ខេត្តតាកែវ ៖ សេចក្តីរាយការណ៍បានឲ្យដឹងថា កាលពីព្រឹកថ្ងៃទី២៩ ខែមិថុនា ឆ្នាំ២០២៦ មានអំពើឃាតកម្មមួយបានកើតឡើងនៅភូមិត្រពាំងជ្រៃ ឃុំស្មោង ស្រុកទ្រាំង ខេត្តតាកែវ ដែលជនដៃដល់ជាឃាតកបានប្រើគល់ឬស្សីវាយយុវជនម្នាក់មានជម្ងឺសរសៃប្រសាទ”វិបល្លាសស្មារតី”រហូតដល់ស្លាប់ គ្រាន់តែរឿងដេញគ្នាឲ្យចេញពីក្នុងរបងផ្ទះមិនចេញ។
ជនរងគ្រោះមានឈ្មោះ ចឹក រ៉េត ភេទប្រុស អាយុ៣២ឆ្នាំ នៅលីវ មានជម្ងីប្រចាំកាយ”ជម្ងីសរសៃប្រសាទ” រស់ក្នុងបន្ទុកជាមួយម្តាយវ័យចំណាស់អាយុ៧២ឆ្នាំ នៅភូមិត្រពាំងឈូក ឃុំត្រឡាច ស្រុកទ្រាំង ខេត្តតាកែវ។
ជនដៃដល់ជាឃាតកឈ្មោះ សែស ធី ភេទប្រុស អាយុ៥២ឆ្នាំមានទីលំនៅភូមិស្គុល ឃុំស្មោង ស្រុកទ្រាំង ខេត្តតាកែវ។
សេចក្តីរាយការណ៍ឲ្យដឹងទៀតថា នៅវេលាម៉ោងប្រមាណ១០ព្រឹកថ្ងៃខែខាងលើ ជនរងគ្រោះឈ្មោះ ចឹក រ៉េត ជាយុវជនមានជម្ងឺសរសៃប្រសាទឬហៅថា “វិបល្លាសស្មារតី” បានអូសវ៉ាលិសមួយអត់មានខោអាវដើរចេញពីផ្ទះ ពុំដឹងគោលដៅទៅណាឲ្យពិតប្រាកដទេ។ រហូតដល់ម៉ោងប្រមាណជាង១២ថ្ងៃត្រង់ ថ្ងៃដដែល ជនរងគ្រោះបានដើរមកដល់ផ្ទះឈ្មោះ ជើង វាសនា នៅភូមិត្រពាំងជ្រៃ ឃុំស្មោង ស្រុកទ្រាំង ខេត្តតាកែវ (ជាកន្លែងកើតហេតុ) ឃើញទ្វាររបងមានចាក់សោ ជនរងគ្រោះបានបោះវ៉ាលិសចូលទៅក្នុងរបងផ្ទះ ហើយក៏ឡើងផ្លោះរបងលោតចូលតាមក្រោយ។
បន្ទាប់មក ជនរងគ្រោះក៏អូសវ៉ាលិសចូលទៅដល់ក្រោមសំយ៉ាបផ្ទះ ពេលនោះជនសង្ស័យឈ្មោះ សែស ធី មុខរបរជាអ្នកយាមផ្ទះឲ្យឈ្មោះជើង វាសនា ឃើញក៏កាន់គល់ឬស្សីមូលមួយកំណាត់ទៅសួរនាំជនរងគ្រោះនិងដេញឲ្យចេញទៅក្រៅផ្ទះវិញ ប៉ុន្តែជនរងគ្រោះមិនចេញ ទើបជនសង្ស័យវាយ១ដំបងគល់ឬស្សីចំកផ្នែកខាងក្រោយបណ្តាលឲ្យជនរងគ្រោះដួលសន្លប់នៅលើដី ហើយជនសង្ស័យបានវាយជនរងគ្រោះត្រង់ក្បាលជាច្រើនដំបងទៀត រួចជាន់កបន្ថែមរហូតដល់ជនរងគ្រោះស្លាប់តែម្តង។
អ្វីដែលកាន់តែព្រៃផ្សៃជាងនេះទៀត ជនសង្ស័យបានហែកភួយនិងយកខ្សែអង្រឹងចងកសពជនរងគ្រោះអូសចេញពីមុខផ្ទះក្នុងចេតនាដើម្បីបំបាត់ភស្តុតាង តែពេលនោះព័ត៌មានត្រូវបានគេរាយការណ៍ជូនសមត្ថកិច្ចនគរបាលមូលដ្ឋាន ទើបកម្លាំងជំនាញនៃអធិការដ្ឋាននគរបាលស្រុកទ្រាំង ដឹកនាំដោយលោកឧត្តមសេនីយ៍ត្រីស្នងការរងទទួលផែននគរបាលព្រហ្មទណ្ឌ ក្រោមបទបញ្ជាពីលោកឧត្តមសេនីយ៍ទោស្នងការ នៃស្នងការដ្ឋាននគរបាលខេត្តតាកែវ និងមានការសម្របសម្រួលនីតិវិធីពីស្ថាប័នអយ្យការអមសាលាដំបូងខេត្ត បានចុះទៅដល់និងបានធ្វើការឃាត់ខ្លួនជនសង្ស័យភ្លាមៗតែម្តង។
សពជនរងគ្រោះត្រូវបានសមត្តកិច្ចប្រគល់ជូនអាណាព្យាបាលធ្វើបុណ្យតាមប្រពៃណី។ ចំណែកជនសង្ស័យជាឃាតកត្រូវបានសមត្ថកិច្ចកសាងសំណុំ រឿងបញ្ជូនទៅសាលាដំបូងខេត្ត ដើម្បីចាត់ការតាមផ្លូវច្បាប់៕
ដោយ៖ សុរិយា
