ភ្នំពេញ៖ ទូហ្គេមចំនួន៦ទូ និងមនុស្សចំនួន៦នាក់ ត្រូវបានសមត្ថកិច្ចឃាត់ខ្លួននៅក្នុងទីតាំងវេលុយវីង ដែលបង្កប់ប្រភេទល្បែងស៊ីសង មានទូហ្គេម កាលពីវេលាម៉ោង១ និង១០នាទីថ្ងៃទី១៦ ខែកញ្ញា ឆ្នាំ២០១៦ នៅតាមបណ្តោយផ្លូវ៥៩៨ ភូមិទំនប់ សង្កាត់ភ្នំពេញថ្មី ខណ្ឌសែនសុខ។
ប្រតិបត្តិការនេះដឹកនាំដោយលោក សាំង សុភ័ត្រវិចិត្រ អភិបាលរងខណ្ឌសែនសុខ បន្ទាប់ពីទទួលព័ត៌មានថា ទីតាំងវេលុយវីងយីហោ អាស៊ី ខាងលើមានបង្កប់នូវប្រភេទល្បែងស៊ីសងជាទូហ្គេម ទើបចុះបង្ក្រាបក្នុងបទល្មើសជាក់ស្តែង។ ជនសង្ស័យទាំង៦នាក់ត្រូវបាននាំខ្លួនយកទៅធ្វើការអប់រំរួចអនុញ្ញាតឲ្យត្រឡប់ទៅផ្ទះវិញ។
គួរបញ្ជាក់ថា រាល់ការចុះបង្ក្រាបភាគច្រើនឃាត់ខ្លួនតែជនសង្ស័យ ដោយឡែកម្ចាស់ទីតាំង ថៅកែហាក់ដូចជាពុំមានវិធានការឃាត់ខ្លួន បើទោះជាអត្តសញ្ញាណពួកគេអាចនឹងត្រូវរកឃើញតាមរយៈអាស្រយដ្ឋាននោះក៏ដោយ។ បញ្ហានេះក៏ជាឧបសគ្គក្នុងវិធានការបង្ក្រាបមិនប្រសិទ្ធភាព ក៏ដូចជាបង្កឲ្យបទល្មើសដដែលៗនេះបង្កកើតមាន៕
ដោយ៖ តុង សីហា
