ភ្នំពេញ៖ ក្នុងស្មារតី «ខ្មែរជួយខ្មែរ» ការទ្រទ្រង់ដល់សមរភូមិមុខ គឺជាកម្លាំងចលករមួយដ៏សំខាន់សម្រាប់ការប្រយុទ្ធតតាំងប្រឆាំងនឹងការឈ្លានពានទឹកដីកម្ពុជារបស់យោធាថៃ មានសប្បុរសជនជាច្រើនបានចូលរួមជាមួយអាជ្ញាធរមូលដ្ឋាន ដើម្បីរៀបចំឧបត្ថម្ភគាំទ្រដល់សមរភូមិមុខ។ មន្ទីរសម្រាកព្យាបាល រ៉ូហ្សាណា បាននាំយកជាស្បៀងមួយចំនួនផ្ដល់ជូនរដ្ឋបាលខណ្ឌច្បារអំពៅ និងរដ្ឋបាលសាលាស្រុកកៀនស្វាយ ដើម្បីផ្តល់ជូនវីរកងទ័ពជួរមុខកម្ពុជា និងប្រជាពលរដ្ឋភៀសសឹកដោយការឈ្លានពាន របស់កងកម្លាំងប្រដាប់អាវុធសៀម។
បើតាមលោកវេជ្ជបណ្ឌិត សាន មុនី បានឱ្យដឹងថា តាមរយៈរដ្ឋបាលខណ្ឌច្បារអំពៅ និងរដ្ឋបាលសាលាស្រុកកៀនស្វាយ គណៈគ្រប់គ្រង និងបុគ្គលិកគ្រប់ផ្នែក នៃមន្ទីរសម្រាកព្យាបាល រ៉ូហ្សាណា បាននាំយកអំណោយឧបត្ថម្ភរួមមាន៖ អង្គរ ១តោន ទឹកបរិសុទ្ធ ២០កេស សៀង ២០យួរ ទឹកស៊ីអ៊ីវ ២០យូរ ទី ២០កេស ជូនរដ្ឋបាលខណ្ឌច្បារអំពៅ។ និងស្បៀងមួយចំនួនប្រគល់ជូនរដ្ឋបាលសាលាស្រុកកៀនស្វាយ រួមមាន៖ អំបុក ៤០គីឡូ, ទឹកបរិសុទ្ធ ២០កេស; សៀង ២០យូរ ;ទឹកស៊ីអ៊ីវ ២០យូរ ;មីកញ្ចប់ ២០កេស។ បន្ថែមពីនេះក៏បាននាំយកអំណោយប្រគល់ជូន ស្ថាប័ន ប៊ី អិន អាយ រួមមាន៖ អង្គរ 500គីឡូផងដែរ។
លោកវេជ្ជបណ្ឌិត សាន មុនី បានបន្តថា ដើម្បីជូនដល់វីរកងទ័ពដ៏អង់អាចក្លាហាន និងបងប្អូនប្រជាពលរដ្ឋភៀសសឹក ដែលជាទឹកចិត្តដ៏ធំធេងបានបង្ហាញនូវការគោរពស្រឡាញ់ ផ្តល់កម្លាំងចិត្តដល់វីរភាពកងទ័ពការពារជាតិរបស់យើង និងជាគាំទ្រវីរកងទ័ពជួរមុខកម្ពុជាដ៏អង់អាចក្លាហាន ក្នុងន័យបង្ហាញពីខឿនការពារជាតិ ជាពិសេសការគិតគូរដល់បងប្អូនប្រជាពលរដ្ឋភៀសសឹក ដែលបាននិងកំពុងជម្លៀសចេញ ពីផ្ទះសម្បែងមកទីកន្លែងសុវត្ថិភាព។
នាឱកាសនោះដែរ អាជ្ញាធរមូលដ្ឋាន សូមអរគុណដល់គណៈគ្រប់គ្រង និងបុគ្គលិកគ្រប់ផ្នែក នៃមន្ទីរសម្រាកព្យាបាល រ៉ូហ្សាណា បាននាំយកអំណោយជាស្បៀងមកប្រគល់ជូនអាជ្ញាធរ ដើម្បីរៀបចំឧបត្ថម្ភគាំទ្រដល់សមរភូមិមុខ៕ដោយ៖ស តារា
