ភ្នំពេញ៖ លោក ផន រឹម អនុរដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូន នៅរសៀលថ្ងៃទី១៨ ខែវិច្ឆិកា ឆ្នាំ២០២៥នេះ បានឱ្យដឹងថា ដូចសាធារណជន និងបងប្អូនសារព័ត៌មាន បានជ្រាបកាលពីម្សិលម៉ិញជុំវិញករណីស្រុកផ្លូវរថភ្លើង បណ្តាលឱ្យទូររថភ្លើងចំនួន៣ទូរ បានក្រឡាប់ធ្លាយប្រេងចេញមកក្រៅ នៅចំណុច PK191+600 ខ្សែដែកទិសខាងជើង ស្ថិតនៅភូមិច្រេះ ឃុំអូរតាប៉ោង ស្រុកបាកាន ខេត្តពោធិ៍សាត់។
លោកអ្នកនាំពាក្យរូបនេះ បានបញ្ជាក់ថា អ្វីដែលយើងបានកត់សម្គាល់នោះ មានសាធារណជន និងបងប្អូនសារព័ត៌មានខ្លះបានចុះផ្សាយ ធ្វើអត្ថាធិប្បាយចោទសួរថា ប្រេងដែលដឹកនោះមានប្រភពពីណា? នាំចូលតាមណា?របស់ក្រុមហ៊ុនអ្វី?
លោក ផន រឹម បានគូសបញ្ជាក់ថា មុនឈានដល់ការចេញសេចក្តីបំភ្លឺព័ត៌មានផ្លូវរបស់ក្រុមហ៊ុនប្រេង ខ្ញុំបាទក្នុងនាមអ្នកនាំពាក្យក្រសួងសាធារណការ និងដឹកជញ្ជូន សូមជម្រាបជូនបឋមថា ខ្សែរថភ្លើងលេខ៦៥៣៥ បានដឹកប្រេងចំនួន២៥ទូរ របស់ក្រុមហ៊ុនសូគីម៉ិច (ប្រភពនាំចូលពីប្រទេសឹង្ហបុរី តាមកំពង់ផែស្វ័យ័តក្រុងព្រះសីហនុ) ដោយចេញដំណើរពីស្ថានីយភ្នំពេញ ឆ្ពោះទៅស្ថានីយ៍បឹងព្រីង ខេត្តបាត់ដំបង ដើម្បីចែកចាយនៅខេត្តភាគពាយ័ព្យប្រទេសកម្ពុជា មិនមែនជាប្រេងនាំចូលពីប្រទេសថៃ ដូចការប៉ាន់ស្មាន និងការអត្ថាធិប្បាយដោយគ្មានប្រភពព័ត៌មាន និងការផ្ទៀងផ្ទាត់ត្រឹមត្រូវនោះឡើយ។
ដូច្នេះសូមសាធារណជន និងបងប្អូនសារព័ត៌មាន រង់ចាំសេចក្តីបំភ្លឺព័ត៌មានផ្លូវការរបស់ក្រុមហ៊ុនប្រេង នាពេលខាងមុខ៕
ដោយ៖តារា
