របបយោធាមីយ៉ាន់ម៉ាបានបដិសេធពាក្យចចាមអារ៉ាមថាអតីតទីប្រឹក្សារដ្ឋ លោកស្រី អ៊ុងសាន ស៊ូជី បានទទួលមរណភាព ដោយអះអាងថាសុខភាពរបស់លោកស្រីនៅតែល្អ។

នៅថ្ងៃទី១៧ ខែធ្នូ កាសែត The Nation បានរាយការណ៍ថាក្រុមព័ត៌មាននៃក្រុមប្រឹក្សាសន្តិសុខ និងការពារជាតិមីយ៉ាន់ម៉ាបានបញ្ជាក់ថាសុខភាពរបស់លោកស្រី អ៊ុងសាន ស៊ូជី នៅតែល្អ ហើយបាននិយាយថាពាក្យចចាមអារ៉ាមថ្មីៗអំពីលោកស្រីគឺជាទង្វើនៃការបំភាន់ដោយចេតនា។
នៅក្នុងសេចក្តីថ្លែងការណ៍មួយដែលចេញផ្សាយនៅថ្ងៃទី១៦ ខែធ្នូ ក្រុមព័ត៌មានបាននិយាយថាប្រព័ន្ធផ្សព្វផ្សាយដែលត្រូវបានចាត់ទុកថាមានអរិភាពបានផ្សព្វផ្សាយព័ត៌មានមិនពិត និងបំភាន់ ដោយបំផ្លើសសេចក្តីថ្លែងការណ៍ថ្មីៗរបស់កូនប្រុសរបស់លោកស្រី គឺលោក គីម អារីស។
ថ្មីៗនេះ លោកបាននិយាយថាលោកទទួលបានព័ត៌មានតិចតួចណាស់អំពីសុខភាពរបស់លោកស្រី អ៊ុងសាន ស៊ូជី ហើយមានការភ័យខ្លាចថាម្តាយអាយុ ៨០ ឆ្នាំរបស់គាត់អាចនឹងស្លាប់ក្នុងពេលជាប់ឃុំឃាំង។
ក្រុមព័ត៌មានអះអាងថាព័ត៌មានមិនពិតកំពុងត្រូវបានផ្សព្វផ្សាយដោយចេតនានៅពេលនេះដើម្បីជ្រៀតជ្រែកដល់ការបោះឆ្នោតទូទៅនៅប្រទេសមីយ៉ាន់ម៉ានាពេលខាងមុខ។

រដ្ឋប្រហារនៅមីយ៉ាន់ម៉ាបានកើតឡើងនៅក្នុងខែកុម្ភៈ ឆ្នាំ២០២១ នៅពេលដែលយោធាមីយ៉ាន់ម៉ាបានផ្តួលរំលំរដ្ឋាភិបាលស៊ីវិល និងចាប់ខ្លួនប្រធានាធិបតី វីន ម្យីន ទីប្រឹក្សារដ្ឋ អ៊ុង សាន ស៊ូជី និងសមាជិកគណៈរដ្ឋមន្ត្រី។ លោកស្រី ស៊ូជី ត្រូវបានឃុំខ្លួននៅព្រឹកនៃរដ្ឋប្រហារ។
លោកស្រី ស៊ូជី កម្របង្ហាញខ្លួនជាសាធារណៈណាស់ចាប់តាំងពីត្រូវបានចាប់ខ្លួន។ លោកស្រីបានបង្ហាញខ្លួននៅក្នុងរូបថតព្រិលៗដែលចេញផ្សាយដោយប្រព័ន្ធផ្សព្វផ្សាយមីយ៉ាន់ម៉ាក្នុងអំឡុងពេលសវនាការ៕

រូបថត​: tuoitre