ភ្នំពេញ៖ យោងតាមអនុសាសន៍របស់សម្តេចមហាបវរធិបតី ហ៊ុន ម៉ាណែត បានណែនាំឱ្យលើកទឹកចិត្តដល់អតីតពលករខ្មែរមកពីប្រទេសថៃ ដើម្បីទទួលបានការទទួលស្គាល់ជំនាញជាផ្លូវការ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំការវាយតម្លៃទទួលស្គាល់ជំនាញពីមុន(RPL) ដោយឥតគិតថ្លៃលើ ៨មុខជំនាញក្នុងវិស័យសំណង់ចាប់ពីខែមេសា ឆ្នាំ២០២៦តទៅ។

 

RPL គឺមកពីពាក្យពេញជាភាសាខ្មែរថា «កម្មវិធីវាយតម្លៃទទួលស្គាល់ជំនាញពីមុន ហៅកាត់ថា RPL ហើយជាភាសាអង់គ្លេសហៅថា «Recognition of Prior Learning (RPL)» គឺសំដៅដល់ការទទួលស្គាល់ និងផ្តល់សុពលភាពលើសមត្ថភាពសម្រាប់គោលបំណងនៃការធ្វើវិញ្ញាបនប័ត្រ ដែលបានពីក្រៅប្រព័ន្ធអប់រំ និងបណ្តុះបណ្តាលផ្លូវការ។

 

បើតាមការបញ្ជាក់ពីអ្នកនាំពាក្យក្រសួងការងារបណ្ដុះបណ្ដាល និងវិជ្ជាជីវៈ លោក ស៊ុន មេសា បានឱ្យដឹងថា ចំពោះអត្ថប្រយោជន៍របស់ RPL គឺទទួលស្គាល់ចំណេះជំនាញ និងបទពិសោធន៍របស់អតីតពលករខ្មែរដែលធ្លាប់ធ្វើការងារក្នុងវិស័យសំណង់លើ ៨មុខជំនាញ ដើម្បីជួយពួកគាត់មានភាពងាយស្រួលក្នុងការស្វែងរកការងារសមរម្យ និងទទួលបានប្រាក់ចំណូលល្អប្រសើរ។

 

លោកអ្នកនាំពាក្យរូបនេះ បានបន្តថា កម្មវិធីនេះផ្ដល់វិញ្ញាបនប័ត្របញ្ជាក់ជំនាញដល់អតីតពលករ ក៏ជាផ្នែកមួយជួយដល់វិស័យឯកជនក្នុងការលើកកម្ពស់គុណភាពកម្លាំងពលកម្មក្នុងវិស័យសំណង់ និងគាំទ្រដល់ការអភិវឌ្ឍសេដ្ឋកិច្ចជាតិ។ លើសពីនេះ វិស័យឯកជន ក៏ទទួលបានបុគ្គលិកដែលមានជំនាញច្បាស់លាស់ ត្រឹមត្រូវតាមស្តង់ដា និងមានការទទួលស្គាល់ជាផ្លូវការពីស្ថាប័នរដ្ឋ។

 

មុខជំនាញទាំង៨ ដែលត្រូវបានទទួលស្គាល់រួមមាន ការងារកំបោរ (រៀបឥដ្ឋនិងបូក), ការងារការ៉ូ, ការដំឡើងពុម្ព, ការដំឡើងបណ្តាញបំពង់ទឹក, ការដំឡើងបណ្តាញអគ្គិសនីក្នុងអគារ, ការងាររន្ទា, ការដំឡើងសរសៃដែក និងការផ្សារអគ្គិសនី ដែលជាជំនាញមានតម្រូវការខ្ពស់ក្នុងទីផ្សារការងារនៅកម្ពុជា។ នេះបើតាមការបញ្ជាក់ពីលោក ស៊ុន មេសា។

 

បន្ថែមពីនេះ លោកអ្នកនាំពាក្យ បានគូសបញ្ជាក់ទៀតថា៖«ខ្ញុំនៅតែអំពាវនាវដល់បងប្អូនអតីតពលករដែលត្រឡប់មកវិញ រួសរាន់មកចុះឈ្មោះវាយតម្លៃជំនាញដោយឥតគិតថ្លៃ ដើម្បីទទួលបានវិញ្ញាបនបត្រផ្លូវការ ក្នុងការប្រលូកចូលក្នុងទីផ្សារការងារក្នុងស្រុកប្រកបដោយភាពជឿជាក់ ប្រើប្រាស់លទ្ធផលនៃការវាយតម្លៃនេះ»។

 

ចំពោះការធ្វើតេស្ដនេះ មជ្ឈមណ្ឌលវាយតម្លៃសមត្ថភាពទាំង៩ រួមមាន៖ ១-វិទ្យាស្ថានជាតិពហុបច្ចេកទេសកម្ពុជា(NPIC), ២-វិទ្យាស្ថានជាតិបណ្តុះបណ្តាលបច្ចេកទេស(NTTI), ៣-វិទ្យាស្ថានពហុបច្ចេកទេសព្រះកុសុមៈ (PPI), ៤-វិទ្យាស្ថានបច្ចេកទេសឧស្សាហកម្ម(ITI), ៥-វិទ្យាស្ថានជាតិពហុបច្ចេកទេសអង្គរ(NPIA) នៅខេត្តសៀមរាប, ៦-វិទ្យាស្ថានពហុបច្ចេកទេសភូមិភាគតេជោសែនស្វាយរៀង(RPITSSR) នៅខេត្តស្វាយរៀង, ៧-វិទ្យាស្ថានបច្ចេកវិទ្យាបាត់ដំបង(BIT) នៅខេត្តបាត់ដំបង, ៨-វិទ្យាស្ថានពហុបច្ចេកទេសខេត្តបន្ទាយមានជ័យ (PIBMC) ខេត្តបន្ទាយមានជ័យ, និង ៩-វិទ្យាស្ថានពហុបច្ចេកទេសភូមិភាគតេជោសែនតាកែវ(RPITST) ខេត្តតាកែវ៕ ដោយ៖តារា