកាចំនួន៥ម៉ឺនរៀល សិស្សានុសិស្សចំនួន២០០នាក់ក្នុងម្នាក់ៗទទួលបានសម្ភារៈសិក្សា និងថវិកា២ម៉ឺនរៀល ហើយលោកអភិបាលក្រុងបាវិតនិងសប្បុរសជនក៏បានប្រគេននូវទេយ្យទានរួមមាន អង្ក៥០០គីឡូក្រាម, ត្រីខកំប៉ុង១០យួរ, , ទឹកសុីអុីវ១០យួរ, ស្ករស ប៊ីចេង អំបិល ទឹកសុទ្ធ និងបច្ច័យចំនួន ៥៥០០ដុល្លារ ដល់ព្រះសង្ឃដែលគង់ចាំវស្សានៅវត្តដងទង់ផងដែរ៕ ដោយ៖ សុថាន