ក្រសួងមហាផ្ទៃអារ៉ាប៊ីសាអ៊ូឌីតបានប្រកាសថា ជនវាយប្រហារគ្រាប់បែកអត្តឃាតមួយបានសម្លាប់មនុស្សយ៉ាងតិច១៥នាក់ ស្ថិតនៅក្នុងការវាយប្រហារទៅលើព្រះវិហារដែលប្រើប្រាស់ដោយកងកម្លាំងសន្តិសុខក្នុង ស្ថិតនៅភាគនិរតីអារ៉ាប៊ីសាអ៊ូឌីតកាលពីថ្ងៃទី៦ ខែសីហា ឆ្នាំ២០១៥ ។ ការវាយប្រហារនេះក្រុមរដ្ឋអិស្លាមបានផ្សព្វផ្សាយតាមប្រព័ន្ធអនឡាញថា ជាទង្វើរបស់ក្រុមខ្លួន ។
ទីភ្នាក់ងារព័ត៌មាន SPA បានស្រង់ប្រភពព័ត៌មានពីអ្នកនាំពាក្យក្រសួងមហាផ្ទៃរបស់អារ៉ាប៊ីសាអ៊ូឌីតបញ្ជាក់ថា ការវាយប្រហារបានកើតឡើង ខណៈដែលកងកម្លាំងសន្តិសុខទាំងនោះកំពុងនៅក្នុងព្រះវិហារធ្វើពិធីបួងសួង ស្ថិតនៅក្នុងទីបញ្ជាការកងទ័ពពិសេសក្នុងតំបន់ Abha រដ្ឋធានីនៃទីរួមខេត្ត Asir ។
ប្រភពបានបញ្ជាក់ថា ជនរងគ្រោះបាត់បង់ជីវិតទាំងអស់១៥នាក់ ក្នុងនោះ១២នាក់ ជាកងកម្លាំងពិសេស និង៣នាក់ផ្សេងទៀតគឺជាអ្នកបម្រើការនៅទៅនោះ ។ កាលដើម ប្រភពនេះបញ្ជាក់ថា អ្នកបាត់បង់ជីវិតមានតែ១៣នាក់ប៉ុណ្ណោះ ប៉ុន្តែក្រោយបានប្រកាសថា អ្នករងរបួស២នាក់ទៀតបានស្លាប់ ។
ក្រុមឧទ្ទាមរដ្ឋអិស្លាម IS ថ្លែងតាមប្រព័ន្ធធ្វីថើ ថា ការវាយប្រហារគ្រាប់បែកអត្តឃាតខាងលើនេះជាសកម្មភាពរបស់ខ្លួនដែលគោលដៅទៅលើបន្ទាយកម្លាំងយោធា ស្ថិតនៅក្នុងខេត្ត Asir ។
សេចក្តីថ្លែងការណ៍មួយដែលគេសន្និដ្ឋានថា អាចចេញពីក្រុមរដ្ឋអិស្លាមនោះបានបញ្ជាក់ថា «គាត់(ជនបំផ្ទុះគ្រាប់បែកអត្តឃាត)មានសមត្ថភាពជ្រៀតជ្រែកឆ្លងកាត់របាំងសន្តិសុខ ហើយចូលទៅកាន់ជំរុំហ្វឹកហាត់នៅខាងក្នុង នៃទីក្រុងAbha ខេត្ត Asir ដោយនៅពេលនោះ ក៏បានធ្វើឲ្យផ្ទុះឡើងសម្លាប់ និងរងរបួសរាប់សិបនាក់» ។
កាលពីខែឧសភា ឆ្នាំ២០១៥ ការវាយប្រហារគ្រាប់បែកអត្តឃាត២លើកបានកើតឡើងស្ថិតនៅព្រះវិហារមូស្លីមនិកាយស៊ីអ៊ីដ ក្នុងប្រទេសអារ៉ាប៊ីសាអ៊ូឌីត ។ ការវាយប្រហារនេះ ក្រុមរដ្ឋអិស្លាមបានប្រកាសថា ជាទង្វើពួកគេ ។ ការវាយប្រហារព្រះវិហារលើកទីមួយធ្វើឡើងនៅតំបន់ Qatif ស្ថិតនៅភាគខាងកើតអារ៉ាប៊ីសាអ៊ូឌីតបណ្តាលឲ្យស្លាប់២១នាក់ ដែលសុទ្ធសឹងតែជាអាចារ្យ ។ រីឯការវាយប្រហារមួយករណីទៀតបានធ្វើឡើតក្នុងរយៈពេលក្រោយសប្តាហ៍ទៅលើព្រះវិហារមួយកន្លែងក្នុងតំបន់ Damman ដោយសម្លាប់មនុស្ស៤នាក់។
ការវាយប្រហារគ្រាប់បែកដែលជាទង្វើរបស់ក្រុមរដ្ឋអិស្លាមផងដែរបានធ្វើឡើងនៅព្រះវិហារអិស្លាមនិកាយស៊ីអ៊ីដស្ថិតនៅក្នុងទីក្រុងគុយវេត កាលពីខែកក្កដា ឆ្នាំ២០១៥ សម្លាប់មនុស្ស២៧នាក់ ។
ក្រុមឧទ្ទាម ដែលជាអ្នកប្រឆាំងយ៉ាងខ្លាំងក្លាទៅលើច្បាប់ទម្លាប់ប្រទេសអារ៉ាបតាមឈូងសមុទ្រពែក្សនោះតែងតែព្យាយាមបង្កឲ្យមានជម្លោះ ឬការប្រឈមមុខដាក់គ្នារវាងសាសនា នឹងសាសនាស្ថិតនៅឧបទ្វីបអារ៉ាប់ ។ ក្រុមនេះបានអំពាវនាវ ជំរុញ និងលើកទឹកចិត្តដល់ក្រុមយុវជននិកាយសាន់នីក្នុងប្រទេសអារ៉ាប៊ីសាអ៊ូឌីតវាយប្រហារប្រឆាំងគោលដៅទៅលើក្រុមមូស្លីមនិកាយស៊ីអ៊ីដ ៕
ប្រែសម្រួល៖ យ៉ាត
