ខេត្តសៀមរាប៖ កម្លាំងនគរបាលខេត្តសៀមរាបបានចាប់ឃាត់ខ្លួនប្ដីប្រពន្ធញៀនថ្នាំ១គូ ក្រោយមានជនរងគ្រោះដាក់ពាក្យប្ដឹងថា បានខ្ចីម៉ូតូយកទៅស៊ីដាច់។ នេះបើតាមប្រភពដែលអ្នកសារព័ត៌មានទទួលបាននៅថ្ងៃទី ២២ ខែកុម្ភៈ ឆ្នាំ២០២៦នេះ។
ប្រភពបន្តថា កាលពីថ្ងៃទី១៨ ខែកុម្ភៈ ឆ្នាំ២០២៦ វេលាម៉ោង២០៖០០នាទីនៅចំណុចភូមិគោកធ្លក ឃុំកណ្ដែក ស្រុកប្រាសាទបាគង ខេត្តសៀមរាប ជនសង្ស័យឈ្មោះ ចាន់ ភារិន បានសុំខ្ចីម៉ូតូ ម៉ាកហុងដា ទ្រីមពណ៌ខ្មៅ ផ្លាកលេខ 1KRភ្នំពេញ 7189 របស់ឈ្មោះ ភា សុខភាព ភេទស្រី អាយុ១៩ឆ្នាំ ជាជនរងគ្រោះ ដោយខ្ចី និងម្ដាយឈ្មោះ សាយ សាលឿត អាយុ៤២ឆ្មាំ ដោយនិយាយកុហកថា ខ្ចីម៉ូតូទៅយកប្រពន្ធមួយភ្លែត ពេលខ្ចីបាន ជនសង្ស័យខាងលើបានទៅយកប្រពន្ធឈ្មោះ ឃុត សុភ័គ្គ ជាជនសង្ស័យ នៅផ្ទះឈ្មោះថា ភេទស្រីរស់នៅភូមិឃុំកើតហេតុខាងលេី ក្រោយមកជនសង្ស័យ និងប្រពន្ធ បានបើកម៉ូតូឌុបគ្នា គេចខ្លួនបាត់ ។
ប្រភពបន្ថែមថា បន្ទាប់ពីទទួលបានពាក្យបណ្តឹងរបស់ជនរងគ្រោះ និងអនុវត្តន៍តាមការចង្អុលបង្ហាញពី លោកឧត្តមសេនីយ៍ទោ ហួត សុធី ស្នងការនៃស្នងការដ្ឋាននគរបាលខេត្តសៀមរាប កម្លាំងនគរបាលស្រុកប្រាសាទ បាគង សហការជាមួយនគរបាលផែនការងារព្រហ្មទណ្ឌខេត្តសៀមរាប បានបើកការស្រាវជ្រាវ និងសហការជាមួយ កម្លាំងនគរបាល នៃអធិការដ្ឋាននគរបាលស្រុកព្រៃឈរ ខេត្តកំពង់ចាម យើងបាន ធ្វើការឃាត់ខ្លួនជនសង្ស័យទាំង០២នាក់មកសាកសួរនាំ ។
ជនសង្ស័យទី១. ឈ្មោះ ចាន់ ភារិន ភេទប្រុស អាយុ ៤៦ឆ្នាំមុខរបរ ធ្វើកម្មករ មានស្រុក កំណើតនៅភូមិ អូរបេង ឃុំមេសូជ្រៃ ស្រុកស្ទឹងត្រង់ ខេត្តកំពង់ចាម និងទីលំនៅបច្ចុប្បន្នភូមិក្រាំង ឃុំសុកចិត្ត ស្រុកសណ្ដាន់ ខេត្តកំពង់ធំ (ប្រវត្តិទោសគ្មាន) និងជនសង្ស័យទី២. ឈ្មោះ ឃុត សុភ័គ្គ ភេទស្រី អាយុ ៣១ឆ្នាំមុខរបរកម្មករ មានស្រុកំណើត និងទីលំនៅបច្ចុប្បន្នភូមិ ក្រាំង ឃុំសុកចិត្ត ស្រុកសណ្ដាន់ខេត្តកំពង់ធំ(ប្រវត្តិទោសគ្មាន)។
នៅចំពោះមុខសមត្ថកិច្ចយើង ជនសង្ស័យ បានឆ្លើយសារភាពថា បន្ទាប់ពីខ្ចីម៉ូតូ របស់ជនរងគ្រោះបានហើយ ជនសង្ស័យបានជិះម៉ូតូទៅឌុបប្រពន្ធ នាំគ្នាជិះឆ្ពោះទៅ ទិសខាងកើត ដើម្បីយកម៉ូតូទៅរកកន្លែងលក់ ពេលជិះទៅដល់ផ្សារកំពង់ក្ដីស្រុកជីក្រែង ជនសង្ស័យ ទាំងពីរនាក់ខាងលេីបានកាក់រថយន្តក្រុង ដាក់ម៉ូតូ និងជិះរថយន្តទៅភ្នំពេញ ពេលទៅដល់ភ្នំពេញខ្លួន និងប្រពន្ធបានជួលផ្ទះសំណាក់ដេក ក្រោយមកក៏ធ្វើដំណើរត្រឡប់មកខេត្តកំពង់ចាម ដល់ចំណុច(ព្រៃទទឹង)ក្នុងស្រុកព្រៃឈរ ខេត្តកំពង់ចាម នាថ្ងៃទី១៩ ខែកុម្ភៈ ឆ្នាំ២០២៦ ក៏ជិះចូលផ្ទះរបស់ឈ្មោះ ដំ ភេទប្រុស ដែលត្រូវជាមិត្តភក្តិ ដើម្បីដោះផ្លាកលេខម៉ូតូដោយជនសង្ស័យ(ប្ដី)ជាអ្នកដោះ បន្ទាប់មក ក៏បន្តរដំណើរ បានប្រហែល៤ គីឡូម៉ែត្រ ហួសសាលាស្រុកព្រៃឈរ ក៏ត្រូវកម្លាំងសម្ថតកិច្ចឃាត់ខ្លួនបានតែម្ដង។
វត្ថុតាងដកហូត ម៉ូតូចំនួន១គ្រឿង ម៉ាកហុងដាទ្រីម ពណ៌ខ្មៅ ផ្លាកលេខ 1-kR-7189 ប្រគល់ជូនជនរងគ្រោះវិញ។ កម្លាំងបានធ្វើតេស្តរកសារធាតុញៀនតាមរយៈទឹកនោមជនសង្ស័យ ជាលទ្ធផលវិជ្ជមានទាំង០២នាក់។
ជនសង្ស័យ និងវត្ថុតាងត្រូវបាននគរបាលជំនាញកសាងសំណុំរឿង បញ្ជូនទៅតុលាការ តាមនីតិវិធីច្បាប់៕
