ខេត្តពោធិ៍សាត់ ៖ អាជ្ញាធរមានសមត្ថកិច្ចមូលដ្ឋានស្រុកបាកាន បានឲ្យដឹងនាព្រឹកថ្ងៃចន្ទ ១៤កើត ខែអស្សុជ ឆ្នាំម្សាញ់ សប្គស័ក ព.ស ២៥៦៩ ត្រូវនឹងថ្ងៃទី៦ ខែតុលា ឆ្នាំ២០២៥ នេះថា ល្ងាចម្សិលមិញយ៉ាងហោចមានក្មេងប្រុសម្នាក់បានស្លាប់បាត់បង់ជីវិតភ្លាមៗ ដោយសារគ្រោះថ្នាក់ធម្មជាតិ(រន្ទះបាញ់)នៅគ្រាក្មេងប្រុសរងគ្រោះ កំពុងអង្គុយលើគោយន្ត ពេលមេឃកំពុងធ្លាក់ភ្លៀង ។
ប្រភពពីអាជ្ញាធរឲ្យដឹងទៀតថា ហេតុការណ៍ខាងលើបានកើតឡើងត្រង់ចំណុចវាលស្រែ ស្ថិតនៅភូមិព្រៃខៀវ ឃុំមេទឹក ស្រុកបាកាន ខេត្តពោធិ៍សាត់ ។ ក្មេងជំទង់រងគ្រោះឈ្មោះ ធា ប៊ុនថាត់ អាយុ ១៣ឆ្នាំ ជនជាតិខ្មែរ រស់នៅ ភូមិ.ឃុំកើតហេតុ ។
ប្រភពបញ្ជាក់ទៀតថា ហេតុការណ៍នេះ សមត្ថកិច្ចសហការចុះពិនិត្យ និងធ្វើការស្រាវជ្រាវយ៉ាងយកចិត្តទុកដាក់ មូលហេតុ ក្មេងរងគ្រោះអង្គុយលើគោយន្តមើលពូព្រួសស្រូវ ក៍ស្រាប់តែមេឃបានធ្លាក់ភ្លៀងលាយឡាំទៅដោយផ្គររន្ទះ ខណៈនោះក៍មានភ្នែកបន្ទោលឆ្វាចបាញ់គ្រាំងតែម្ដង ពូកំពុងព្រួសស្រែរត់មកមើលក្មួយប្រុសស្លាប់បាត់ទៅហើយ ។ កម្លាំងសហការបានធ្វើកំណត់ហេតុ ប្រគល់ទទួលជូនក្រុមគ្រួសារ យកទៅចាត់ចែងធ្វើបុណ្យតាមប្រពៃណី ៕
ដោយៈ ប៉ឹម ពិន
