ភ្នំពេញ៖ បុរសម្នាក់ បើករថយន្ត Ford មួយគ្រឿងពាក់ស្លាកលេខ ខ.ម ទាំងសស្ថានភាពស្រវឹងរួច បានជ្រុលចង្កូតទៅបុកម៉ូតូមួយគ្រឿង គ្រាដែលមានម៉ូតូពីរគ្រឿងប៉ះគ្នា ហើយម្ចាស់និងម្ចាស់ទុកម៉ូតូចោលក្បែរចិញ្ចើមថ្នល់ទៅឈរ ជជែកគ្នាក្បែរនោះ  ដោយអូសម៉ូតូពីមុខវិទ្យាល័យ ជាស៊ីមសាមគ្គី រហូតជិតដល់ស្ថានីយបូមទឹកស្អុយ ផ្លូវ271 ទើបព្រមឈប់។

សាក្សីនៅកន្លែងកើតហេតុបានឲ្យដឹងថា ដំបូងឡើយ មានករណីគ្រោះថ្នាក់ ចរាចរណ៍ មួយរវាងម៉ូតូហុងដាសេ125 ពណ៌ខ្មៅ ស្លាកលេខ 1FE-1700 បុកជាមួយម៉ូតូគុប70 ពណ៌ទឹកប៊ិច ពាក់ស្លាកលេខ ទ.2842 ភ.ព1 នៅមុខវិទ្យាល័យជាស៊ីម សាមគ្គី នាម៉ោង៩និង៣០នាទីយប់ថ្ងៃទី១៧ ខែកញ្ញា ឆ្នាំ២០១៦ ហើយភាគីម៉ូតូទាំងពីរ បានមកឈរជជែកគ្នានៅលើចញ្ចើមផ្លូវ ដោយទុកម៉ូតូតាមផ្លូវ។

សាក្សីឲ្យដឹងទៀតថា ខណៈអ្នកទាំងពីកំពុងតែជជែកគ្នា មិនទាន់ត្រូវរ៉ូវគ្នាផង ស្រាប់តែនៅម៉ោង១០និង៤០នាទីយប់ថ្ងៃដដែល មានបុរសមិនស្គាល់ឈ្មោះម្នាក់បើករថយន្ត Ford ពណ៌ត្រេអ៊ី មួយគ្រឿងពាក់ស្លាកលេខ ខ.ម 1,2.7206 ទាំងអាការៈស្រវឹងខ្លាំងដោយបើក ពីលិចទៅកើតយ៉ាងលឿនមកបុកម៉ូតូគុប ហើយអូសរត់ដល់ជិតស្ថានីយ៍បូមទឹកស្អុយ ក៏ត្រូវកម្លាំងកងរាជអាវុធហត្ថខណ្ឌចំការមនដេញស្ទាក់ឲ្យឈប់ តែអ្នកបើកបរមិនឈប់នៅតែព្យាយាមបើករត់ រហូតជិតដល់ស្ថានីយបូមទឹកស្អុយ មុខហាងផ្កាសួនធម្មជាតិ271 ទើបអ្នកបើកបរព្រមឈប់ប្រគល់ខ្លួនជូនសមត្ថកិច្ចឃាត់ខ្លួន ។

ក្រោយពេលកើតហេតុ សមត្ថកិច្ចខណ្ឌទួលគោក បានមកទំនាក់ទំនងកម្លាំងកងរាជអាវុធហត្ថខណ្ឌចំការមនដើម្បីនាំខ្លួនអ្នកបើកបរ ប្រមឹកនិង ស្ទូចយករថយន្ត និងម៉ូតូទៅ ដោះស្រាយតាមច្បាប់៕

ដោយ៖ ប្រាថ្នា