ក្រុមបាល់ទាត់ជម្រើសជាតិនារីអ៊ីរ៉ង់ត្រូវបង្ខំចិត្តគោរព និងច្រៀងបទភ្លេងជាតិរបស់ខ្លួននៅថ្ងៃព្រហស្បតិ៍មុនការប្រកួតវគ្គចែកពូល Women’s Asian Cup ជាមួយម្ចាស់ផ្ទះអូស្ត្រាលី នេះបើតាមប្រភពជិតស្និទ្ធនឹងក្រុមប្រាប់ CNN Sports ប៉ុន្មានថ្ងៃបន្ទាប់ពីក្រុមបដិសេធមិនធ្វើដូច្នេះក្នុងការប្រកួតបើកឆាករបស់ខ្លួនឡើយ។

 

មុនពេលចាញ់កូរ៉េខាងត្បូង 3-0 កាលពីថ្ងៃច័ន្ទ ក្រុម និងគ្រូបង្វឹករបស់អ៊ីរ៉ង់ Marziyeh Jafari បានបដិសេធមិនធ្វើអត្ថាធិប្បាយអំពីសង្គ្រាមដែលបានចាប់ផ្តើមនៅមជ្ឈិមបូព៌ា ឬការស្លាប់របស់មេដឹកនាំកំពូលអ៊ីរ៉ង់ Ayatollah Ali Khamenei ហើយក្រុមពួកគេ បានឈរស្ងៀម និងសម្លឹងមើលមុខចំៗ ខណៈដែលភ្លេងជាតិអ៊ីរ៉ង់បានលេងកាលពីយប់ថ្ងៃនោះ។

 

ទង្វើនេះត្រូវបានបកស្រាយដោយមនុស្សជាច្រើនថាជាកាយវិការប្រឆាំងនឹងរបបដឹកនាំអ៊ីរ៉ង់ ប៉ុន្តែក្រុមការងារមិនបានបញ្ជាក់ជាសាធារណៈអំពីគោលបំណងរបស់ពួកគេជាមួយនឹងភាពស្ងៀមស្ងាត់អំឡុងពេលភ្លេងលេងឡើយ។

 

វីដេអូដែលបានបង្ហោះនៅលើប្រព័ន្ធផ្សព្វផ្សាយសង្គមបង្ហាញពីអ្នកធ្វើបទបង្ហាញប្រព័ន្ធផ្សព្វផ្សាយរដ្ឋ Mohammad Reza Shahbazi បានចាត់ទុកកីឡាការិនីថាជា “ជនក្បត់”  ។ទង្វើនេះហាក់មិនសូវចុះសម្រុងនឹងរបបអ៊ីរ៉ង់ទេ។

 

ប្រភពប្រាប់ CNN Sports ថា កីឡាការិនីទាំងនោះស្ថិតនៅក្រោមការយាមកាមយ៉ាងតឹងរ៉ឹង ហើយត្រូវបានត្រួតពិនិត្យជានិច្ចដោយសន្តិសុខអ៊ីរ៉ង់ រួមទាំងបុរសម្នាក់ដែលត្រូវបានគេជឿថាមានទំនាក់ទំនងជាមួយអង្គភាពឆ្មាំបដិវត្តន៍អ៊ីស្លាមអ៊ីរ៉ង់ (IRGC) ផងដែរ។ ប្រភពបាននិយាយថា កីឡាការិនីត្រូវបានគេដាក់សម្ពាធ ហើយទីបំផុតត្រូវបង្ខំឱ្យបង្ហាញការគាំទ្រមុនពេលចាញ់ 4-0 ទល់នឹងអូស្ត្រាលី តាមរយៈការគំរាមកំហែងលើគ្រួសាររបស់ពួកគេ។

 

នៅមុនការប្រកួតអូស្ត្រាលី ខ្សែប្រយុទ្ធអ៊ីរ៉ង់ Sara Didar មានអារម្មណ៍រំជួលចិត្តពេលកំពុងនិយាយទៅកាន់ប្រព័ន្ធផ្សព្វផ្សាយ ដោយស្រក់ទឹកភ្នែកនៅពេលនិយាយអំពីក្រុមគ្រួសាររបស់ក្រុម។

 

យោងតាមសារព័ត៌មាន AP គ្រូបង្វឹកអ៊ីរ៉ង់ Jafari បានបន្ថែមថា “ជាក់ស្តែង យើងមានការព្រួយបារម្ភយ៉ាងខ្លាំងអំពីសុខភាពរបស់គ្រួសារយើង និងមនុស្សជាទីស្រឡាញ់របស់យើង និងប្រជាជនអ៊ីរ៉ង់ផ្សេងទៀតទាំងអស់នៅក្នុងប្រទេសរបស់យើង ដែលពួកយើងត្រូវបានផ្តាច់ទំនាក់ទំនងទាំងស្រុងជាមួយពួកគេ ។”

 

គេរំពឹងថាកីឡាការិនីទាំងអស់នឹងត្រូវលើកសរសើរ និងច្រៀងភ្លេងជាតិម្ដងទៀតមុនការប្រកួតវគ្គចែកពូលចុងក្រោយរបស់ក្រុមជាមួយហ្វីលីពីននៅថ្ងៃអាទិត្យ៕