អាជ្ញាធរថៃបានរឹបអូសប័ណ្ណកម្មសិទ្ធិដីធ្លីជាង ៤០០ ប័ណ្ណ រថយន្ត ៦០ គ្រឿង និងទ្រព្យសម្បត្តិមានតម្លៃជាច្រើន បន្ទាប់ពីការស៊ើបអង្កេតរឿងអាស្រូវរបស់ព្រះចៅអធិការវត្តព្រះបាតណាំភូ ដែលត្រូវបានចោទប្រកាន់ពីបទកិបកេងប្រាក់បរិច្ចាគ។

ការិយាល័យស៊ើបអង្កេតកណ្តាលរបស់ប្រទេសថៃ (CIB) សហការជាមួយភ្នាក់ងារប្រឆាំងអំពើពុករលួយ និងប្រឆាំងការលាងលុយកខ្វក់ បានប្រកាសនៅថ្ងៃទី ១៣ ខែវិច្ឆិកាថា ខ្លួនបានបញ្ចប់ “ប្រតិបត្តិការចុងក្រោយ” ដើម្បីយកមកវិញនូវទ្រព្យសម្បត្តិមួយចំនួនធំនៅវត្តព្រះបាតណាំភូ ក្នុងខេត្តលពបុរី (Lopburi) ។ នេះគឺជាចំណុចក្តៅក្នុងករណីព្រះចៅអធិការត្រូវបានចោទប្រកាន់ពីបទកិបកេងប្រាក់សប្បុរសធម៌។
យោងតាម CIB អាជ្ញាធរបានរឹបអូសវិញ្ញាបនបត្រសិទ្ធិប្រើប្រាស់ដីធ្លីចំនួន ៤១១ ប័ណ្ណ រថយន្ត ៦០ គ្រឿង និងទ្រព្យសម្បត្តិជាច្រើនទៀតនៅក្នុងវត្ត ដែលមានតម្លៃសរុបជាង ១០ ពាន់លានបាត (ជាង ៣០០ លានដុល្លារអាមេរិក) នេះបើយោងតាមរបាយការណ៍របស់ National Thailand។
យុទ្ធនាការនេះត្រូវបានចាប់ផ្តើមបន្ទាប់ពីការស៊ើបអង្កេតលើ Seksan Supseubsakul ដែលជាឥស្សរជនមានឥទ្ធិពលម្នាក់នៅក្នុងរង្វង់សាសនាថៃ។ លោកត្រូវបានចោទប្រកាន់ពីបទឃុបឃិតជាមួយព្រះរាជវិសុទ្ធិប្រឆាណាត ចៅអធិការវត្តព្រះបាទណាំភូ ដើម្បីកិបកេងប្រាក់សប្បុរសធម៌។
ដោយឆ្លៀតឱកាសពីកិត្តិនាម និងឥទ្ធិពលរបស់លោកនៅលើបណ្តាញសង្គម លោកសេកសាន បានអំពាវនាវឱ្យប្រជាជនបរិច្ចាគប្រាក់ដោយប្តេជ្ញាថាប្រាក់នោះនឹងទៅព្រះរាជវិសុទ្ធិប្រឆាណាត (ដែលត្រូវបានគេស្គាល់ផងដែរថា ព្រះអាឡងកុត) ដើម្បីគាំទ្រដល់អ្នកជំងឺអេដស៍ និងសកម្មភាពមនុស្សធម៌របស់វត្ត។
ចាប់ពីខែសីហា ឆ្នាំ២០១៩ ដល់ឆ្នាំ២០២៥ លោកបានបើកគណនីមួយនៅធនាគារកសិកន ដើម្បីទទួលប្រាក់បរិច្ចាគ ដោយរកបានប្រាក់ជាង ៣០០ លានបាត (ប្រហែល ៩ លានដុល្លារអាមេរិក)។
ទោះជាយ៉ាងណាក៏ដោយ ការស៊ើបអង្កេតបានរកឃើញថា ព្រះអាឡងកុត មិនបានប្រើប្រាស់ប្រាក់នេះសម្រាប់សកម្មភាពរបស់វត្តនោះទេ ប៉ុន្តែបានចំណាយវាលើគោលបំណងផ្ទាល់ខ្លួន ឲ្យខ្ចីប្រាក់ ទិញដី និងទិញរថយន្តក្រោមឈ្មោះអ្នកដទៃ។
នៅថ្ងៃទី១៨ ខែសីហា ព្រះអាឡងកុត បានប្រកាសលាលែងពីតំណែង។ នៅថ្ងៃទី 26 ខែសីហា តុលាការព្រហ្មទណ្ឌស្តីពីអំពើពុករលួយ និងអំពើមិនសមរម្យបានចេញដីកាចាប់ខ្លួនលោក Seksan និងលោក Phra Alongkot ពីបទកិបកេងប្រាក់បរិច្ចាគ គេចវេសពីការទទួលខុសត្រូវ និងលាងលុយកខ្វក់។
ក្នុងអំឡុងពេលចាប់ខ្លួនជនជាប់ចោទទាំងពីរនាក់ ប៉ូលីសក៏បានរឹបអូសរថយន្តចំនួនបីគ្រឿងដែលមានតម្លៃជាង 240,000 ដុល្លារអាមេរិក សាច់ប្រាក់ កាបូបដៃប្រណីត និងវិញ្ញាបនបត្រសិទ្ធិប្រើប្រាស់ដីធ្លីចំនួន 23 សន្លឹក។
អាជ្ញាធរក៏បានប្រមូលភស្តុតាងដើម្បីប្រគល់ជូនវត្តព្រះបាទណាំភូវិញ ដោយជួយឱ្យវត្តនេះទទួលបានប្រាក់ប្រហែល 200 លានបាត (ជាង 6.1 លានដុល្លារអាមេរិក) ដែលត្រូវបានកិបកេង៕

រូប​ថត​: the nation