ខេត្តកំពង់ស្ពឺ៖ ណាហ្គាវើលបេះដូងសប្បុរសបានរៀបចំកម្មវិធីប្រកួតប្រជែងប្រកបពាក្យភាសាអង់គ្លេសសម្រាប់សិស្សានុសិស្សសាលាបឋមសិក្សាចំនួន៥ក្នុងខេត្តកំពង់ស្ពឺ។ សិស្សានុសិស្សចំនួន ៤១៤នាក់ អាយុពី៧ឆ្នាំ ដល់១២ឆ្នាំ បានចុះឈ្មោះចូលរួមក្នុងកម្មវិធីប្រកួតប្រជែងប្រកបពាក្យភាសាអង់គ្លេសនេះ។ គោលបំណងចម្បងនៃកម្មវិធីប្រកួតប្រជែងប្រកបពាក្យភាសាអង់គ្លេសនេះ គឺដើម្បីចូលរួមចំណែកក្នុងការអភិវឌ្ឍស្តង់ដារភាសាអង់គ្លេសក្នុងចំណោមកុមារកម្ពុជា ។
នៅថ្ងៃទី២៥ ខែកក្កដា ឆ្នាំ២០១៥ ក្រុមស្ម័គ្រចិត្តណាហ្គាវើលបេះដូងសប្បុរសបានប្រគល់រង្វាន់ដល់សិស្សដែលទទួលបានជ័យលាភីចំនួន ១៦នាក់ ក្នុងកម្មវិធីប្រកួតប្រជែងប្រកបពាក្យភាសាអង់គ្លេស នៅសាលាបឋមសិក្សាកន្ទួត ស្ថិតក្នុងឃុំតាំងក្រូច ស្រុកសំរោងទង ខេត្តកំពង់ស្ពឺ។ បន្ថែមពីលើនេះទៀត អ្នកទទួលបានជ័យលាភីក៏ទទួលបានប័ណ្ណសរសើរដែលទទួលស្គាល់នូវកិច្ចខិតខំប្រឹងប្រែង និងការជោគជ័យរបស់ពួកគេផងដែរ ។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើលបានមានប្រសាសន៍ថា “ក្រុមហ៊ុនណាហ្គាវើលចូលរួមយ៉ាងសកម្មក្នុងការអភិវឌ្ឍន៍សហគមន៍ក្នុងប្រទេសកម្ពុជា។ ណាហ្គាវើលបេះដូងសប្បុរសបានផ្តួចផ្តើមបង្កើតកម្មវិធីអប់រំជាច្រើនដើម្បីជម្រុញលើកទឹកចិត្តសិស្សានុសិស្សឲ្យខិតខំរៀនសូត្រដើម្បីអនាគតប្រទេសកម្ពុជា។ កម្មវិធីប្រកួតប្រជែងប្រកបពាក្យភាសាអង់គ្លេស គឺជាកម្មវិធីមួយក្នុងចំណោមកម្មវិធីជាច្រើនដែលណាហ្គាវើលបេះដូងសប្បុរសបានផ្តួចផ្តើមបង្កើតដើម្បីជំរុញលើកទឹកចិត្តសិស្សានុសិស្សឲ្យខិតខំរៀនសូត្រភាសាអន្តរជាតិនេះ។ កម្មវិធីប្រកួតប្រជែងប្រកបពាក្យភាសាអង់គ្លេសនេះ គឺធ្វើឡើងដើម្បីចូលរួមចំណែកក្នុងការអភិវឌ្ឍន៍ស្តង់ដាភាសាអង់គ្លេសក្នុងចំណោមកុមារកម្ពុជានៅតាមបណ្តាខេត្ត។ នៅក្នុងកម្មវិធីនេះដែរ យើងបានផ្តល់ពាក្យភាសាអង់គ្លេសចំនួន ២០០ពាក្យ (មានទាំងភាសាអង់គ្លេស និងភាសាខ្មែរ រួមទាំងរបៀបបញ្ចេញសំលេងរបស់ពាក្យនីមួយៗផងដែរ) ដល់សិស្សានុសិស្សបឋមសិក្សានៅដើមខែមិថុនា ឆ្នាំ២០១៥។ យើងបានជ្រើសរើសយកពាក្យចំនួន១០០ពាក្យក្នុងចំណោម២០០ពាក្យសម្រាប់ការប្រកួតប្រជែងនេះ។ សិស្សានុសិស្សមានរយៈពេលមួយខែដើម្បីអាន សរសេរ និងទន្ទេញគ្រប់ពាក្យដែលបានផ្តល់ឲ្យ។ នៅថ្ងៃទី១៤ ខែកក្កដា ឆ្នាំ២០១៥ ក្រុមស្ម័គ្រចិត្តណាហ្គាវើលបេះដូងសប្បុរសបានរៀបចំការប្រឡងប្រកបពាក្យភាសាអង់គ្លេសក្នុងចំណោមសិស្សានុសិស្សចំនួន ៤១៤នាក់ ក្នុងសាលាបឋមសិក្សាចំនួន ៥” ។
លោកបានបន្ថែមទៀតថា “គណៈកម្មការកម្មវិធីប្រកួតប្រជែងប្រកបពាក្យភាសាអង់គ្លេសបានដាក់ពិន្ទុយ៉ាងយកចិត្តទុកដាក់ទៅលើចម្លើយរបស់សិស្សានុសិស្សមុនពេលចេញលទ្ធផលនៃការប្រកួតប្រជែងនេះ។ រង្វាន់លេខ១បានទៅលើសិស្សឈ្មោះ នៃ ញឹមវិណាត ថ្នាក់ទី ៦ “A” រៀននៅសាលាបឋមសិក្សាពាមឃ្លៃ ដោយទទួលបាន ៩៩ពិន្ទុ។ នាងទទួលបានទឹកប្រាក់ចំនួន ១២០,០០០រៀល និងប័ណ្ណសរសើរមួយផងដែរ។ អ្នកទទួលបានជ័យលាភីទាំងអស់បានដើរចេញជាមួយនិងរង្វាន់ជាសាច់ប្រាក់ និងប័ណ្ណសរសើរម្នាក់មួយផងដែរ។ លទ្ធផលនេះគឺជាការខិតខំប្រឹងប្រែងរបស់នាង។ ខ្ញុំសង្ឃឹមថា កុមារទាំងអស់ដែលមិនបានទទួលរង្វាន់នៅលើកនេះ ពួកគេនឹងខិតខំប្រឹងប្រែងរៀនសូត្រជាងមុនដើម្បីទទួលបានរង្វាន់ដូចអ្នកឈ្នះទាំងអស់នេះក្នុងកម្មវិធីប្រកួតប្រជែងប្រកបពាក្យភាសាអង់គ្លេសនាពេលអនាគត។ តាមរយៈការអនុវត្តន៍កម្មវិធីប្រកួតប្រជែងប្រកបពាក្យភាសាអង់គ្លេសនេះ យើងសង្ឃឹមថាពាក្យវាក្យស័ព្ទភាសាអង់គ្លេសរបស់កុមារនឹងមានការរីកចំរើន។ យើងមានផែនការបន្តកម្មវិធីនេះសម្រាប់កុមារសាលាបឋមសិក្សាក្នុងខេត្តព្រៃវែងទៀត” ។
លោក ទូច សាមិត្ត នាយកសាលាបឋមសិក្សាកន្ទួតបានមានប្រសាសន៍ថា “ភាសាអង់គ្លេសមានសារសំខាន់ណាស់សម្រាប់ការងារ និងកិច្ចការទំនាក់ទំនង។ ខ្ញុំសូមកោតសរសើររាល់សកម្មភាពការងារសង្គមរបស់ក្រុមហ៊ុនណាហ្គាវើល។ ក្រុមហ៊ុនណាហ្គាវើលតែងតែមកសួរសុខទុក និងជម្រុញលើកទឹកចិត្តសិស្សានុសិស្សនៅតាមបណ្តាខេត្តឲ្យខិតខំរៀនសូត្រដើម្បីអនាគតរបស់ពួកគេផ្ទាល់ និងប្រទេសកម្ពុជាផងដែរ។ បន្ថែមពីលើនេះទៀត ណាហ្គាវើលបានផ្តួចផ្តើមបង្កើតកម្មវិធីប្រកួតប្រជែងប្រកបពាក្យភាសាអង់គ្លេសសម្រាប់សិស្សានុសិស្សសាលាបឋមសិក្សាក្នុងគោលបំណងដើម្បីជម្រុញលើកទឹកចិត្តសិស្សានុសិស្សឲ្យខិតខំរៀនសូត្រភាសាអង់គ្លេស។ ថ្ងៃនេះពួកគេបានប្រគល់រង្វាន់ជាសាច់ប្រាក់ដល់សិស្សដែលបានឈ្នះក្នុងកម្មវិធីប្រកួតប្រជែងនេះ។ វាមិនត្រឹមតែជាគំរូដ៏ល្អមួយសម្រាប់ក្រុមហ៊ុនផ្សេងៗប៉ុណ្ណោះនោះទេ ថែមទាំងជាកម្មវិធីដ៏ល្អប្រសើរមួយដើម្បីចូលរួមចំណែកក្នុងការអភិវឌ្ឍន៍វិស័យអប់រំផងដែរ”។ គាត់បានបន្ថែមទៀតថា “តាំងនាមឲ្យសិស្សានុសិស្ស និងលោកគ្រូអ្នកគ្រូ ខ្ញុំសូមសំដែងនូវការដឹងគុណយ៉ាងជ្រាលជ្រៅដល់ក្រុមហ៊ុនណាហ្គាវើលដែលតែងតែជួយគាំទ្រកុមារនៅទីនេះ។ ការចូលរួមចំណែករបស់ក្រុមហ៊ុនណាហ្គាវើលផ្តល់នូវឱកាសដល់កុមារក្រីក្រនៅតាមបណ្តាខេត្ត ហើយវានឹងជួយកាត់បន្ថយភាពក្រីក្រនាពេលអនាគត” ។
កុមារី កយ ស្រីណាត ជាសិស្សថ្នាក់ទី ៥ “ក” រៀននៅសាលាបឋមសិក្សាកន្ទួតបាននិយាយថា “ទោះបីជាខ្ញុំមិនបានទទួលរង្វាន់ក៏ដោយ ក៏ប៉ុន្តែពាក្យវាក្យស័ព្ទភាសាអង់គ្លេសរបស់ខ្ញុំមានការរីកចំរើន និងចេះពាក្យច្រើនជាងមុន នេះក៏ដោយសាតែកម្មវិធីប្រកួតប្រជែងប្រកបពាក្យភាសាអង់គ្លេស។ ខ្ញុំសង្ឃឹមថា ណាហ្គាវើលបេះដូងសប្បុរសនឹងរៀបចំកម្មវិធីនេះម្តងទៀតនៅពេលខាងមុខ។ ខ្ញុំនឹងខិតខំរៀនសូត្រដើម្បីឈ្នះរង្វាន់ក្នុងកម្មវិធីនេះលើកក្រោយ ហើយខ្ញុំនឹងធ្វើការឲ្យក្រុមហ៊ុនណាហ្គាវើលនាពេលអនាគត នៅពេលដែលខ្ញុំបញ្ចប់ការសិក្សារបស់ខ្ញុំ” ៕
ដោយ៖ ស ដារ៉ា
