ភ្នំពេញ៖ រថយន្តក្រឡុកស៊ីម៉ង់ត៍របស់ក្រុមហ៊ុន(Home Master Group )មួយគ្រឿងក្រោយចេញពីចាក់សីុម៉ង់ត៍ក្នុងបុរីឌឺមេគង្គរ៉ូយ៉ាល់ រួចបានបើកចេញមកវិញបុកម៉ូតូមួយគ្រឿងនៅតាមផ្លូវជាតិលេខ៦បណ្តាលឲ្យអ្នកបើកម៉ូតូស្លាប់យ៉ាងអាណោចអាធ័ម និងម្នាក់ទៀតរបួសធ្ងន់ ចំណែកអ្នកបើកជនបង្ករត់គេចខ្លួនបាត់ស្រមោល ។

ករណីនេះកើតឡើងនៅវេលាម៉ោងជាង៩ព្រឹកថ្ងៃទី១៩ ខែកញ្ញា ឆ្នាំ២០១៦ នៅតាមផ្លូវជាតិលេខ៦ ខាងមុខក្រុមហ៊ុន(បុរីឌឺមេគង្គរ៉ូយ៉ាល់) ភូមិខ្ទរ សង្កាត់ព្រែកលៀប ខណ្ឌជ្រោយចង្វា។

សមត្ថកិច្ចនគរបាលមូលដ្ឋានបានឱ្យដឹងថា ជនរងគ្រោះដែលស្លាប់មានឈ្មោះង្វៀង យាំុងថាន់ អាយុ១៧ឆ្នាំ ស្នាក់នៅភូមិបាក់ខែងលើ សង្កាត់ព្រែកលៀប ដែលផ្ទះនៅភូមិ ឃុំអរីយ៍ក្សត្រ័ស្រុកល្វាឯម ខេត្តកណ្តាល ចំណែកក្មេងប្រុសដែលរងរបួសធ្ងន់មានឈ្មោះ ជួវយាំុងវិន អាយុ១៤ឆ្នាំ ស្នាក់នៅជាមួយគ្នា បើកម៉ូតូសង់កូរ៉េ ពណ៌ក្រហម ពាក់ស្លាកលេខកណ្តាល1H 1253 ចំណែករថយន្តបង្កម៉ាក (HINO) ពណ៌ស្ករ ប្រភេទក្រឡុកសុីម៉ង់ត៍របស់ក្រុមហ៊ុន Home Master Group  ពាក់ស្លាកលេខ ភ្នំពេញ 5A-1272  រីឯអ្នកបើកបរត្រូវបានគេស្គាល់ឈ្មោះសុីសំណាង អត្តលេខ១០៤៤ (គេចខ្លួនបាត់) ។

ប្រភពព័ត៌មាននៅកន្លែងកើតហេតុបានឲ្យដឹងថា នៅមុនកើតហេតុគេឃើញរថយន្តបង្កបើកបរចេញពី បុរីឌឺមេគង្គរ៉ូយ៉ាល់ឆ្លងផ្លូវជាតិលេខ៦ក្នុងល្បឿនយ៉ាងលឿនទិសដៅពីលិចទៅកើត រីឯជនរងគ្រោះជិះម៉ូតូ២នាក់ដឹកអំពៅពីជើងទៅត្បូង ខណៈជនរងគ្រោះជិះបានទន្ទឹមទល់មុខបុរីស្រាប់តែរថយន្តបានកាច់ចង្កូតចេញពីក្រុមហ៊ុនបុរីឌឺមេគង្គរ៉ូយ៉ាល់ បុកកិនម៉ូតូជនរងគ្រោះនិងអ្នកបើកបរយ៉ាងពេញទំហឹងបណ្តាលឲ្យអ្នកបើកម៉ូតូស្លាប់ភ្លាមៗនៅក្រោមរថយន្ត និងអ្នករួមដំណើរម្នាក់ទៀតរងរបួសធ្ងន់ ។

ក្រោយកើតហេតុអ្នកបើកបរបានបើករថយន្តទៅឈប់ខាងស្តាំហើយរត់ចូលទៅក្នុងបុរីនៅក្បែរនោះបាត់តែម្តង ហើយនៅកន្លែងកើតហេតុមានសមត្ថកិច្ចនគរបាលមូលដ្ឋាន និងសមត្ថកិច្ចជំនាញចរាចរវាស់វែងនៅកន្លែងកើតហេតុ ហើយយករថយន្តបង្កទៅរក្សាទុកនៅការិយាល័យចរាចរណ៍ក្រុង រងចាំការដោះស្រាយ ចំណែកសពដឹកយកទៅតំកល់ទុកនៅសង្កាត់ព្រែកឯង៕

ដោយ៖ ជ្រោយពេជ្រ