ភ្នំពេញ៖ ពស់ថ្លាន់១ក្បាលទម្ងន់២០គីឡូក្រាម និងប្រវែង៣ម៉ែត្រកន្លះ ត្រូវបានពលរដ្ឋរស់នៅសង្កាត់ភ្នំពេញថ្មី ចាប់បានខណៈកំពុងលបសីុមាន់អ្នកភូមិ។ ការភ្ញាក់ផ្អើលនេះបានកើតឡើងកាលពីវេលាម៉ោង៨ព្រឹក ថ្ងៃទី០៥ សីហា ឆ្នាំ២០១៥ នេះនៅចំណុចភូមិទំនប់ សង្កាត់ភ្នំពេញថ្មី ខណ្ឌសែនសុខ ។
បើតាមប្រភពពីពលរដ្ឋម្នាក់ដែលជាម្ចាស់មាន់ បានរៀបរាប់ថា ពស់១ក្បាលនេះ កន្លងមកតែងតែមកលួចមាន់គាត់សីុស្ទើររៀងរាល់ថ្ងៃ តែកាលណោះគាត់គ្រាន់តែដេញចេញប៉ុណ្ណោះដោយមិនចងចាប់ទេ។ លុះមកដល់ពេលថ្មីៗនេះគាត់តែងតែបាត់សត្វមាន់ច្រើនពេក ដោយទ្រាំមិនបាន ទើបគាត់សម្រេចប្រាប់អ្នកភូមិឲ្យលបចាំ និងឆក់ពស់ថ្លាន់នោះឲ្យសន្លប់ទើបចាប់បានតែម្តង ។
បើតាមពលរដ្ឋដែលជាអ្នកចាប់បានមានឈ្មោះឡឹង សុខឃឿត ភេទប្រុស អាយុ៤៩ឆ្នាំ មុខរបរបើកបររថយន្តទេសចរណ៍ មានស្រុកកំណើត ភូមិជុបវ៉ារី ឃុំជុបវ៉ារី ស្រុកប្រនេតព្រះខេត្តបន្ទាយមានជ័យ។បានអោយដឹងថានៅមុនពេលចាប់សត្វពស់ថ្លាន់នោះបានរូបគាត់បាត់មាន់ហើយបានឮសំលេងសត្វមាន់ស្រែកម្ចាស់ក៍ដើរទៅមើលហើយឃើញពស់ថ្លាន់កំពុងតែលេបសត្វមាន់របស់គាត់ក៍យកខ្សែភ្លើងឆក់អោយវាសន្លាប់ទើបចាប់បានតែម្តង ហើយក៏រាយការណ៍ទៅសាលាសង្កាត់ ដើម្បីយកពស់នោះទៅរក្សាទុក រង់ចាំប្រគល់ឲ្យខាងអភិរក្ស ៕
ដោយ៖ តុង សីហា
