១-អូនតូច កំពុងតែធ្វើឲ្យអ្នកស្នេហាវិស័យបាល់ទាត់ និងអ្នកលេងហ្វេសបុកភ្ញាក់ផ្អើលពីសមត្ថភាពរបស់ខ្លួន
ដោយមានមាឌតូចជាងគេ ទាបជាងគេ និងអាយុតិចជាងគេ អាត អូនតូចគឺជាសមាជិកជម្រើសជាតិកម្ពុជា អាយុក្រោម១៦ឆ្នាំ បាននឹងកំពុងតែធ្វើឲ្យអ្នកស្នេហាវិស័យ កីឡាបាល់ទាត់និងប្រិយមិត្តបណ្ដាញអ្នកលេងហ្វេសប៊ុក កោតសរសើរមិនដាច់ពីមាត់អំពី ទេពកោសល្យរបស់ប្អូន ក្នុងការប្រកួតបាល់ទាត់ពានរង្វាន់ AFF U-16 BIDC Championship កន្លងទៅថ្មីៗនេះ។
ទោះបីមិនបានរកគ្រាប់បាល់បញ្ចូលទីដោយផ្ទាល់កាលពីយកឈ្នះ លើក្រុមជម្រើសជាតិហ្វីលីពីនអាយុក្រោម១៦ឆ្នាំក៏ពិតមែន ប៉ុន្តែទម្រង់លេងស៊ីចង្វាក់គ្នាជាមួយមិត្តរួមក្រុម ជាអ្នកចែកបាល់ដ៏ល្អហើយមួយគ្រាប់បញ្ចូលទីរបស់ ទៀត គឹមហេង ក៏អូនតូចដែលជាកីឡាករពាក់អាវលេខ១២ ជាអ្នកបង្កើតឱកាសដែរ។
ការ បង្ហាញជំនាញញាក់បាល់ ចែកបាល់ទៅឲ្យមិត្តរួមក្រុម រូបគេបានធ្វើឲ្យអ្នកទស្សនាផ្ទាល់ក្នុងកីឡាដ្ឋាន ស្រែកហ៊ោកញ្ជ្រៀវពេញហ្នឹងតែម្ដង ពិសេសឲ្យតែបាល់ជាប់ជើងរបស់អូនតូច។
តែអ្វីដែលពិសេសជាងនេះទៅទៀត តាមបណ្ដាញសង្គមហ្វេសបុក អូនតូចក៏ល្បីដែរ ដោយមានអ្នកលេងជាច្រើននាក់ផុសបង្ហោះ សរសេរបញ្ចេញមតិយោបល់អំពីសមត្ថភាពរបស់ប្អូន។ ឯអ្នកខ្លះទៀតបានយករូបថតរបស់អូនតូចមកធ្វើជារូបតំណាង ប្រូហ្វាល់និង ខូវើហ្វូតូរបស់ខ្លួនទៀតផង អ្នកខ្លះចាត់ទុកប្អូនជា Idol ទៅទៀត។
អាតអូនតូច មានស្រុកកំណើតនៅខេត្តរតនគិរីបានជាប់តេស្តជាកីឡាករវ័យក្មេងរបស់ សហព័ន្ធបាល់ទាត់កម្ពុជាដោយធ្វើការហ្វឹកហាត់នៅទីលានមជ្ឈមណ្ឌល បាល់ទាត់បាទីសម្រាប់ជាកីឡាករត្រៀមឈុតស៊ីហ្គេម២០២៣។
២-ប្រាក់ មុន្នីឧត្តម
ដោយ កើតនៅក្នុងគ្រួសារមួយដែលមានឪពុកជាមន្ត្រីរាជការហើយម្តាយជា ស្ត្រីមេផ្ទះ។ ឧត្តម ជាកូនច្បងក្នុងគ្រួសារដែលមានប្អួនៗចំនួនពីរនាក់ទៀត។ ក្នុងនោះប្អូនប្រុសរបស់គេក៏ជាកីឡាករបាល់ទាត់ផងដែរ។
ថ្មីៗនេះមហាជនជាច្រើនបានចាប់អារម្មណ៍ខ្លាំងលើវិស័យ បាល់ទាត់នៅស្រុកខ្មែរ។ ចាប់អារម្មណ៍ខ្លាំង ក៏ដោយសារកីឡាករកម្ពុជាធ្វើបានល្អច្រើនជាងមុនក្នុងប៉ុន្មាន ប្រកួតចុងក្រោយនេះ ទាំងក្រុមជម្រើសជាតិឈុតធំ និងឈុតក្រោមអាយុ ២៣ ឆ្នាំ។
ក្នុងចំណោមកីឡាករឆ្នើមៗទាំងអស់នោះខ្សែបម្រើប្រយុទ្ធ ប្រាក់ មុន្នីឧត្តម ដែលលេងឲ្យទាំងក្រុមបាល់ទាត់ជម្រើសជាតិកម្ពុជាអាយុក្រោម ២៣ ឆ្នាំ និងក្រុមធំកំពុងស្ថិតនៅក្នុងចំណាប់អារម្មណ៍របស់មហាជនទូទៅទាំងនៅក្នុងស្រុក និងក្នុងតំបន់។ ឧត្តម បានបញ្ចប់ការសិក្សាថ្នាក់ទី ១២ ហើយបានចូលរៀនសាកលវិទ្យាល័យមួយបានមួយរយៈ។
ឯ ប្រាក់ មុន្នីឧត្តម ស្ថិតក្នុងចំណោមកីឡាករវ័យក្មេងឆ្នើមបំផុតទាំងបួន (Best Young Player) ប្រចាំយុទ្ធនាការស៊ីហ្គេមលើកទី ២៨ ដែលទើបតែបញ្ចប់កាលពីពេលថ្មីៗនេះ។ នេះបើយោងទៅតាមការចេញផ្សាយរបស់គេហទំព័រ Football Channel Asia នៅលើបណ្តាញសង្គម Facebook របស់ខ្លួន។
កីឡាករវ័យក្មេងហើយឆ្នើមទាំងបួននៅស៊ីហ្គេមលើកទី ២៨ មាន ប្រាក់ មុន្នីឧត្តម ខ្សែបម្រើប្រយុទ្ធរបស់កម្ពុជា កីឡាករខ្សែបម្រើប្រយុទ្ធអន្តរជាតិថៃ Chanathip Songkrasin វ័យ ២១ ឆ្នាំ ខ្សែបម្រើវ័យ ១៨ ឆ្នាំរបស់មីយ៉ាន់ម៉ា Sithu Aung និងខ្សែការពារវ័យ ២០ ឆ្នាំ របស់ថៃ Narubadin WeeraWatnodom។
ប្រាក់ មុន្នីឧត្តម វ័យ ២១ ឆ្នាំ របស់ក្លិបស្វាយរៀងបានបង្ហាញពីទម្រង់លេងដ៏គួរឲ្យកត់សម្គាល់ក្នុង ព្រឹត្តិការណ៍ស៊ីហ្គេមកាលពីពេលថ្មីៗនេះក្រោយពីបានស៊ុតបាល់បញ្ចូល ទី ៣ គ្រាប់អំឡុងយុទ្ធនាការនោះ បើទោះបីក្រុមជម្រើសជាតិកម្ពុជាអាយុក្រោម ២៣ ឆ្នាំបានធ្លាក់ចេញត្រឹមវគ្គចែកពូល បន្ទាប់ពីឈ្នះ១លើក ស្មើ១លើក និងចាញ់២លើក ។
ឧត្តម បានឲ្យដឹងថាខ្លួនបានចូលហាត់បាល់ តាំងពីខ្លួនមានអាយុ ១៣ ឆ្នាំ ហើយក៏ជាប់ជាជម្រើសជាតិ U13 នៅពេលនោះផងដែរ។តាំងពីតូចមក តាំងពីអាយុ ៦-៧ ឆ្នាំ ចូលចិត្តលេងបាល់ណាស់។ ពេលអាយុ ១៣ ឆ្នាំ នៅពេលដែលបានចូលក្រុមជម្រើសជាតិ ចូលហាត់ជាមួយគេ ធ្វើឲ្យ កាន់តែស្រឡាញ់ ហើយចង់ជួយ និងសង្ឃឹមថាថ្ងៃណាមួយបានជួយប្រទេសជាតិ ។
ចំពោះការលេងវិញ កីឡាករដែលមានស្រុកកំណើតនៅរាជធានីភ្នំពេញរូបនេះបានបញ្ជាក់ថា ខ្លួនពេញចិត្តលេងគ្រប់តួនាទីទាំងអស់ពោល គឺជាខ្សែបម្រើ ឬក៏ខ្សែប្រយុទ្ធក៏បានស្រេចតែលើការចាត់ចែងរបស់គ្រូបង្វឹក។
ដោយមានការលើកទឹកចិត្តពីឪពុកម្ដាយពីគ្រូបង្វឹក និងការខំប្រឹងប្រែងរបស់ខ្លួន ឧត្តម បានជួយដល់ក្រុមស្វាយរៀងឲ្យលើកពាន «Hun Sen Cup» ចំនួន ៣ លើក និង «Metfone League» ចំនួនមួយលើកផងដែរ។ នៅឆ្នាំ ២០១៥ ឧត្តម ក៏បានទទួលស្បែកជើងមាសពី «Hun Sen Cup» ផងដែរ។
តាមរយៈនេះ យើងអាចធ្វើការសន្និដ្ឋានបានថា វិស័យកីឡាបាល់ទាត់របស់កម្ពុជា កំពុងតែទទួលការចាប់អារម្មណ៍យ៉ាងខ្លាំង ក្នុងនោះមិនត្រឹមតែប្រិយមិត្តក្នុងស្រុកទេ សូម្បីតែប្រិយមិត្តក្រៅស្រុកក៏មានការចាប់អារម្មណ៍ដែរ។ ដូច្នេះសូមបន្តចូលរួមគាំទ្របន្តទៀតទាំងអស់គ្នា ដើម្បីជួយលើកស្ទួយកីឡាជាតិយើង ៕
