ភ្នំពេញ៖ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានមានប្រសាសន៍ថា ៖ អតីតពលករខ្មែរត្រលប់មកពីប្រទេសថៃប្រមាណ ៣០ម៉ឺននាក់ បានទទួលឱកាសការងារក្នុងស្រុក ទាំងការងារនៅក្នុងរោងចក្រ សហគ្រាសក្នុងប្រព័ន្ធ និងការងារនៅក្រៅប្រព័ន្ធ នេះគិតត្រឹមចុងខែកញ្ញា។
រដ្ឋមន្ត្រី ហេង សួរ បានបញ្ជាក់ថា ចាប់ពីថ្ងៃទី៨ ខែមិថុនា រហូតមកដល់ចុងខែកញ្ញានេះ អតីតពលករខ្មែរត្រលប់មកពីថៃប្រមាណ ៣០ម៉ឺននាក់ បានទទួលឱកាសការងារតាមរយៈយន្ដការក្រសួងការងារ និងបណ្ដុះបណ្ដាលវិជ្ជាជីវៈ វិស័យឯកជន និងភាគីពាក់ព័ន្ធនានា។
លោក ហេង សួរ ថ្លែងបន្តថា «ទោះបីជាអ្វីដែលយើងបានផ្ដល់ជូននេះ មិនបាន១០០ភាគរយ ក៏ប៉ុន្តែការពង្រីកទីផ្សារការងារក្នុងរយៈពេលដ៏ខ្លី រហូតយើងទទួលបាននូវលទ្ធផលជាង ២៤ម៉ឺននាក់មកពីថៃ បានការងារធ្វើនៅក្នុងសេដ្ឋកិច្ចក្នុងប្រព័ន្ធ មានន័យថា សុទ្ធតែជាអ្នកដែលបានធ្វើការនៅតាមរោងចក្រ ឬមួយក៏សហគ្រាសធំៗ»។
ក្រៅពីនេះ ក៏មានអតីតពលករខ្មែរត្រលប់មកពីប្រទេសថៃប្រមាណ ៦ម៉ឺននាក់ផ្សេងទៀត បានទទួលការងារធ្វើនៅតាមការដ្ឋានសំណង់ សិប្បកម្ម និងភោជនីយដ្ឋានជាដើម ដែលជាការងារស្ថិតនៅក្រៅប្រព័ន្ធ។ ដូច្នេះសរុបទាំងក្នុងប្រព័ន្ធ និងក្រៅប្រព័ន្ធ គឺអតីតពលករខ្មែរត្រលប់មកពីប្រទេសថៃប្រមាណ ៣០ម៉ឺននាក់ បានទទួលការងារក្នុងស្រុក៕ដោយ៖តារា 
